Македонија
(Видео) Стојаноски: Тројца директори од Тутунски Комбинат Прилеп за неколку месеци купиле станови во Скопје
Откако целата јавност дозна дека Генералниот директор на Тутунски Комбинат, Кире Станкоски, зел плата во висина од 3.500 евра, а самиот Станкоски го потврди тоа, денеска граѓаните ќе ги запознаеме како се збогатиле и останатите директори во комбинатот после само 2 години директорување, изјави Горан Стојаноски, член на ОК ВМРО-ДПМНЕ Прилеп.
„ Наташа Василеска Пирганоска, која е сопруга на Кирил Пирганоски, директорот на погонот за цигари во Тутунскиот Комбинат, во февруари месец годинава, купила стан во неселбата Аеродром во Скопје. Бранко Хронески пак, директорот на погонот за тутун во комбинатот, пред три дена, купил стан во населбата Водно во Скопје. Неизоставен дел повторно е Генералниот директор Станкоски, кој во 2019 година се стекнал со стан во населбата Карпош во Скопје.
Останува нејасно како овие тројца директори во Тутунскиот Комбинат речиси истовремено, односно во временски период од неколку месеци, купиле станови во главниот град? Дали додека тутунарите мака мачеа да го предадат својот труд годинава и се бореа тутунот да им биде платен по реална цена, директорите во комбинатот купувале станови?
Исто така прашуваме:
Дали Димоски Стеван, кој е претставник на синдикат на погон тутун е ,,врбуван” од од Генералниот директор Станкоски, со тоа што му ја вработил ќерката во погон цигари Маја Димоска? И дали Гоце Мојаноски, член на бордот на директори на во Тутунски Комбинат А.Д. Прилеп, си даде отказ од работното место заради откриен финансиски криминал? Истото лице е претседател на комисија за земјоделство во СДСМ во Прилеп и се уште е на платен список во бордот на директори.
Ова се неспорни факти и токму затоа во пресрет на изборите врие во општинската организација на СДСМ Прилеп. Целото раководство на СДСМ деновиве е нервозно, затоа што знаат дека граѓаните нема да им го простат ова богатење на нивниот грб.
ВМРО-ДПМНЕ во сите овие 3 години власт на СДСМ, доследно ја информираше јавноста за сите скандали и сомнежи за сторени криминали.
Граѓаните видоа со какви луѓе си имаат работа и затоа ќе им пресудат на 15-ти јули.
После изборите и формирањето на идната влада која ќе ја предводи ВМРО-ДПМНЕ, ќе следува бескомпромисна борба со корупцијата и криминалот. Секој оној кој се огрешил пред законите и се богател на грбот на граѓаните ќе одговара! Следува Обнова на Македонија!“ порача Стојаноски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Поминаа три години од пожарот во модуларната болница во кој изгореа 14 луѓе
До денес изминаа точно три години од пожарот во модуларната болница во Тетово во кој животот го загубија 14 луѓе, а десетина беа повредени.
Од жртвите кои починаа поради пожарот, 12 беа на болничко лекување таму како заболени од ковид-19, додека двајца беа членови на семејствата на болните.
Основен суд Тетово спроведе судски процес во текот на 2022 и 2023 година, а со решение на Апелациски суд годинава требаше да почне и повторено судење за дел од обвинетите.
По пожарот на 8 септември 2021 година, почна истрага, која резултираше со обвинителен предлог до Основен суд Тетово на 27 јули 2022. Првиот судско рочиште беше закажано за 6 септември 2022 година, но по неколку одложување процесот почна на 4 декември 2022 година.
По шест месеци, на 5 јуни 2023 година Основен суд Тетово одреди условна осуда за Флорин Бесими и Артан Етеми, директори на Клиничка болница Тетово за кривично дело „тешки дела против општата сигурност“, додека правното лице ЈЗУ Клиничка болница беше прогласено за виновно за делото „предизвикување општа опасност“ во судскиот процес по пожарот во модуларната болница во Тетово во 2021 година кога животите ги загубија 14 луѓе.
