Стабилна е безбедносната состојба на подрачјето на општините Дебар и Центар Жупа, каде е прогласена кризна состојба поради бројот на заболени од коронавирус, соопшти Министерството за внатрешни работи.

Полицијата во изминатово деноноќие нема регистрирано собирања на граѓани на јавни места, нема нарушувања на јавниот ред и мир и нема регистрирани сообраќајни незгоди. Непречено се одвива процесот на извлекување на лицата кои во изминативе 14 дена беа во самоизолација а денеска, од Дебар ќе биде извршен спровод на две лица.

На терен, без проблем се одвиваат активностите кон лицата што се ставени под мерки за самоизолација, здравствен надзор и домашна изолација.

Изминатово деноноќие, во периодот од вчера во 07 часот до 07 часот денеска, едно лице од Дебар не ја почитувало забраната за движење за време на спроведување на мерките за ограничено движење и заштита на граѓаните од ширење на коронавирус.

Извршени се 29 контроли на евидентираните лица со решение за изолација, а спроведени се 107 контроли врз лицата во самоизолација.

Во општините Дебар и Центар Жупа успешно се спроведуваат мерките за контрола при влез на патнички и други моторни возила, како и активностите за дотурот на храна, лекови, средства за лична хигиена и други потреби за граѓаните во двете општини. Сите правни лица кои вршат дотур треба да се најават во Кризниот штаб на фиксниот телефон 046/831 051 по што, нивните возила со полициска придружба ќе бидат спроведени до соодветните трговски објекти.

МВР потсетува дека влезот е дозволен само на лица кои се жители на општините, а истовремено е оневозможен, односно строго е забранет излезот на сите граѓани затекнати на подрачјето на двете општини.

„Упатуваме апел до граѓаните, строго да ја почитуваат одлука на Владата за забрана на движењето од 21.00 до 05.00 часот секој ден, како и дисциплинирано да се придржуваат до сите останати препорачани мерки и насоки во врска со спречувањето на ширењето на корона вирусот (COVID-19), а сите правни и физички лица строго да се придржуваат до насоките на полициските службеници“, велат од МВР.

Граѓаните, на бесплатниот телефонски број 08 0000 201 или на 192, можат да ги пријавуваат сите случаи на лица кои ги прекршуваат одредбите за задолжителна 14-дневна самоизолација. Сите оние кои ги прекршуваат дадените препораки, ќе бидат санкционирани согласно член 205 и 206 од Кривичниот законик.

Под влијание на влажен и студен воздушен бран во среда, 1 април, ќе има врнежи од дожд, а на планините врнежи од снег, информира УХМР.

На места врнежите ќе имаат обилен карактер, над 25 литри на метар квадратен.

Поради заладувањето и спуштање на дневните температури од 10 до 15 степени врнежи од снег ќе има и во некои пониски места, каде што ќе се формира снежна покривка.

Минималните температури во четврток (02.04) и петок (03.04) на повеќе места ќе бидат под нулата.

Во НАТО командата во Норфолк, САД, денеска со почеток во 14.45 часот по наше време, ќе се одржи церемонија на кревање на нашето државно знаме, по повод членството во НАТО.

Во исто време знамето ќе биде кренато и во седиштето на НАТО во Брисел и во главната команда во Монс.

На настанот нема да присуствуваат македонски државници поради состојбата со коронавирусот,  а настанот ќе се пренесува во живо на следните линкови: youtu.be/a6BWeVQqSXM и www.act.nato.int.

Северна Македонија од петокот, 27 март, официјално е членка на Алијансата откако тогаш САД го примија инструментот за пристапување на Република Северна Македонија во Северноатлантскиот договор.