Македонија
(Видео) Шилегов најави градежна офанзива ова лето

Град Скопје почнува градежна офанзива за изградба и реконструкција на градските сообраќајници во вредност од 760 милиони денари во тековната и наредната година, најави градоначалникот Петре Шилегов на денешната прес-конференција.
„Светската пандемија на коронавирусот нема да ги запре инфраструктурните градежни активности што се во надлежност на Град Скопје, туку, напротив, тие ќе продолжат со исто или засилено темпо. Ова го правиме од една здраворазумска и хумана причина за која зборував на почетокот на овој месец. Во изминатите две години Град Скопје покажа одлични финансиски резултати. Советот две години по ред усвојува завршни сметки од кои јасно се гледа дека буџетот е на стабилни нозе и дека може да ги исполни своите цели. Ваквите финансиски резултати овозможуваат Град Скопје да нема рестрикции во планираната изградба и реконструкција на градската инфраструктура, притоа откажувајќи се од дел од средствата од најголемите свои приходи – комуналиите, комуналните такси, закупот на јавен простор и слично. Ова го правиме со цел да ослободиме повеќе пари во економијата инвестирајќи најмногу во домашниот градежен сектор, кој е одговорен за голем број вработени и учествува со сериозен дел во БДП на Република Северна Македонија. Сакаме да ги сочуваме сите работни места во десетиците стопански гранки што ги обединува градежништвото“, рече Шилегов.
Тој додаде дека Град Скопје ќе продолжи со интензивна изградба и реконструкција на градските сообраќајници, односно до крајот на 2020 година ќе бидат завршени тендерските постапки и ќе се почне со изградба и реконструкција на следните сообраќајници:
– изградба и реконструкција на дел од булеварот Митрополит Теодосиј Гологанов, кај Клубот на пратениците;
– изградба и реконструкција на улицата Македонско-косовска бригада – фазна реализација;
– изградба и реконструкција на булеварот Никола Карев (фазна реализација – до Момин Поток);
– изградба на улицата Есенинова и подземни бунари со линиски системи;
– реконструкција на булеварот Александар Македонски (фазна реализација, од улицата 16. Македонска бригада до излезот на Скопје);
– реконструкција на булеварот Киро Глигоров (фазна реализација);
– реконструкција на булеварот Видое Смилевски – Бато (фазна реализација, од булеварот Јане Сандански до улицата Февруарски поход);
– реконструкција на улицата 11 Октомври, од раскрсницата со булеварот Кочо Рацин до раскрсницата со улицата Филип Втори Македонски;
– реконструкција на улицата Востаничка;
– реконструкција на улицата Васил Ѓоргов (од улицата Франклин Рузвелт до булеварот Мајка Тереза);
– реконструкција на улицата Никола Парапунов;
– реконструкција на улицата Никола Карев, од раскрсницата со булеварот Трета македонска бригада до раскрсницата со булеварот Кузман Јосифовски – Питу;
– реконструкција на булеварот 8 Септември (од булеварот Илинден до улицата Скупи)
– реконструкција на улицата Џон Кенеди (од улицата Македонско-косовска бригада до булеварот Христијан Тодоровски – Карпош);
– реконструкција на улицата Лазар Личеновски – фаза 2;
– реконструкција на улицата Благоја Стефковски (фазна реализација – трета фаза).
Шилегов нагласи дека Град Скопје продолжува да гради со засилено темпо, со рекордно кратки рокови и во сите 10 скопски општини – следната недела ќе биде пуштен во употреба булеварот Христијан Тодоровски – Карпош, интензивно се работи на втората фаза од реконструкцијата на улицата Индира Ганди и на првата фаза од булеварот Босна и Херцеговина, а наредната недела се очекува да почне и втората фаза од изградбата на овој булевар.
„Очекувам да биде пуштен во употреба булеварот АСНОМ во првата фаза, а наредната година очекувам да го пуштиме во употреба и мостот преку Вардар. Годинава очекувам да почнат градежни активности на големата раскрсница кај Момин Поток и на мостот во Карпош 4, да почнат градежни работи на продолжението на булеварот Борис Трајковски и да ја почнеме третата фаза на булеварот АСНОМ низ Ќерамидница. Развојот на сообраќајната инфраструктура во нашиот град не смее да запре. Скопје ќе продолжи да ја развива својата улична мрежа истовремено со мрежите на велосипедски и пешачки патеки за да обезбедиме одржлива урбана мобилност, која подразбира безбеден и ефикасен сообраќај за нашите граѓани. На тој начин директно ќе придонесеме за намалување на економската криза не само во нашиот град туку и во целата држава. Ова го правиме за доброто на сите нас. Кризата ќе помине, животот продолжува. Чекор по чекор градот ќе продолжи да се развива“, рече Шилегов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Хуманитарен музички настан на Споменикот на слободата во Кочани

