Големото финале на „Средношколец Милионер“, каде десет тима ќе ги претстават своите идеи за бизнис пред пет реални инвеститори се оржува денеска во просториите на Бреинстер НЕКСТ колеџот.

Како што се наведува во соопштението на организаторот станува збор за идеи што решаваат конкретни, современи проблеми од финансиска писменост и едукација, до AI алатки, локален развој, туризам, здравствени навики, фриленс можности за младите и др.

Финалистите денес ќе бидат оценувани според јасното дефинирање на проблемот, конкретното и применливо решение, изводливиот и исплатлив бизнис модел и целокупната подготвеност на тимот да ја спроведе идејата.

-Овој натпревар покажува дека новата генерација размислува практично, технички и пазарно. Тие не создаваат идеи „на хартија“, туку функционални концепти што може да се имплементираат веднаш. И горди сме на успехот кој го постигнаа сите учесници досега, велат организаторите на натпреварот.

Во финалето ќе се натпреваруваат четири тимови од средните училишта во Скопје, три од Битола, две од Велес и еден тим од Куманово.

Најдобриот тим ќе ја освои главната награда од 1.000.000 денари, со можност својата идеја да ја претвори во вистински бизнис.

Најниска температура утрово е измерена со во Скопје – Петровец – 2 степени, во Штип, Струмица, Крушево, Маврови Анови – 1, додека во Скопје-Зајчев Рид, Крива Паланка, Велес, Демир Капија нула степени.

Во Виница, Берово се измерени еден степен, во Прилеп и Кавадарци два степени, во Тетово, Охрид, Претпор и Битола три степени и во Гевгелија пет степени.

Времето денеска ќе биде променливо облачно со сончеви периоди. Ќе дува слаб до умерен ветер од северозападен правец. Максималната температура ќе биде во интервал од 7 до 13 степени.

Во Скопје, времето ќе биде променливо облачно со сончеви периоди. Ќе дува слаб до умерен ветер од северен правец. Максималната температура ќе достигне до 9 степени.

ВМРО-ДПМНЕ реагира дека серијата случаи што се отвораат деновиве ги разобличуваат, како што велат, скандалите од времето кога СДСМ била на власт и претставуваат доказ за структурен хаос, распаднати институции и недостиг од одговорност.

Во соопштението партијата посочува дека случајот со стоковите резерви е уште едно потсетување дека институциите под контрола на СДСМ функционирале „како импровизирани конструкции без механизми за одговорност“.

Според ВМРО-ДПМНЕ, отпишувањето на 2.000 тони пченица и јачмен преку поранешниот заменик-министер за земјоделство Трајан Димковски, а потоа наводното појавување на истите количини на црниот пазар во соседна држава, укажува на „организирана злоупотреба од тогашната власт“.

Иако имало укажувања дека спорните количини постоеле и биле употребливи, според партијата, бил изготвен записник што тврдел спротивно – документ со контрадикторности кој сепак бил прифатен на владина седница.

Од ВМРО-ДПМНЕ посочуваат дека со тоа тогашните владини функционери, меѓу кои Зоран Заев, Љупчо Николовски и сегашниот лидер на СДСМ, Венко Филипче, формално легитимирале документ што, како што наведуваат, не кореспондирал со фактичката состојба на терен.

Партијата додава дека Филипче денес се обидува да се претстави како опозициски коректив, но оценува дека „не може некој кој лично учествувал во систем што дозволил вакви пропусти да биде коректив“.

Според ВМРО-ДПМНЕ, ако СДСМ има намера да се реформира и повторно да стане релевантен политички субјект, мора да се огради од функционерите на поранешната власт. Партијата бара дистанца од, како што ги наведуваат, Заев, Николовски и Филипче, кои, според нив, го блокираат секој обид за вистински реформи во СДСМ.