Македонија
(Видео) Штерјев: Денеска сум гостин, нема да ви одговорам дали ќе поднесам оставка
На денешниот настан организиран по повод Денот на првавосудството, меѓу присутните беа и американскиот амбасадор во Македoнија, Џес Бејли, и претседателот на Советот на јавните обвинители, Коле Штерјев. Тие не се поздравија, но заедно ја проследија свеченоста. На настанот што беше организиран во февруари, Џес Бејли го искритикува токму Штерјев за судир на интереси и непотизам при изборот на јавни обвинители во Обвинителството за организиран криминал и корупција.
Тогаш Бејли рече дека еден од членовите на Советот учествувал во донесувањето спорна одлука и случај каде што еден јавен обвинител, член на Советот, гласал за одлука на член на семејството на друг член на Советот.
Откако „Макфакс“ минатата недела се обиде да го добие и телефонски и преку СМС-порака Штерјев, тој не одговари на повиците и ги игнорираше прашањата. Денеска на настанот рече дека не сака да даде изјава зашто веќе се произнел за тоа.
„Немојте да ме молите. Не е в ред. Денеска има настан Здружението на судии. Дадоа луѓето изјави, кажаа што имаа, јас навистина немам што да кажам по тој повод. Денеска сум дојден како гостин“. На прашањето дали ќе поднесе оставка за спорниот избор на обвинители, тој рече дека веќе одговорил на прашањето.
„Макфакс“ објави дека обвинителка гласала кога како точка на дневен ред бил изборот на нејзината колешка Лидија Раичевиќ, која, пак, кривично го гони нејзиниот сопруг за перење пари во случајот од 2017 година со НЛБ банка во Скопје, како и со предметот „Банки“, во кој се вклучени неколку големи македонски банки со креирање лажни шеми на должничко-доверителски односи.
Претходно, медиумите објавија дека претседателот на Советот гласал за да биде избрана неговата внука за обвинител во Обвинителството за организиран криминал и корупција. За овие 2 предмета се заинтересира и Државната комисија за спречување корупција. Како што објави „Макфакс“ , во едниот од рефератите е констатирано дека постои судир на интереси.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Делови од Бутел, Ѓорче Петров и Аеродром денеска без струја
Од ЕВН Македонија АД известуваат дека поради зафати во електродистрибутивната мрежа, денеска без електрична енергија ќе останат:
· од 08:30 до 14:00 часот, корисниците од ул. бр. 2 во с. Љубанци. (Општина Бутел)
· од 08:30 до 15:00 часот, корисниците од ул. бр. 101 во нас. Волково. (Општина Ѓорче Петров)
· од 09:00 до 12:00 часот, корисниците од улиците со бр. 1 и бр. 9 во с. Долно Лисиче. (Општина Аеродром)
Македонија
Променливо облачно со сончеви периоди, кон крајот на денот локални врнежи од дожд
Променливо облачно со сончеви периоди. Кон крајот на денот и во текот на ноќта ќе има локални врнежи од дожд, а на планините и на повисоките места претежно во западните и северните делови од снег. Ќе дува слаб до умерен северозападен, а наместа во западните делови повремено засилен западен ветер. Минималната температура ќе биде во интервал од 1 до 5, а максималната ќе достигне од 8 до 14 степени.
Во Скопје, променливо облачно со сончеви периоди. Кон крајот на денот ќе има повремен дожд. Ќе дува слаб до умерен променлив ветер. Минималната температура ќе се спушти до 3, а максималната ќе достигне до 11 степени.
Времето во наредните денови
Во вторник ќе има заладување со нови пообилни врнежи кои на планините и на повисоките места ќе бидат од снег. На планините ќе се зголеми висината на снежната покривка, а нова се очекува да се формира и во некои од повисоките места. Потоа во следните два дена ќе се задржи претежно стабилно време, а во петок повторно ќе има врнежи од дожд и снег.
Македонија
30 домови во скопската општина Сарај се под вода по обилните дождови
Повеќе од 30 домови во скопската општина Сарај се поплавени, теренските екипи интензивно интервенираат
Градоначалникот Мухамед Елмази објави дека во кризниот штаб се ангажирани Дирекцијата за заштита и спасување, Центарот за управување со кризи, противпожарните единици од Тетово, Противпожарната бригада на Градот Скопје, екипи од Општина Ѓорче Петров, НПК Сарај, како и полициската единица Сарај.
„Искрено им се заблагодаруваме на сите институции и тимови за нивниот професионален, посветен и солиден ангажман во справувањето со оваа ситуација.
За време на состанокот беа дискутирани понатамошните чекори што треба да се преземат за целосно санирање на последиците, поддршка на погодените семејства и превентивни мерки за избегнување слични ситуации во иднина.
Надлежните институции и служби остануваат во целосна готовност и ќе продолжиме да ги информираме граѓаните за сите нови случувања“, објави Елмази.

