СДСМ информира дека започнале сериозни, темелни преговори со претседатели и високи претставници на политички партии кои се дел од новиот собраниски состав, за нов четиригодишен полн мандат на стабилно мнозинство во парламентот и формирање посветена Влада, чија задача ќе биде и да спроведе сериозна реформа на јавната администрација.

„Реформата ќе донесе ефикасно служење на потребите на граѓаните, но и промена со која обемот на администрацијата ќе се намали за 20%. Предвиден е помал број министри и рационализација на јавните служби, кои истовремено ќе обезбедуваат поголем број и побрзи услуги за граѓаните.

Администрацијата мора да им служи, а не да им биде товар на граѓаните и затоа во администрација ќе работат тие што се подготвени да им служат на граѓаните“, информира партијата.

Според нив, дел од реформата на администрацијата е укинувањето на патните трошоци за пратениците во Собранието, бидејќи покажа можност за злоупотреби и сериозно ја намали довербата на граѓаните во своите претставници.

„Граѓаните ни ја дадоа довербата, бидејќи знаат дека во наредните четири години ќе работиме уште повеќе и уште подобро“, се вели во соопштението.

Пандемијата на Ковид-19 ја реафирмираше итната потреба од брзи, делотворни и стратешки информации за епидемиите и здравјето, како и потребата од колаборативни механизми што ќе можат да им помогнат на субјектите што работат во полето на јавното здравје во Северна Македонија.

Министерството за здравство и Институтот за јавно здравје на Северна Македонија го отвораат новиот Центар за дејствување во услови на епидемии и други јавно-здравствени вонредни ситуации во Скопје. Овој центар ќе обезбедува централизирани информации во реално време, следење на состојбите, известување и совети за тоа како да се постапува во случаи на настани и вонредни состојби поврзани со јавното здравје.

Обединувајќи ја на едно место епидемиолошката стручност од Институтот за јавно здравје, Центарот ќе нуди дигитални решенија за еден систем на рано предупредување со цел навремено известување и детектирање на настани поврзани со јавното здравје. Исто така, Центарот ќе ги подобри надзорот и координацијата меѓу епидемиолозите, лабораторискиот кадар и експертите за јавно здравје од десетте центри за јавно здравје и 21 подрачна единица во Северна Македонија.

„Ѝ честитам на Северна Македонија за нејзината посветеност кон јакнењето на капацитетите на јавното здравство за борба со Ковид-19. Овој нов центар е пионерски пример за тоа како СЗО може, во партнерство со националните надлежни органи, да ја зацврстува здравствената сигурност и да собира што повеќе информации релевантни за јавното здравје кои се потребни не само за борба со актуелната пандемија туку и за идните вонредни состојби што може да се случат во годините пред нас”, изјави д-р Ханс Клуге, регионален директор на СЗО за Европа.

СЗО помага околу операционализацијата на Центарот, така што обезбедува технички насоки и еден експерт за јавно здравје кој ќе биде составен дел од националниот тим. Оваа поддршка ја овозможи организацијата USAID која обезбеди неповратна помош за оваа намена. Заедничката надворешна евалуација на подготвеноста на Северна Македонија и на нејзиниот капацитет за одговор на здравствени вонредни состојби, спроведена минатата година, препорача основање на еден ваков центар. Центарот ќе придонесе кон изградбата на националниот систем за одговор на здравствени вонредни состојби и кон исполнување на обврските од Меѓународниот здравствен правилник (МЗП, од 2005 година).

На отварање на Центарот министер за здравство на Северна, доц. д-р Венко Филипче, ѝ се заблагодари на СЗО за континуираната поддршка во борбата со Ковид-19.

„Овој центар за дејствување при здравствени вонредни состојби ќе биде од критична важност за подготвеноста и реакцијата на државата. За време на епидемии, Центарот ќе работи нон-стоп, т.е. 24/7, 365 дена годишно, така што ќе дава поддршка при носење одлуки, тековно работење, поврзување, информирање на населението за ризиците, (пре)распоредување на персонал, колкав број вработени се потребни, логистика и планирање”, изјави министерот Филипче.

За време на настанот, д-р Џихан Тавилах, претставничка на СЗО во Северна Македонија, се осврна на тоа како соработката на СЗО со Министерството за здравство во овој заеднички потфат би можело да ги информира другите земји од Западниот Балкан за тоа како да ги зголемат институционалните капацитети во делот на здравствената сигурност и собирањето информации релевантни за јавното здравје.

Обилните врнежи од дожд во Битолско предизвикаа поплава на јагленовите откопни полиња во рудникот „Суводол“ на РЕК „Битола“. Ископот и транспортот на јаглен во моментот се во прекин и се вложуваат натчовечки напори за санирање на состојбите. На терен e и генералниот директор на АД ЕСМ, Васко Ковачевски, заедно со директорот на РЕК „Битола“, Златко Ќурчиевски, како и комплетното раководство на комбинатот и стручните служби на РЕК „Битола“. Според вработените, ваква елементарна непогода, со интензивни и обилни врнежи од дожд, во рудникот „Суводол“ не е забележана во последните 20 години.

За состојбите во рудникот „Суводол“ на РЕК „Битола“ известени се Владата, како и Центарот за управување со кризи, Дирекцијата за заштита и спасување, Армијата преку Министерството за одбрана. Сите тие ги ставија своите ресурси на располагање за интервенција доколку има потреба.

И покрај елементарната непогода со која се соочува РЕК „Битола“, континуираното производство на електрична енергија од комбинатот засега не е е доведено во прашање и тоа продолжува во согласност со планот и потребите на електроенергетскиот систем.

Слична е состојбата и во рудникот „Брод Гнеотино“, каде што во моментот се копа кровна јаловина. Се преземаат напори и таму да се санираат штетите за да се подготви рудникот за дисконтинуиран ископ на јаглен на почетокот на септември со цел да се добијат потребните колични за грејната сезона 2020/2021 година.

Ова е трета поплава на рудникот „Суводол“ во РЕК „Битола“ во рок од два месеца. Во сите активности што се преземаат за санација на последиците од обилните дождови приоритет останува безбедноста на вработените, а потоа и опремата.