Бројот на активно заразени со коронавирус во земјата, во моментов изнесува 2.076 лица.

Деновиве зголемен е бројот на заразени од вкупниот број на направени тестови, а по тој повод министерот за здравство, Венко Филипче, информираше дека се прават анализи кои ќе ги утврдат причините за порастот. Како што посочи, анализата најверојатно ќе биде изготвена до утре, по што ќе се знае дали дополнително треба нешто да биде преземено.

Вчера, од направени 1.397 тестирања  регистрирани беа 140 нови случаи на Ковид-19, што е околу 10 проценти од тестираните. Оздравеа уште 60, а починаа 6 пацинети.

Вкупната бројка на ковид дијагностицирани во нашата земја од почетокот на епидемијата изнесува 16.557, бројката на оздравени пациенти е 13.792, на починати е 689 .Досега во земјата се направени вкупно 174.097 тестирања на ковид -19.

Претседателот Стево Пендаровски, по повод почетокот на Новата црковна година, упати писмо до Неговата Сесветост Вартоломеј, Архиепископ Цариградски – Нов Рим и Вселенски Патријарх.

„Ми претставува особена чест да Ви се обратам и да ги изразам своите срдечни желби по повод почетокот на Новата црковна година.

Историјата вели дека треба постојано да се сообразуваме со времето и да го користиме во полза на благосостојбата на луѓето. Вселенската патријаршија е пример за тоа како може да се остане доследен на вредностите, а истовремено да се биде динамичен во соочувањето со тековните предизвици.

Како претседател на мојата земја, сакам лично да Ве информирам дека како држава, изминативе три години, решивме да го искористиме времето во наша полза и да ги оставиме зад нас историските несогласувања.

Ви се обраќам во името на голем дел од моите сограѓани коишто се идентификуваат како православни христијани и чија единствена желба и потреба е да се смират со своите ближни и да се упатат кон заедничката иднина, кон соживотот и кон вистинската слобода.

Во оваа насока би сакал да упатам барање до Вашата Сесветост да го уважи повикот на нашиот благочестив народ и на нашата Црква да го употребите своето апелационо право, со што нашите граѓани од православна христијанска вероисповед, конечно, ќе ја добијат можноста да бидат еднакви со сите останати православни христијани во светот.

Ви посакувам здравје среде големата неизвесност со здравствената криза што го зафати целиот свет“, се вели во писмото на Пендаровски.

Комисијата за заразни болести вчера и денеска ја разгледува можноста за воведување целодневна настава во основните училишта од 1 октомври.

Како што истакна вчера министерот за здравство, Венко Филипче, направена е анализа за бројката на деца коишто би требало да останат во училиште и по завршувањето на часовите во смена.

„Ќе се донесе позитивна одлука исто како што се носи одлука и за исклучоците во сите други училишта, доколку бројката на децата е толку мала што не ја загрозува нивната безбедност, односно да нема дополнителен епидемиолошки ризик што одредена група на деца ќе остане и после завршувањето на смената“, истакна Филипче.

Во однос на онлајн платформата преку која ќе се одвива учебната година, надлежните информираа дека ученикот преку компјутер или телефон ќе може да ја гледа училницата и наставникот, а ќе може да ги користи сите поставени аудио и видеоматеријали на платформата и да ги изработува домашните задачи. За учениците што немаат ИТ-уреди, часовите што ќе ги одржуваат наставниците ќе се снимаат и потоа ќе се пренесуваат во одредено време на националната телевизија.

На оние кои ќе посетуваат физичка настава ќе им се мери температура при влез во училиштето, а децата ќе треба да држат растојание од најмалку 1,5 метар и да носат маски. Предвидено е и почесто миење на рацете и проветрување на училниците.