Судот тогаш одлучи да има ослободителна пресуда за докторот Бобан Вучевски и Клиничка болница за делото „непостапување по здравствени прописи“.
Основното јавно обвинителство Тетово на 10 јули 2023 година поднесе жалба на изречената првостепена пресуда.
По оваа жалба расправаше Апелацискиот суд во април 2024 година, а при тоа донесе решение со кое наложи да има повторно судење за поранешните директори на тетовската болница Флорин Бесими и Артан Етеми, како и Јавната здравствена установа Клиничка болница Тетово како правен субјект. За докторот Бобан Вучевски, Апелацискиот суд ја одби жалбата на Обвинителството и ја потврди првостепената ослободителна пресуда за него.
На 26 јуни 2024 година беше закажано првото рочиште за повторното судење за двајцата директори, но беше одложено за 25 септември 2024 година поради отсуство на претставници на Клиничка болница Тетово.
Во првичната пресуда од 5 јуни 2023 година на обвинетите Флорин Бесими и Артан Етеми им беше утврдена казна затвор од по една година и шест месеци, условна осуда и утврдената казна затвор нема да се изврши доколку обвинетите секој за себе во време од по три години не сторат ново кривично дело. Правно лице требаше да плати парична казна во висина од еден милион денари, 30 дена по правосилност на пресудата.
На 8 септември 2023 година на двегодишнината беше одржан јавен марш и протест пред судот во Тетово во организација на семејствата на 14 луѓе кои ги изгубија животите во пожарот во тетовската модуларна. Семејствата организираа јавен марш и протест и на 15 септември 2023 година и во Скопје. Протестниот марш почна на плоштадот Скендербег и заврши пред зградата на Јавното обвинителство.
Македонија
Агелер по повод 8 Септември: Денес и секогаш, ја почитуваме вашата историја
Амбасадорката на Соединетите Американски Држави, Анџела Агелер упати честитка по повод Денот на независноста на земјава – 8 Септември.
Во видео обраќањето кое го објави Амбасадата на САД во Скопје, Агелер вели „на овој посебен ден се придружуваме на Северна Македонија и на сите вас во прославата на вашата независност и вашите динамични и разновидни заедници“.
Како и нашата независност, вашата беше тешко здобиена, со безброј жртви направени од оние кои верувале во моќта на слободата и демократијата. Денес и секогаш, ја почитуваме вашата историја, вашата сегашност и светла иднина, рече Агелер.
Македонија
Филипче за 8 Септември: Во овие три децении, Македонија ги зајакна своите институции
Денешниот 8 Септември и 33 години независност на нашата Македонија нѐ потсетуваат на силата, единството и храброста што ја имавме кога го избравме патот на суверенитет и самостојност, наведува во постот на Фејсбук лидерот на СДСМ, Венко Филипче.
Во изминатите 33 години, нашата татковина се изгради како независна, суверена држава, одлучна да го заземе своето место на европската и на светската сцена, потенцира тој.
-Овој пат не беше лесен и беше исполнет со предизвици, но и со многу достигнувања. Патот што го избравме пред три децении е потврда на нашата колективна волја за достоинство и просперитет. Во овие три децении, Македонија ги зајакна своите институции, ја обезбеди својата меѓународна позиција и создаде услови за економски и социјален напредок, вели Филипче.
Претседателот на СДСМ потенцира дека нашата држава денес се наоѓа пред многу искушенија, кои бараат од нас да покажеме уште поголема зрелост, сплотеност и одлучност.
-Во ова време на нови предизвици поврзани со понатамошниот пат по кој ќе се движи Македонија, време е нашата сила и способноста на нашите граѓани да ја искористиме за да ја надминеме секоја препрека што стои на патот кон подобро утре. Пред нас е одговорноста да ја продолжиме изградбата на општество каде што секој граѓанин ќе има еднакви можности, а нашата земја ќе биде пример за стабилност, толеранција и напредок. Честит 8 Септември!, стои во честитката на претседателот на СДСМ, Венко Филипче.