Со прифаќањето на капитулантскиот договор со соседна Грција, СДСМ и нанесе огромна политичка штета на Република Македонија, а со криминалното, коруптивното и дилетантското работење во економските ресори, земјата е клекната на колена и на финансиски план, рече денеска на прес-конференција Орце Ѓорѓиевски, член на ИК на ВМРО-ДПМНЕ.

Тој истакна и дека со комплетната партизација на Министерството за внатрешни работи, Македонија се доведува во опасност и на безбедносен план.

„Оливер Спасовски и СДСМ директно удираат врз професионалноста на полицијата. Пред неполни месец дена лажеа дека не се подготвува чистка во специјалните единици, а сега ја манипулираат јавноста дека тоа било согласно потребите на службата. Десетици обучени специјалци се прераспоредени на позиции на кои не се неопходни нивните вештини. Обуката за секој од нив чини десетици илјади евра, а сега Спасовски и СДСМ го отфрлаат сето она што е инвестирано во овие професионалци изминатите години“, кажа Ѓорѓиевски.

Покрај тоа, на денешната прес-конференција, тој, изнесе и некои податоци за партиските сознанија во однос на тоа како СДСМ работи во останатите организациски единици во Министерството.

„Откако ги деградираа и шиканираа десетици професионални припадници на единицата ‘Тигар’, сега тоа го продолжуваат и на ниво на Секторите за внатрешни работи. Според документи до кои дојдовме, Министерството за внатрешни работи кое го води Оливер Спасовски со притисоци и заплашувања изнудува доброволни согласности на припадниците на полицијата да бидат прераспределувани на други позиции кои се за неколку нивоа подолу во хиерархијата. Да биде апсурдот поголем, МВР се повикува на член на законот кој не го регулира прераспоредувањето на работниците, туку ја регулира нивната обука. Доколку полициските службеници не ја прифатат оваа понуда, следуваат закани со откази за нив“, појасни членот на ИК на ВМРО-ДПМНЕ.

Ѓорѓиевски посочи дека министерот за внатрешни работи надвор од законите и системот на кариера инсталира партиска полиција која треба да биде во коалиција со криминалот на оваа власт и да ги штити нив од незадоволството на народот.

„Ова што Оливер Спасовски го прави нема за цел да го подобри квалитетот на полицијата. Ова нема цел да ја подобри безбедноста на граѓаните, туку напротив брутално да ја партизира и да ја претвори во агенција за обезбедување на криминалниот картел на власт. МВР се претвори за паричка за поткусурување на коалициските договори, за задоволување на каприците на партиски послушници и создавање на послушна структура која ќе мижи пред криминалот на власта, а ќе фрла солзавец, гумени куршуми и шок бомби врз нашите граѓани“, беше речено на прес-конференцијата на опозициската партија.

Ѓорѓиевски додаде дека специјалците, полициските службеници, административците се под постојан притисок од оваа власт да не работат професионално, да прифаќаат уназадувања во кариерата или во спротивно да добијат отказ.

„Ова мора да престане. Овие нелегални одлуки ќе бидат преиспитани и за ваквиот притисок врз професионалците во МВР и за сите останати притисоци некој ќе сноси одговорност кога ќе ја вратиме назад правната држава“, рече членот на ИК на ВМРО-ДПМНЕ и ги охрабри сите професионалци во полицијата да ги документираат ваквите незаконски дејствија и доколку им е потребна било каква правна помош да се обратат до опозициската партија.