МВР и РСБСП продолжуваат со едукативни, сообраќајно превентивни активности во рамките на „Летната кампања 2021“ , но истовремено продолжуваат и засилените контроли на сообраќајната полиција, се со цел безбедно лето и помалку настрадани лица на улиците и патиштата.

„Летна кампања 2021“ се реализира под мотото„ Вози одморен“ и целта на МВР и РСБСП е да ги потсетат возачите на влијанието на заморот и високите летни температури на способноста за управување на моторно возило.

Статистичките податоци покажуваат дека во летниот период се зголемува бројот на сообраќајни незгоди, а од нив голем дел се последица на заморот. Водејќи се од тоа, МВР и РСБСП преку едукативни материјали и преку дистрибуција на вода, ваучери за кафе, маици и друг едукативен материјал и преку едукативни разговори и советување ги потсетуваат возачите да не ги преценуваат своите возачки способности, да не си поставуваат нереални цели во патувањето (како на пример: во 8.00 часот треба да бидам на плажа, за 6 часа стигнав до целта, јас можам да возам 10 часа без паузи, итн.) туку напротив да патуваат одморени, наспиени и да одмараат веднаш штом ги почувствуваат првите знаци на замор.

Брзото возење и возењето под дејство на алкохол исто така се во групата на главни причинители на сообраќајни незгоди со сериозни и фатални последици и токму затоа во рамките на Летната кампања 2021, МВР и РСБСП посветуваат големо внимание на овие ризик фактори.

„Да се управува моторно возило под дејство на алкохол е незаконска и крајно неодговорна работа, спротивна на сите општествени вредности, спротивно на хуманите вредности кои секој човек треба да ги почитува и негува, бидејки така се загрозува животот и здравјето на сите учесници во сообраќајот. РСБСП како институција чии надлежности се генерално во областа на превенцијата, постојано укажува на ризикот на кој се изложува еден возач доколку управува моторно возило под дејство на алкохол. Со помош на таканаречени „Пијани наочари“ , кои симулираат перцепција на лице под дејство на алкохол, се обидуваме да им укажеме на возачите за тоа какви се нивните физички способности кога консумираат алкохол и колку е опасно да се учествува во сообраќај под дејство на алкохол. Пораката која РСБСП и МВР ја упатуваат денес од Куманово е: „ Во сообраќајот нема место за возачи кои возат брзо и под дејство на алкохол!“ истакна Гордана Кожуваровска,претседател на РСБСП.

И репресивните мерки на МВР се насочени најмногу токму кон возачите кои возат брзо и/или под дејство на алкохол.
„Нула толеранција за лица кои возат под дејство на алкохол. Нула толеранција за возачите кои возат брзо и агресивно. Нула толеранција за сите учесници во сообраќајот кои грубо и неодговорно ги прекршуваат сообраќајните правила и прописи. Нашата цел е заштита на животот и здравјето на сите учесници во сообраќајот, граѓаните тоа го знаат, го препознаваат и ги поддржуваат нашите активности, затоа што тоа е за општото добро на сите. Вчера на територијата на СВР Куманово санкционирани се 26 возачи под дејство на алкохол и 69 возачи кои ги прекршувале правилата за ограничување на брзината. На цела територија на државата санкционирани се 170 возачи кои возеле под дејство на алкохол и 556 возачи кои возеле пребрзо.

Повторно апелираме до сите учесници во сообраќајот, да демонстрираат повисоко ниво на лична одговорност и да дадат свој личен придонес за побезбеден сообраќај и за помалку настрадани лица на улиците и патиштата во Република Северна Македонија. Единствено преку повисоко ниво на дисциплина и одговорност на секој учесник во сообраќајот поединечно, ќе го направиме сообраќајот побезбеден за сите. Акцијата за нула толеранција за возачи под дејство на алкохол, и нула толеранција за оние кои возат брзо и агресивно, продолжува“ рече портпаролот на МВР Тони Ангеловски.

#ВОЗИОДГОВОРНО!

Криминалот и корупцијата се заштитен знак на ВМРО-ДПМНЕ, Владата предводена од СДСМ се спротивставува на корупцијата и постапува по наодите на меѓународните и домашни извештаи, реагира СДСМ, по прес-конференцијата на Димче Арсовски од ВМРО-ДПМНЕ.