На први и втори август ќе се одржи хуманитарен музички настан Расплет фестивал, на Споменикот на слободата во Кочани, организиран од млади луѓе меѓу кои и бендот Корка од Кочани.
Главна цел на настанот е да се подигне свеста дека донациите не треба да се намалат и дека се потребни исто како уште првите денови на формирањето на Support Kocani.
„Донациите стивнуваат. Ние сме овде да ве потсетеме дека донациите не смеат да запрат, бидејќи им се најпотребни на повредените кои чекаат за нив, од кои некои директно се вклучени во фестивалот за нивна повторна социјализација. Причината за дводневното времетраење е за да може да се привлече поголемо внимание кон Кочани и сите засегнати од трагедијата и да се собере што можно поголем број на донации. Вториот дел од настанот (сабота 02/08/2025) ќе започне покасно, да се остави простор на мировниот марш, кои ние со сè срце го подржуваме, учествуваме и повикуваме луѓе да земаат учество и надвор од Кочани“, велат организаторите.
Тие наведуваат дека целиот настан е посветен нa Сара Јорданова, нивна драга пријателка и соученичка која го загуби својот живот во пожарот, но и кон сите други засегнати.
На сцената ќе настапат артисти како Хајка, Taxi Consillium, Корка, Алембик, Јаблан, Don Playa, Луфтанза, Соба Глувих, Големата Вода, Mallard и DJ Gianni.
Македонија
Во Тетово ќе се гради Меморијален парк за жртвите од пожарот во модуларната болница

Министерот за здравство, Азир Алиу, заедно со вицепремиерот за политики и добро владеење, Арбен Фетаи, повеќе пратеници и со семејствата на настраданите во пожарот во модуларната болница, денес положија цвеќе на местото каде ќе биде изграден меморијалниот парк за жртвите од пожарот во модуларната болница.
„Денес не почнуваме само со изградба на парк. Започнуваме изградба на колективна меморија. Задоцнета, но неопходна. Пред четири години на ова место се случи трагедија, која не смее да се заборави, но институциите четири години молчеа. Не презедоа ништо, избраа да не гледаат, а тоа молчење беше неправда за тие што ги изгубија животите и за сите тие што секојдневно ја бараат правдата. Овој проект не е за сликање. Овој парк не е украс. Тој е задоцнет одговор што системот требаше да го даде одамна, но денес конечно започнуваме и тоа почнуваме поинаку“, истакна во своето обраќање министерот за здравство, Азир Алиу.
Тој појасни дека овој проект е почнат само неколку недели по преземањето на функцијата министер за здравство во насока на одговорност и потенцира дека меморијалниот парк нема да има прави патеки, бидејќи ни животот не бил правичен за овие луѓе.
„Архитектурата ја следи филозофијата на прекината рамка, свиени патеки, дрвја што создава сенка за размислување и рефлексија, симболичен центар за да се памети и да се вети дека ова нема да се повтори повеќе. Немаме луксуз да заборавиме и немаме веќе право да доцниме. Овој парк е повеќе од простор. Тој е културен пресврт, јасна одлука против молчењето покана за размислување и ветување дека институциите мора да бидат блиску до граѓаните. Не само по трагедиите, туку и пред нив. Ние се сеќаваме дејствуваме и градини систем што не заборава“, истакна Алиу.
Македонија
ВМРО-ДПМНЕ: Министерството за спорт не ја најмило фирмата, туку МОК

Харикири пресовите на СДС се одраз на нивната безидејност и насоченоста да си го штитат криминалот и одвлекуваат внимание, Министерството за спорт не ја најмило фирмата туку МОК, реагира ВМРО-ДПМНЕ на обвинувањата од СДСМ.
„Жалиме што СДС пушта низ вода кадри кои излегуваат на пресови како политички камикази.
Очигледно Спасов, кој го води пи-арот на СДС, потребно е да добие отказ после ваквите катастрофални утки.
Споменатата агенција, ,,Идеа лаб“, не е ангажирана од Министерството за спорт туку од Македонскиот олимписки комитет, кој нема допирна точка со Владата. Од друга страна ,,Идеа лаб“, како агенција имала соработка со институции и под контрола на владите на СДС, како што е ,,Преспа форум“, и во периоди кога Владата ја воделе други партии.
За разлика од агенцијата ,,Рејтинг“ на Никола Спасов, која го води пи-арот на СДС, и исклучиво работи кога СДС е на власт, со владините институции.
Ваквите харикири пресови на СДС се одраз на тоталната безидејност и нивната насочесност да си го штитат криминалот и одвлекуваат вниманието“, се вели во реакцијата.