Македонија
Власта предлага членовите на АВМУ и МРТВ да се бираат со 61 пратеник, опозицијата бара 2/3 мнозинство

Група пратеници од владејачкото мнозинство предложи измени на законот кои се однесуват на изборот на членовите на Програмскиот севис на МРТВ и Агенцијата за аудиовизуелни медиумски услуги да се донесат со 61 пратеник по скратена постапка, наспроти двотретинско мнозинство, односно 80 гласа, како во постоечкиот закон.
На овој начин власта сака да го забрза процесот за избор на членовите во двете тела кој заглави повеќе од година и половина кај Собраниската комисија за избори и именувања, уште во 2019 година кога власта и опозицијата не можеа да се усогласат како да се направи тој избор.
Опозициската ВМРО-ДПМНЕ денеска бурно реагира на предлогот и вели дека нема да прифати ваков предлог, со кој, според нив, се политизира јавниот сервис и регулаторното тело. На денешната седница тие побараа да се тргне точката од дневниот ред да се гласа со 2/3 мнозинство и бадентер, но барањето не беше прифатено и пратениците ја изгласаа потребата од носење на измените на законското решение.
Власта во неколку наврати потенцираше дека процесот околу поставување нови раководни кадри во Програмскиот сервис на МРТВ и на Советот на АВМУ е приоритетен, но не успеа тоа да го стори бидејќи двете страни не можеа да најдат заедничко решение во кое свое учество требаше да има и опозицијата. Извори блиски до ВМРО-ДПМНЕ брифираа дека опозицијата барала одреден број од членовите да бидат луѓе кои се блиски до нивните политики, што за владејачкото мнозинство не било прифатливо. Инаку во Програмскиот совет на МРТВ треба да се изберат членови кои се од редот на експертите од медиумската фела, а оваа забелешка беше нотирана и во извештајот на Прибе.
Засега ВМРО-ДПМНЕ нема најава дали овој закон ќе го блокира и на кој начин.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЗНМ: Апелите од Министерството за здравство се на граница на цензура

Здружението на новинари на Македонија (ЗНМ) со загриженост ја следи јавната комуникација на Министерството за здравство, во која се упатуваат апели до медиумите кои се ограничувачки по својата содржина и претставуваат обид за воспоставување на лоша институционална пракса во односите со медиумите.
„Како ЗНМ, го осудуваме обидот на Министерството да наметнува практични правила за тоа како медиумите треба да известуваат, особено кога тоа се однесува на чувствителни настани од јавен интерес. Таквите инструкции, иако формално претставени како апели, во суштина се форма на институционален притисок и можна цензура, што е спротивно на основните демократски принципи и правото на слобода на изразување“, велат од ЗНМ.
Потсетуваат дека членот 16 од Уставот гарантира слобода на јавното информирање и забрана на цензурата, а прашањата поврзани со новинарската етика и професионализмот припаѓаат исклучиво на саморегулаторната сфера. За тие прашања постојат Советот за етика во медиумите и Судот на честа при ЗНМ, кои се единствено надлежни да оценуваат евентуални повреди на етичките норми.
„Ги повикуваме новинарите и медиумските работници да продолжат да известуваат со професионализам, етика и чувствителност, особено кога се работи за трагични настани и ранливи групи. Но истовремено, укажуваме дека секој обид за институционално ограничување на пристапот до информации и начинот на известување е неприфатлив и штетен по јавниот интерес“, велат од Здружнието.
ЗНМ останува отворено за дијалог со институциите со цел унапредување на транспарентноста и заемната соработка, но цврсто стои во одбрана на уредувачката независност, медиумската слобода и правото на јавноста да биде информирана – како темелни вредности на секое демократско општество.
Македонија
Евакуација во Психијатриската болница Бардовци, пожарот го зафати дворот

Попладнево избувна пожар во населбата Геге кој се прошири кон населбата Бардовци и зафати дел од површината на дворот на Психијатриската болница Бардовци, обраснат со висока сува трева и дрвја.
Од Центарот за управување со кризи (ЦУК) информираа дека пожарот претставувал опасност да се прошири во целиот комплекс на болницата. Пациентите и персоналот веднаш биле евакуирани, безбедно изнесени надвор од кругот на болницата.
ЦУК под водство на директорот Мухамед Али, побарал дополнителни сили од Бригадата за противпожарна заштита (БППЗ) и координирал со Хеликоптерската единица на Министерството за внатрешни работи (МВР). Првично се разгледувала можноста за пренасочување на воздушната поддршка, која дејствувала во општина Чучер Сандево – Блаце, за да помогне во гаснењето на пожарот во Бардовци.
Во моментот, пожарот е ставен под контрола и нема потреба од дополнителна воздушна поддршка. Хеликоптерот на МВР останува ангажиран кај Блаце, општина Чучер Сандево.
На лице место, заедно со директорот на ЦУК, Мухамед Али, беше и директорот на болницата, Иса Абдулаи, кои ја координираа целата акција.
Македонија
Хеликоптер го гасне пожарот кај Блаце

Хеликоптер на Министерството за внатрешни работи е веќе вклучен во акцијата за гаснење на пожарот кој избувна над магистралниот пат Скопје – Граничен премин Блаце.
Пожарот избил на потегот пред тунелот, од десната страна на коловозот. Зафатил тежок и непристапен терен, па по дојава на бројот за итни случаи 112, Центарот за управување со кризи (ЦУК) веднаш побарал воздухопловна поддршка. Хеликоптерската единица бргу се активирала, а акцијата на терен се координира заедно со припадници на противпожарните служби и други надлежни институции.