Македонија
(Видео) Советничка на Заев стопирала наплаќање долг кон приватна фирма, сопствениците ќе останат на улица
Петнаесет лица, сопственици на кумановската фирма „Кридеа“, стравуваат дека ќе станат бездомници бидејќи испорачувале услуги за државната фирма „Економија Идризово“, а таа не им плаќала. За да можат да одговорат на барањата на „Економија“, водејќи се од успешната соработка што почнала пред две децнии, тие ги ставиле под хипотека куќите во кои живеат. Но, „Економија“ во 2008 престанала да плаќа за услугите и за кусо време наталожила долг од близу 160 000 евра. Речиси десет години „Кридеа“ се обидува да си го наплати долгот. Минале низ низа судски постапки, вмешани се извршители, но долгот сè уште не можат да си го наплатат. Последниот обид за наплата на долгот го спречиле вработени во Кабинетот на премиерот Зоран Заев, тврди Татјана Арсиќ од фирмата „Кридеа“.
Банките губат трпение и најавуваат активирање на хипотеките, а државната компанија ветува, но не им ги исплаќа парите за услугите. Сопствениците на фирмата веќе една недела во шатор протестираат пред Влада, а ќе останат додека државата не им го плати долгот.
„Веќе за нас не се работи ниту за месеци ниту за денови туку се работи само за уште колку часа и колку минути ќе нè исфрлат под ведро небо, а најтрагично е што ќе немаме ниту 20 денари да купиме леб затоа што сите живееме од таа работа. Има и деца и студенти, сите почнавме да пиеме лекови за смирување за да ја издржиме оваа тортура“, вели Татјана Арсиќ, кон кого државната фирма „Економија“ има долг.
Државната фирма „Економија“ за да не го плати долгот го криела имотот што го поседува и не го запишувала во Агенцијата за катастар и недвижности. Сопствениците на „Кридеа“ откриле дека „Економија“ има два дуќани купени од „Бетон“ уште во 1984 година, но не се заведени во Катастар. „Кридеа“ тужела и судот пресудил дуќаните да бидат заведени во Катастар како имот на „Економија“ со цел по уписот да ги продадат за да си го наплатат долгот.
Откако дуќаните биле впишани во Катастар како сопственост на „Економија“, кумановската „Кридеа“ преку извршител прибележала хипотека на имотот од државната фирма. На денот кога била првата продажба, се изненадиле кога на имотниот лист од Катастар виделе дека сопственик не е повеќе фирмата „Економија“, туку Владата на Република Македонија со објаснување дека тие биле сопственици на правното лице. Промената во Катастар е направена преку ноќ, тврди доверителот Татјана Арсиќ. Судското решение било ставено надвор од сила, кога од Влада побарале во Катастар да преиспитаат на чие име ќе се заведат недвижностите.
„Кога на 13 април отидов во Катастар за недвижнини ми кажаа дека се јавила советничка од Кабинетот на премиерот и наредила да се изврши упис на РМ, под изговор дека основа за запишување име на РМ е тековната состојба каде што стои дека основач на ‘Економија’ е РМ. Првпат кај неа бевме на 19 април 2018 година. Чачарова ми испрати службено писмо и рече дека не смееме да извршуваме затоа што во овој момент сопственик е РМ“, вели Арсиќ.
Директорот на Катастар, Борис Туџев, е на одмор, па не добивме одговор кој побарал имотот од приватна фирма што е должник да биде префрлен на Влада на РМ.
Во решението на судот за префрлање на имотот стои дека треба да се запише хипотека, а, пак, доколку државната „Економија“ го отуѓи имотот на трето лице, тогаш тоа ќе треба да ги плати и долговите кон кумановската фирма. Тука се вмешала посебната советничка на премиерот Зоран Заев, Тања Чачарова-Илиевска. Таа побарала дуќаните на „Економија“ да бидат запишани како имот на РМ, а не на „Економија“, но ги изоставиле долговите кон „Кридеа“. Со тоа кумановската фирма го изгубила и последниот начин за наплата на долгот.
Посебната советничка во Кабинетот на Заев, Тања Чачарова-Илиевска, за „Макфакс“ не објасни зошто и како преку ноќ се менувал сопственикот на имотот, но рече дека бара решение за проблемот.
