Македонија
Владата од утре ќе ги укине препораките за граѓаните поради загадениот воздух

Присуството на штетните ПМ10 честички вчера бил под прагот од 188 микрограми на метар кубен во Скопје, Битола, Гостивар и Тетово и поради тоа Владата од утре ќе ги укине мерките и препораките кои важат во услови на екстремно загадување на воздухот. Засега нема информација дали се укинува и бесплатниот автобуски превоз и дали распустот на учениците ќе биде продолжен. Во Струмица, мерките и препораките остануваат на сила.
„На ден 21 јануари среднодневните концентрации на ПМ10 се под дефинираниот праг на алармирање од 188 микрограми на метар кубен, и епизодата од два последователни дена е прекината во Скопје на мерните места Центар, Карпош и Ректорат, Миладиновци, Битола на мерните места Битола 1 и Битола 2, Гостивар и Тетово. Исто така, Ве информираме дека прагот за алармирање на суспендирани честички со големина до 10 микрометри е надминат на мерното место Струмица и таму остнауваат на сила препораките и мерките“, соопштија од Владата.
Среднодневната концентрација на ПМ10 честичките на метар кубен во Струмица на 20 јануари била 376, а на 21 јануари – 199. Според СЗО, пак, дозволената дневна концентрација на штетните ПМ10 честички е 50 микрограми на метар кубен.
Од утре се укинуваат следните препораки и мерки: работодавците да ги ослободат од работни обврски бремените жени, лицата постари од 60 години, како и лицата со хронична астма и други хронични респираторни болести, прележан миокарден инфаркт, мозочен удар и други кардиоваскуларни или онколошки болести без разлика на возраста, со препорака на матичен лекар, потоа препораката за ограничување на работите на градежните објекти и препораката до Единиците на локална самоуправа да ја намалат до 50 отсто употребата на службените возила.
Се укинуваат и препораката сите работодавците да го реорганизираат работното време и лицата кои работат на отворено да работат од 11 до 17 часот и препораката да не се организираат спортски натпревари и други културни манифестации на отворено.
Исто така се укинува и препораката до Инсталациите коишто поседуваат А – ИСКЗ дозвола, за намалување на капацитетот на производство (до 50 %) со што од оваа мерка ќе бидат исклучени инсталациите кои што произведуваат топлинска или електрична енергија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Таравари од човек со став, стана потрчко на Ахмети, велат од ВМРО-ДПМНЕ

ДУИ и нивните сателити реагираа. А и како не би врескале, кога Таравари конечно го положи испитот на максимална послушност, велат од ВМРО-ДПМНЕ.
„Од АА на Таравари сега слушаме апсурдна логика: ако ВМРО-ДПМНЕ ги критикува, значи се на вистинскиот пат. Не, не сте!
Вие сте на патот на ДУИ. А тоа значи: пат на корупција, клиентелизам и лични договори зад грбот на народот. Кога ДУИ ќе ви аплаудира, кога нивните портали ќе ве бранат, кога поранешни противници ќе ве фалат, знаете дека сте направиле нешто многу погрешно“.
Во соопштението од владејачката партија велат дека Арбен Таравари не е нападнат затоа што некој се плаши од него. Напротив, додаваат од ВМРО-ДПМНЕ, жално е да се гледа како еден лекар, некогаш со кредибилитет, сега мора да се правда преку соопштенија на ДУИ и да се радува кога тие го „тапкаат“ по рамото.
Од ВМРО-ДПМНЕ оценуваат дека партијата е „нападната затоа што е пречка за криминалот на ДУИ и нивните нови соработници.
И тоа е вистинската причина за нервозата. А Таравари, колку и да се труди, нема да може да ја избрише вистината: од човек со став, стана човек со валкани домашни задачи. Да потпишува партиски соопштенија напишани во Мала Речица.
Дали е на „вистинскиот пат“, најдобро покажуваат анкетите. Од 2,7% поддршка, падна на 1%, а според некои и под 1%. Ако тоа значи да си на вистинскиот пат, да станеш потрчко на Ахмети, и да ти се сруши рејтингот тројно, тогаш навистина „добар пат“ има фатено.
На добар пат е Таравари да ја доживее целосната НДП-изација и ДПА-изација на својата структура. Да се сведе на 3–4 илјади клиентелисти што ќе чекаат Ахмети да им додели некоја функција или тендерче, со некоја идна влада на СДС, ако некогаш таква се случи. Таков е нивниот „пат“, таква им е стратегијата – и тоа е нивно право“.
Наше право и обврска како ВМРО-ДПМНЕ, велат од партијата на Мицкоски, е да внимаваме во иднина, во која било идна коалиција, никогаш да нема Таравари или некој сличен по „интегритет“.
Му порачуваат на Таравари да си ги обнови релациите со Филипче и со Заев и нека остане, како што велат, во друштво во кое најдобро се пронаоѓа.
„Ахмети ќе му најде место. А народот, ќе си пресуди. Како што знае“.
Македонија
Пороен дожд, град, ветер и грмежи попладнево во делови од Скопскиот, Кумановскиот и Кривопаланечкиот регион

Од пладневните часови во северните делови (Скопскиот, Кумановскиот и Кривопаланечкиот регион) имаше локален развој на нестабилна облачност проследена со пообилен пороен дожд, грмежи, силен ветер и изолирана појава на град, соопшти УХМР.
„Во овие попладневни часови нестабилно е во западниот дел од Скопската Котлина со пороен дожд и појава на град, во околината на Крива Паланка, Штип и Пробиштип, а силна нестабилна облачна маса се приближува кон Велес проследена со интензивни поројни врнежи од дожд, силни и чести електрични празнења, силен ветер и појава на град.
Времето до крајот на денто: променливо облачно и нестабилно со локален пороен дожд и грмежи. Наместа ќе има поинтензивни процеси во форма на невреме со пообилен пороен дожд, грмежи, засилен ветер и изолирана појава на град“.
Македонија
Почувствуван земјотрес во Македонија

Телеметриската сеизмолошка мрежа на Република Северна Македонија, на сеизмолошките станици инсталирани ширум нашата територија, одржувани од Сеизмолошката опсерваторија при Природно-математичкиот факултет во Скопје, попладнево во 16 часот и 14 минути регистрираше земјотрес чиј епицентар потекнува од епицентралното подрачје Тетово-Гостивар, 39 км западно од Скопје, со Рихтерова локална магнитуда, ML2.7.
Според досегашните податоци со кои располага опсерваторијата, земјотресот е почувствуван во Тетово, Гостивар и блиската околина со интензитет од III степени според Европската макросеизмичка скала.