Бугарија ја призна Македонија како независна, но ние ги заборавивме нивните тврдења зошто ја признаа Македонија. Нивниот тогашен премиер се изјаснил: „Ние ја признаваме Македонија како втора бугарска држава“ и таа негова констатација ние не ја зедовме здраво за готово. И според мемоарите на Глигоров, самиот тогашен премиер Георгиевски со радост ја примил веста, но рекол дека проблемот со јазикот и нацијата ќе го решат историјата и историчарите. За жал, многу време помина од тогаш, ниту историјата ниту политиката не го решила тој проблем, вели Мухамед Халили, претседател на Советот на амбасадорите во интервју за „Макфакс“.

Анализирајќи ги најновите случувања во врска со македонско-бугарските односи, Халили оценува дека Бугарија погрешила и дека е свесна за тоа.

„Сега сака да ја покрие својата грешка. Овој проблем излезе на виделина кога Бугарија пред светот сакаше да ја пласира тезата: да, држава Македонија постои, но не постојат македонски народ и македонски јазик. Бидејќи нивната теза не беше прифатена, тие го променија мислењето и западнаа во замка, па сега велат, ние се бориме за правата на бугарското малцинство кое живее во Македонија“.

За инцидентот со претепаниот Пендиков и за реакцијата на шефот на државата, Халили оценува дека Пендаровски требало да почека со реакцијата.

„Проблемот е многу деликатен, тој се наоѓал пред една дилема дали да реагира или да не реагира. Но, секоја реакција, каде што минското поле не е расчистено, има ризик да паднеш на мина. Според мене, подобро ќе беше да чекаше да заврши процесот на полициско-судските постапки, па кога ќе имавме јасна слика на овие институции, тој да реагира“.

Оценува дека Османи успешно се справува во проблемот со Бугарија.

„Некои му наоѓаат мана зошто тој е Албанец и се грижи за еден проблем, кој е типично етнички“.

Дали ЕУ има исти аршини во односот со Бугарија и Македонија, дали има причина да стравуваме дека 4 февруари може да биде настан од висок ризик, за Џамбаски, за македонската дипломатија и за кроењето на владината коалиција, во интервју за „Макфакс“, Мухамед Халили, претседателот на Советот на амбасадорите.