„Владата го знае проблемот со долговите на правниот субјект „Економија“ и прави стратегија за решавање на истиот, а со тоа и на случајот со ‘Кридеа’ од Куманово“, вели Чачарова Илиевска.
Додека Владата ја прави стратегијата, доверителите од кумановска „Кридеа“ ќе останат пред Владата. Тие обвинуваат дека во целата приказна се вмешани и судовите, врз основа на чии одлуки се правеле измените во Катастар и оневозможиле наплата на долговите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Денес без вода повеќе скопски улици во општините Бутел и Гази Баба
ЈП „Водовод и канализација“ – Скопје информира дека денеска поради два одделни зафати на водоводната мрежа, повеќе скопски улици и населби ќе останат без вода или со намален притисок во снабдувањето.
Од претпријатието соопштуваат дека поради уличен дефект од ф-400 мм на ул. Бутелска б.б, кај сервис „Топал“, во периодот од 11:00 часот па сè до негово отстранување, без вода ќе бидат корисниците на улиците Хо Ши Мин, Марко Крале, Призренска, Петар Манџуков, Александар Бујнов, Краишка, Коле Канински, како и корисниците на Бутелска – од крак 1 до крак 35 и од крак 2 до крак 14, на подрачјето на општина Бутел.
Исто така, денеска, поради технички зафат на бул. Александар Македонски б.б, во периодот од 05:00 часот па до завршување на работите, без вода ќе останат корисниците на бул. Александар Македонски, улиците Палмиро Тољати и Маџари, жителите од населбата Методија Андонов – Ченто и село Сингелиќ, како и дел од корисниците на ул. 808 и бул. Киро Глигоров, на територија на општина Гази Баба.
Намален притисок во водоснабдувањето, како што информира ЈП Водовод и канализација, ќе имаат и корисниците од населбата Автокоманда – ниска зона, како и од населбите Триангла и Хиподром, како и корисниците на ул. Перо Наков во близина на Кванташкиот пазар.
Македонија
Поплавени дворови, подруми и ниви во Општината Чешиново – Облешево, не се чистеле каналите
Во Општината Чешиново – Облешево во повеќето од населени места се поплавени дворови, подруми, ниви со неожнеан ориз и житни култури, што е резултат на обилните дождови што го зафати регионов неделава. Веќе неколку дена се користи градежна механизација, пумпите на Територијална противпожарна единица од Кочани, исто така работат со полна пареа. На ваков начин се прават обиди да се санираа штетите и да не се дозволи водата од каналите и реките да влезе во селата.
Кризничиот штаб на Општината Чешиново-Облешево е на терен, а градоначалникот Јорданчо Костадинов бара помош и од државните институции за да се справат со поплавите.
– Ние, со малите можности што ги имаме со Јавното комунално претпријатие, неколку дена се бориме со овој проблем и бараме најсоодветни решенија. Излезени сме на терен со капацитетите кои ги имаме, но сепак морам да апелирам до целата јавност да пружи помош на нашата општина, бидејќи со тоа што ние го располагаме како капацитет не е доволно да се справиме со овој проблем, алармира градоначалникот на Општината Чешиново – Облешево.
Мештаните на Чешиново и Облешево велат дека причина за поплавите во нивните села се неисчистените канали, појава, што според нив, се повторува повеќе години наназад.
Во понеделник во поплавеното подрачје ќе се формира Комисија, а граѓаните ќе имаат можност да пријавуваат штети.
Македонија
Облачно со сончеви периоди, на некои места слаб снег
Времето денеска ќе биде променливо облачно со сончеви периоди. Во утринските часови наместа ќе провејува слаб снег. Ќе дува слаб до умерен ветер од северозападен правец. Минималната температура ќе биде во интервал од -2 до 3, а максималната ќе биде во интервал од 7 до 13 степени.
Во Скопје, времето ќе биде променливо облачно со сончеви периоди. Ќе дува умерен северен ветер. Минималната температура ќе се спушти до 0, а максималната ќе достигне до 9 степени.
До вторник ќе биде претежно облачно и суво, а во среда ќе има врнежи од дожд кои ќе бидат пообилни во западните делови. На некои од повисоките планини врнежите од дожд ќе преминуваат во врнежи од снег. До крајот на неделата во утринските часови ќе има појава на магла во одделни котлини.

