Македонија
(Видео) Петровска ги потпиша договорите со првата генерација стипендисти на Министерството за одбрана
![](https://makfax.com.mk/wp-content/uploads/2024/01/DSC_2161_resize.jpg)
Министерката за одбрана Славјанка Петровска и студентите што беа примени на конкурсот за стипендирање студенти за потребите на Армијата дефинирани како критични специјалности, денеска, во Министерството за одбрана, потпишаа договори за стипендирање.
„Веруваме во младите луѓе кои се мотивирани може да бидат додадена вредност за одбраната и за Армијата. Ги мотивираме и им отвараме нови можности за личен и професионален развој. Денеска, потпишавме вкупно седум договори за стипендирање, и тоа со двајца студенти што се едуцираат во областа на географско-информациски системи, тројца на медицина и по еден на компјутерска технологија и на енергетика и екологија“, рече Петровска и додаде дека стипендирањето е во висина на процент од просечната плата во државата и изнесува од 30 проценти за студенти од прва година до 80 проценти за студентите од шеста година на студии.
Министерката потенцира дека по завршувањето на студиите, овие лица ќе бидат вработени во Армијата и ќе бидат дел од одбранбениот систем, да работат со најсовремена опрема и услови, да ги усовршат своите знаења и да ги искористат во развојот на македонската Армија и одбраната.
По потпишувањето на договорите со седумте студенти, министерката Петровска порача дека Министерството направи вистински чекори за пополнување на Армијата со кадар кој е суштински потребен, а притоа го помага и развојот на млади кадри.
„Предизвикот за пополнување со лица од критични специјалности во Армијата, Министерството го решава системски. Основа за објавата на овој оглас ни беше Законот за служба во Армијата, но исто така ќе нагласам дека и со донесување на законот за вработените во Министерството за одбрана, кој веќе е во собраниска процедура, ќе се овозможи стипендирање и вработување лица за извршување критични специјалности и во Министерството“, истакна министерката.
Петровска нагласи дека континуитетот за стипендирање и пополување кадар во Армијата и во Министерството со лица од критични специјалности ќе продолжи со една единствен цел – да ги привлечеме најдобрите.
Студентите се заблагодарија за добиената можност и за поддршката во нивното образование од страна на Министерството за одбрана и Армијата.
Дијана Кока-Џемаили, студентка на медицина, истакна дека оваа поддршка во студирањето, што им ја доделија Министерството и министерката за одбрана, се од голема помош за да си ги исполнат личните животни цели.
„Од мала воената служба и медицината беа мој сон и секако дека секоја силна држава треба да вложува во здравството, што е моја област, и во одбраната во државата. Од секогаш сакав да останам во својата земја и се надевам дека следниот конкурс повеќе студенти ќе се одлучат да аплицираат и ќе бидат истрајни во остварувањето на својата цел во својата држава. Јас, на пример, добив стипендија за студирање во Германија и ја одбив и сега сум многу горда на себе и сакам да си останам во својата држава“, истакна Дијана Кока-Џемаили.
„Огромна чест ми е што сум дел од оваа институција и верувам дека и понатаму ќе можам од мојата област да им придонесувам на мојата држава и на нашата Армија во напредување на нашата сајбер-безбедност и другите области од информатичките технологии. Оваа стипендија мене ми служи како поттик во моето унапредување како личност и подобро да го следам развојот на информатичките технологии“, рече Јован Иванов, студент на комјутерска техника и информатика.
Димитар Тануровски, студент на медицина, упати апел до своите колеги. „Би сакал да ги охрабрам и колегите на следниот конкурс да аплицираат, ова претставува прекрасна можност, се разбира, на секој треба да му биде чест да може да ѝ служи на нашата татковина“.
Конкурсот за стипендирање студенти за потребите на Армијата на Република Северна Македонија беше објавен на почетокот на ноември. На конкурсот се пријавија 11 студенти и по извршената селекцијата и физичките и лекарските прегледи, избрани се седум студенти, кои ќе се едуцираат на Универзитетот „Св. Кирил и Методиј“, на штипскиот Универзитет „Гоце Делчев“ и на Универзитетот Американ колеџ. Следниот конкурс за стипендирање студенти ќе биде објавен по завршувањето на изборите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Македонија
(Видео) Полициските хеликоптери исфрлија над 120 тони вода врз пожарите кај селото Тажево и „Јасен“
![](https://makfax.com.mk/wp-content/uploads/2024/07/Screenshot-2024-07-26-203439.jpg)
Денеска Одделот за воздухопловни единици при МВР учествуваше со два хеликоптери во гасење на пожарот во реонот на Јасен.
Во 62 налети исфрлени се преку 120 тони вода со што успеа да се локализираат новите реактивирани краци на пожарот и да се спречи прошорување на пожарот кон селото Брезница , селото Тажево и националниот парк Јасен.
Македонија
Пронајдено детето од Скопје кое беше пријавено дека се оддалечило од домот
![](https://makfax.com.mk/wp-content/uploads/2023/02/policija-5.jpg)
Вечерва околу 19.20 часот полициски службеници од СВР Скопје го пронајдоа осумгодишното дете за кое денеска околу 18.40 часот неговата мајка С.Н. во ПС Карпош пријави дека околу 17 часот се оддалечило од домот.
Веднаш по добиената пријава, полициски службеници од СВР Скопје ги презеле сите неопходни мерки и активности и детето било пронајдено во добра здравствена состојба и ќе биде предадено на родителот, соопшти МВР.
Македонија
На Табановце за влез во државата се чека околу еден час
![](https://makfax.com.mk/wp-content/uploads/2022/07/tabanovce.jpg)
Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен. На ГП Табановце за влез во државата се чека е околу 1 час. На останатите гранични премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани –Делчево.
Од 1 јули до 31 август на државните патишта во Македонија се воведува летен времен режим на сообраќај со кој се забранува движење на тешки товарни возила со вкупна маса над 15 тони, за време на деновите од викендот и за денови при екстремно високи температури.
Термините се следни:
– петок од 17:00 – 22:00 часот,
– сабота од 09:00 до 18:00 часот и
– недела од 09:00 до 22:00 часот.
На магистралниот пат А2 делница: Скопје – Охрид – Скопје се забранува движење на тешки товарни возила чија вкупна маса преминува 7,5 тони за време на викендите, во следните интервали:
– петок од 15:00 – 22:00 часот,
– сабота од 07:00 до 12:00 и од 18:00 до 24:00 часот и
– недела од 07:00 до 22:00 часот.