„Криминалот и корупцијата се заштитен знак на ВМРО-ДПМНЕ, партијата која 11 години бесрамно ја пљачкаше државата, додека граѓаните тонеа во сиромаштија и долгови.

Десетици судски предмети и веќе ефективни затворски казни за високи функционери на ВМРО-ДПМНЕ се најдобар доказ како оваа партија работела во 11 години на режим и заробена држава.

ВМРО-ДПМНЕ е партија на браникот на криминалот и затоа, денес, оваа партија е најмалку повикана да зборува за правда, за борба против криминал и корупција.

За разлика од нив, СДСМ преку Владата и инситуциите што ги предводи е силно посветена на ефикасна и неселективна броба против секој вид на криминал и корупција.

Прочистувањето на правосудството, зголемувањеto на транспарентноста на институциите, новата стратегија за конфискација на имот, дигитализацијата на институциите и унапредувањето на системот за јавни набавки се важни процеси за зајакнување на капацитетите во борбата против криминалот и корупцијата.

По спроведените реформи, денес правосудството ги има сите услови за професионално и непристрасно одлучување, ослободено е од какви било влијанија на извршната власт, а органите на прогонот несомнено постапуваат неселективно, без разлика за кој функционер станува збор.

За разлика од владите на ВМРО-ДПМНЕ кои ги игнорираа сите забелешки во домашните и меѓународните извештаи, денес Владата предводена од СДСМ тие наоди сериозно ги анализира и презема конкретни чекори. Денес, по сите преземени мерки и предвидени иницијативи и процеси, Владата предводена од СДСМ упатува сериозна порака до сите носители на јавни функции, до сите граѓани дека криминалот и корупцијата не се исплаќаат и истите ќе бидат казнети согласно законите“, се наведува во реакцијата.

Криминалот и корупцијата во Македонија се на прво место и нивните креатори имаат име и презиме,Зоран Заев, Оливер Спасовски, СДСМ и цела криминална заевска булумента од Влада и правосудство, истакна на прес-конференција, Димче Арсовски од ВМРО-ДПМНЕ, говорејќи за извештајот на Стејт Департментот на САД во кој се нотира за корупција и вмешаност на владини функционери.

Опозицијата обвини дека Македонија станала синоним за корупција и криминал.

Во извештајот на „Стејт департментот“ пишува: „Законите за борба против корупцијата повремено слабо се применуваат и со нив селективно се гонат критичари на власта и ситни прекршители. Има сериозни обвинувања за корупција во полицијата, судството и во многу други сектори. Многу компании кои работат во Македонија, вклучително и американски компании, ја посочуваат корупцијата како проблем во доделувањето на јавни тендери и во правосудството“, пренесе Арсовски.

Портпаролот на опозициската партија наведе дека наместо вистинските криминалци се гонат новинари кои што се критички настроени кон власта, и сите знаат за тендерите на Рашковски и милионските суми.

„Тендерите на фамилијата на власт се насекаде. Доволен пример и показател е РЕК Битола кој што е класичен пример за испумпување пари преку тендери од страна на фамилијата на власт. Знаете дека и за тоа има пријавен случај за рекет во МВР, и нормално стои и тапка во место некаде во фиока“, рече Арсовски.

Корупцијата во Македонија претходно ја потврди и Транспаренси интернешнал каде сме на 111 место, потсети Арсовски.

„Освен што сме најкорумпирани во Европа, МВР на Спасовски успеа да не изрезили во цел свет и со тоа што подели 215 официјални пасоши со украден идентитет на најголемите нарко босови, мафијаши, убијци, терористи во Европа и светот.Дополнително, за реформите во МВР доволно говори што кадар на СДСМ и Спасовски поставен за началник на полицијата во Прилеп кој го има на илјадници слики со СДСМ, односно со Оливер Спасовски и Зоран Заев, беше уапсен од страна на ДЕА во акција за сузбивање на трговија со дрога. Тоа доволно кажува дека мафијата има своја држава и дека власта и мафијата е едно исто. Исто така полицијата беше посочена од страна на обвинителството како причина за пробивање на акцијата Планина, во која требаше да се разбие еден од најголемите нарко картел во државата“, рече Арсовски.