Македонија
(Видео) Форум за управување со интернет: Најголем непријател на лажните вести е вистината

На третиот Форум за управување со интернет, што денеска се одржа во Скопје, говореа министерот Роберт Поповски, задолжен за комуникации, отчетност и транспарентност, заменик-министерот за информатичко општество и администрација, Александар Бајдевски, и Марјан Забрчанец, посебен советник за односи со јавност на претседателот на Владата на Северна Македонија Зоран Заев.
Министерот Поповски во своето обраќање рече дека иако терминот управување подразбира дека управувањето со интернетот е одредена рамка на правила, управувањето со интернет мора да се погрижи интернетот да остане глобален, отворен и слободен простор и простор каде што луѓето уживаат исти права и имаат ист степен на заштита.
„Во нашата земја, која не многу одамна имаше сериозни проблеми со слободата заради репресивните политики во сферата на медиумите и слободата на изразувањето, интернетот беше единственото место за слободоумната мисла. Затоа, наша обврска е да ги направиме можностите на интернет отворени за сите: со намалувањето или целосното укинување на дигиталниот јаз, со гаранции за еднаков пристап и со овозможување на придобивките од мрежата да им припаѓаат на сите. Без исклучок. Во таа насока на Форумот за управување со интернетот – Македонија гледам како на точка од која на креирањето на нашата визија ќе ѝ посветиме поизострен фокус и поголема енергија со колку што е можно пошироката инклузивност на сите засегнати страни. Интернет-просторот им припаѓа на сите. Ниту една страна нема ниту може да има ексклузивно право во оваа сфера“, рече министерот Поповски во своето обраќање.
Посебен акцент на овој настан министерот Поповски стави на справувањето со манипулативната пропаганда на интернет како мрежа преку која изворите на лажните вести се пуштени на максимум.
Како една од мерките за борба против лажните вести од планот за одлучна акција против ширењето на лажните вести на Владата на Северна Македонија, ја издвои медиумската писменост која ќе биде многу позастапена во образованието и дека во еден процес на активно партнерство со граѓанскиот сектор ќе се спроведат програми и тренинзи за медиумска писменост и за вработените во државната администрација.
Заменик-министерот за информатичко општество и администрација, Александар Бајдевски, во дел од своето обраќање се задржа на имплементацијата на 5Г во Република Северна Македонија за значителен пораст на квалитетот на интернетот за корисниците, за поголема сигурност и за проширување на бројот на понудени услуги за граѓаните.
„Клучната мерка за поддршка на Националниот оперативен бродбенд-план е создавањето јавна оптичка мрежа, која главниот фокус го става на максимизирање на поволностите од имплементацијата на 5Г, вклучително и развојот на економскиот пазар преку поддршка и развој на нови услуги во разни вертикални сегменти на пазарот“, истакна заменик-министерот за информатичко општество и администрација, Александар Бајдевски.
Во делот на панелот на Форумот за управување со интернетот посветен на темата „Mедиуми – медиумска писменост, регулација – саморегулација – борба против дезинформации“, Марјан Забрчанец, посебен советник за односи со јавност на претседателот на Владата, Заев, истакна дека Владата тргнува од својата програмска и стратешка определба за објективно и транспарентно информирање за своето работење и дека следејќи ги овие принципи, од последна во регионот, денеска е лидер по транспарентно работење и информирање на јавноста за своите политики.
„Најголем непријател на лагата е вистината и затоа напорите и политиките на сите засегнати страни треба да одат во насока на обезбедување канали за ширење на вистината. Треба да го поттикнуваме сомнежот и да создаваме критички настроена јавност која ќе има капацитети да ги препознава лагите и да ја шири вистината. Најважно е да се прашаме што можеме сите ние да направиме во борбата против лажните вести и дезинформации, сите засегнати од овој феномен, за да се справиме со оваа појава, која сериозно ги поткопува демократските вредности, ги поттикнува омразата и конфликтите. Медиумската писменост е само една од мерките и за таа цел веќе е поведена иницијатива со граѓанскиот сектор, кој има одлично искуство во оваа сфера, и со институциите на Владата, пред сè, Министерството за образование и наука и Бирото за развој на образованието, да се исцртаат контурите за најдобар, применлив и одржлив модел за медиумска писменост во образованиот процес“, информира Забрчанец и додаде дека во делот на соработката со медиумите на овој план Владата целосно ќе ја поддржува саморегулацијата како методологија според која медиумите самите ќе понудат решенија според професионалните кодекси и стандарди и во таа насока истакна дека од особен придонес е листата на медиуми, кои се придржуваат до овие начела што ја подготвуваат Советот за етика во медиумите и Здружението на новинарите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Билатералните прашања да останат билатерални, а не пречка за ЕУ, рече австриската министерка која е во посета на земјата

