Генералниот секретар на ВМРО-ДПМНЕ, Игор Јанушев, истакна дека е скандалозно тоа што Талат Џафери во име на Собранието во текот на вчерашниот ден одби да номинира набљудувачи што ќе го следат референдумскиот процес.

„Власта со ваквите чекори фрла огромна црна сенка врз декларативните заложби за фер и демократско изјаснување на граѓаните на претстојниот референдум. Имено, ДИК во согласност со законот испрати барање до Собранието на Република Македонија да номинира набљудувачи што ќе го следат референдумот за што пратеничката група на ВМРО-ДПМНЕ официјално побара од Џафери да номинира набљудувачи“, рече Јанушев.

На прес-конференција тој истакна дека Џафери и покрај намерата на ВМРО-ДПМНЕ, испрати известување до ДИК дека Собранието нема да номинира набљудувачи.

„Собранието, кое е овластен предлагач и орган што го почна самиот процес на референдумот, вчера со одлука на Талат Џафери се стави надвор од можноста да врши контрола на законитоста на целиот процес и остави простор за секакви сомнежи во исходот. Ако Џафери и мнозинството не ги интересира ова прашање, тогаш што е нивниот приоритет“, праша Јанушев.

Тој додаде дека набљудувачите се гаранција за законитоста на референдумот, а со овој чекор на Џафери се отвора огромен сомнеж за намерите на власта да организира законско и демократско референдумско изјаснување. Оттука, ВМРО-ДПМНЕ бара од ДИК во најкус можен рок – уште на денешната седница, да изврши измена во Правилникот за начинот и постапката за решавање приговори за референдумот.

„Бараме со измените да се овозможи набљудувачи да присуствуваат при целокупниот процес на референдумското изјаснување, вклучително и сумирањето и утврдувањето на резултатите. Очекуваме со измените да се даде можност и за пишување соодветни приговори, без ограничувања, што ги има во моментот во согласност со член, 4 став 3 од истиот правилник“, додаде Јанушев.