Се’ уште го немаме слушнато ставот на СДСМ по однос на Изборниот законик. Од една страна ги манипулираат нивните коалициони партнери и помалите партии дека се за предлогот една изборна единица, а од друга страна се согласуваат дека техничката Влада се покажа како неуспешна. Ова го истакна портпаролот на ВМРО-ДПМНЕ, Димче Арсовски, одговарајќи на новинарски прашања.

Тој оцени дека позициите на СДСМ по ова прашање се нејасни, а истовремено владејачката партија, како што рече, бега и од избори стравувајќи од пораз.

„Еве уште еднаш јавно прашуваме кој е ставот на СДСМ? Јасно и гласно да го кажат во однос на Изборниот законик и едната изборна единица, за конечно да прекинат да ги манипулираат нивните коалициони партнери и помали партии“, рече Арсовски.

Прашан и како ВМРО -ДПМНЕ гледа на формирањето работни групи со Бугарија, но и дали може двете држави преку економијата да ги решат отворените прашања, Арсовски рече дека не може со сигурност да се каже дека економијата ќе ги реши проблемите, но таа може навистина да ги приближи двете држави во овој сектор.

„Економијата може да ги приближи двете држави во однос на економскиот дел, во однос на соработка помеѓу компаниите, бизнис секторот, стопанството и се останато. Во однос на тоа дали ќе се решат проблемите на двете држави – не можеме да бидеме сигурни и да знаеме. Сепак, можам да бидам сигурен дека економската соработка помеѓу двете држави ќе реши проблеми на илјадници граѓани кои што се без работа, кои што немаат работа, и нормално тоа може да иницира и отварање на нови работни места, каде што ќе се решат горливи проблеми на граѓаните во однос на нивната егзистенција“, рече Арсовски.

Oбјавуваме скандал којшто покажува зошто власта е одлепена од реалноста, но и зошто Демократскиот Сојуз е верен партнер на власта на СДСМ – ДУИ. Демократскиот Сојуз како дел од колачот на власта, на подарок од СДСМ – ДУИ долгогодишно го имаше ЈП Градски паркинг во свое владение, а за возврат обезбедувале привилегии, повластувања за функционери на власта, изјави на прес-конференција портпаролот на ВМРО-ДПМНЕ, Наум Стоилковски.

„ ЈП Паркинзи било претворено во своевиден штаб на Демократскиот Сојуз, со тоа што службени возила, телефони и простории биле на дофат на партијата. Сето тоа наведува на сомнителни криминогени зделки. Директори, министри, функционери, разни раководни кадри со години паркирале бесплатно низ Скопје, користеле повластена позиција, на сметка на граѓаните, а тоа им го овозможувале директорите на паркинзи од Демократскиот Сојуз.

Обезбедувале повластувања за функционери на власта, бесплатен паркинг за нив. Секој во Скопје мора да плати паркинг, освен функционери на СДСМ, на ДУИ, на Демократскиот Сојуз, на членови на власта, ставени на посебни списоци со потпис на директорите од Демократски Сојуз.

Јавно прашувам, дали на име на Борче Јакимовски доскорешен директор на претпријатието и член на претседателството на Демократскиот Сојуз на Павле Трајанов, од плаќање паркинг ослободувал автомобили на функционери на СДСМ, од ДУИ, како и од Демократскиот Сојуз?

Дали на име на Владимир Кроневски, член на претседателството на Демократскиот Сојуз, воедно помошник директор на јавното претпријатие, од плаќања се ослободувани стотина автомобили на функционери од власта?

Дали и по кој основ од плаќање се ослободени возила да речеме на советникот и шеф на канцеларијата на Димитар Ковачевски, Мартин Попов, поранешниот директор на водовод Душко Вескоски ослободено возилото од плаќање, генералниот секретар на СДСМ Миле Зечевиќ, па и поранешниот градоначалник на Аеродром Златко Марин и неговото возило, како и други функционери од СДСМ. Дали е ослободен од плаќање и Агим, зад чиешто име стои името на Артан Груби?“ праша Стоилковски.

Тој нагласи дека остава простор од 24 часа, за одговори од Демократскиот Сојуз и од поранешното раководство на ЈП Паркинзи. Доколку молчат, Стоилковски предупреди дека ќе ги објави списоците со сите регистарски таблички за привилегираните функционери, ослободени од плаќање паркинг во Скопје, а коишто до нив ги доставил укажувач.

„ Огромен е бројот на ослободени од плаќања, а се работи за високи партиски избрани и именувани функционери. Да потсетам дека паркирањето беше поскапено, а за луксузите за бесплатен паркинг на функционерите на СДСМ, ДУИ и Демократскиот Сојуз се погрижиле токму директорите на претпријатието на Градскиот паркинг“ заклучи Стоилковски.

Издадена е наредба за обезбедување на снимките од видеонадзорот на местото на кое се случи несреќата, во која синоќа загина 24-годишна девојка.

Од скопското Обвинителство соопштија дека се преземаат и други дејства за целосно расчистување на случајот по што ќе биде донесена одлука за натамошното постапување.​​

Јавен обвинител од Основното јавно обвинителство Скопје синоќа изврши увид на местото на тешката сообраќајна несреќа во близина на трговскиот центар „Сити мол“.

Според првичните сознанија, до несреќата дошло кога патнички автомобил „ситроен ц4“, управуван од лице на возраст од 22 години, удрил во двајца пешаци, девојка и момче на возраст од 24 години, кои поминувале преку улицата. Од добиените повреди оштетената починала на самото место, а другиот пешак е повреден.

По наредба на јавен обвинител, возачот на автомобилот веднаш по несреќата е лишен од слобода и задржан во полициска станица. Јавниот обвинител издаде наредба за обдукција на телото на починатата, а нареди и вештачење на примероци од крв и урина од возачот на автомобилот со цел да се утврди дали тој управувал со возилото под дејство на алкохол или други недозволени супстанции.