На покана на министерот за надворешни работи и надворешна трговија, Тимчо Муцунски, денес во официјална посета на земјава престојува министерката за европски и меѓународни работи на Република Австрија, Беате Мајнл-Рајсингер. Ова е прва нејзина посета на Скопје по преземањето на функцијата на 3 март годинава.
Главен фокус на разговорите беше ставен на натамошното унапредување на билатералните односи и реафирмирањето на австриската поддршка за евроинтегративниот процес на државата. Беше заеднички констатирано дека односите меѓу двете земји се одлични – политички стабилни, економски силни и исполнети со заемна почит и доверба.
Посебен акцент беше ставен на економската соработка. Министерот Муцунски ја истакна улогата на Австрија како најголем странски инвеститор и нејзиниот значаен придонес за економскиот развој. Во таа насока, ја потврди подготвеноста на Министерството и Владата активно да придонесуваат кон зголемување на трговската размена, промоција на нови соработки и привлекување австриски инвестиции, особено во областите на инфраструктурата, туризмот и енергетиката.
„Односите меѓу нашите две земји се одлични – политички стабилни, економски силни и исполнети со доверба и заемна поддршка. Австрија е најголем странски инвеститор во нашата држава, што зборува за длабочината на економската соработка и довербата во нашите институции. Особено ја цениме принципиелната и континуирана поддршка што Австрија ја дава на европската перспектива на нашата држава и на целиот регион. Како носител на групата земји „Пријатели на Западен Балкан“, Австрија игра клучна улога во држењето на проширувањето високо на агендата на ЕУ“, истакна министерот Муцунски во обраќањето пред медиумите.
Значаен дел од разговорите беше посветен на евроинтегративниот процес, при што министерот Муцунски се заблагодари за континуираната и гласна поддршка од страна на Австрија. Соговорниците се согласија дека проширувањето на Европската Унија претставува геополитичка неопходност за безбедноста и стабилноста на континентот.
Министерката Мајнл-Рајсингер, во рамки на заедничката прес-конференција, подвлече дека земјата е важен дел од Европа и дека Австрија силно ја поддржува нејзината европска перспектива.
„Гледаме колку е направено од ваша страна и колку отстапки сте направиле. Поминаа 20 години од почетокот на овој пат, и сега сме должни билатералните прашања да останат билатерални, а не да стануваат пречка во процесот“, истакна таа.
На средбата oд страна на министерот Муцунски беше изразена благодарност за австриската помош и солидарност по трагичниот настан во Кочани, кога повредените беа згрижени во болници во Виена и Грац – гест што уште еднаш го потврдува пријателството и блискоста меѓу народите на двете земји.
Министрите разменија мислења и за актуелните меѓународни случувања, при што заеднички констатираа дека во време на глобални предизвици е неопходна силна координација меѓу партнерите. Потврдија дека двете држави стојат заедно на страната на мирот, почитта кон меѓународното јавно право и одбраната на основните демократски вредности.
Македонија
Муртезани на балканскиот економски самит во Скопје: Македонија нуди стабилност, пазарна предвидливост и европска перспектива

Овој Самит претставува уште една потврда на силните и пријателски врски кои ги поврзуваат Република Северна Македонија и Република Турција. Овие односи, кои се длабоко вкоренети во нашата заедничка историја и култура, денес се манифестираат преку интензивна соработка во многу области, вклучувајќи ја и економијата, истакна министерот за европски прашања, Орхан Муртезани.
„Односите помеѓу Северна Македонија и Турција се искрени, динамични, стратешки и ориентирани кон иднината. Не станува збор само за добри односи, туку за заедничко разбирање на регионалниот контекст, за заемна поддршка во клучни моменти и за координирани чекори во иницијативите од заемен интерес. Нашата билатерална соработка опфаќа широк спектар: од висока политика и одбрана, преку економија и трговија, до образование и културна размена. Турција е еден од најзначајните странски партнери во економскиот развој на нашата земја, но уште поважно, таа е партнер кој вложува долгорочен интерес во стабилноста и напредокот на целиот регион“.
Во време кога глобалната економија се соочува со непредвидливи предизвици, според него настани како денешниот Самит имаат посебна тежина.
„Тие се можност не само за анализа, туку и за поставување конкретни цели. За нас, продлабочувањето на економската соработка со Турција, особено во делот на инвестиции, дигитална економија, зелени технологии и инфраструктурно поврзување, е од клучно значење. Веруваме во принципот на меѓусебна комплементарност, не како реторика, туку како модел за конкретни резултати. Северна Македонија нуди стабилност, пазарна предвидливост и европска перспектива. Турција пак од друга страна, носи искуство, капитал и регионална мрежа. Оваа комбинација е наша заедничка шанса и таа треба да биде искористена“.
Додаде дека тие како министерство се посветени на креирање на поволна бизнис клима и на унапредување на европските стандарди во нашата економија.
„Работиме на подобрување на регулаторната рамка, намалување на бирократијата и обезбедување транспарентност и предвидливост за инвеститорите. Северна Македонија е цврсто на патот кон европската интеграција, а економската соработка и странските инвестиции се клучни за постигнување на оваа стратешка цел“, нагласи Муртезани.
Македонија
Ексдиректорите осудени на една година и шест месеци затвор за пожарот во модуларната болница во Тетово

Ексдиректорите на Клиничката болница во Тетово, Флорин Бесими и Артан Етеми, се осудени на 1 година и 6 месеци затвор за пожарот во модуларната болница.
Болницата ќе треба да плати 1 милион денари.
Ова е втора пресуда за случајот, откако во првата беше досудена условна казна за директорите Бесими и Етеми која беше поништена од Апелациониот суд во Гостивар. Обвинителството повторно побара затвор, нагласувајќи ја одговорноста на директорите за непочитување на противпожарните прописи.
Пожарот во модуларната болница се случи на на 8 септемврри 2021 година при што животот го загубија 14 луѓе.