Македонија
ВМРО-ДПМНЕ: Пред само еден месец Заев тврдеше дека промена на Уставот значи обесчестување на Македонија

Зоран Заев недостоинствено ги погази државните и национални интереси на Република Македонија. Зоран Заев одлучи да прифати промена на уставното име, да ја проблематизира националноста и да се откаже од историјата, соопшти денеска опозициската партија, ВМРО-ДПМНЕ.
Оттаму потенцираат дека Заев прифатил отстапки и обврски само за Република Македонија.
„Зоран Заев планира со просто мнозинство да изгласа во Собранието штетен договор кој подразбира менување на Уставот за што е потребно двотретинско мнозинство. Пред само еден месец, Заев тврдеше дека барањата на Грција за промена на Уставот и називите на институциите се ‘обесчестување’. Сега без срам, од владината говорница најави дека на влезот ќе го сменел написот и ќе ја преименувал во Влада на Северна Македонија“, се наведува во партиското соопштение.
Од ВМРО-ДПМНЕ велат дека Заев повторно се обидува да ги манипулира граѓаните и капитулацијата во преговорите да ја прикаже како победа.
„Со овој договор Зоран Заев ги урниса темелите на државноста на Република Македонија и го загрозува долгоодишното право на самоопределување кое македонскиот народ го има стекнато. Обидувајќи се да ја излаже македонската јавност Заев изјави дека со овој договор се зацврстува македонскиот идентитет, но за тоа веднаш беше демантиран од грчкиот премиер Ципрас кој на социјалните мрежи напиша дека договорот не ја препознава македонската нација. Заев покажа дека е човек кој ниту има достоинство ниту стои на својот збор. Со години манипулираше со македонската јавност дека никогаш нема да прифати промена на Уставот со цел промена на уставното име, а за тоа дури и се колнеше во своите предци и деца“, истакнуваат од опозициската партија.
Од ВМРО-ДПМНЕ потенцираат дека само што дошол на власт Заев си го погазил сопствениот збор и покажал дека се што ќе каже е лага.
„Ваквиот капитулантски исход е резултат на неспособната и неумешна дипломатија на Зоран Заев и неговите соработници. ВМРО-ДПМНЕ нема да ја поддржи капитулацијата која Зоран Заев сака да и ја донесе на Република Македонија. Договорот нема да биде поддржан од ВМРО-ДПМНЕ затоа што е штетен и спротивен на највисоките државни и национални интереси. ВМРО-ДПМНЕ е партија која секогаш стои на браникот и работи за државните и национални интереси и затоа нема да прифати промена на Уставот со цел промена на уставното име и ќе се спротивстави со сите демократски и правни средства на овој капитулантски договор. ВМРО-ДПМНЕ ги повикува сите граѓани на Република Македонија кои не се согласуваат со овие погрешни политики на Заев и СДСМ и сакаат да се спротивстават на овој капитулантски договор да ни се придружат на протесниот марш кој што ќе се одржи во Битола во недела со почеток во 13 часот“, се вели во соопштението на партијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Почувствуван земјотрес во Македонија

Телеметриската сеизмолошка мрежа на Република Северна Македонија, на сеизмолошките станици инсталирани ширум нашата територија, одржувани од Сеизмолошката опсерваторија при Природно-математичкиот факултет во Скопје, попладнево во 16 часот и 14 минути регистрираше земјотрес чиј епицентар потекнува од епицентралното подрачје Тетово-Гостивар, 39 км западно од Скопје, со Рихтерова локална магнитуда, ML2.7.
Според досегашните податоци со кои располага опсерваторијата, земјотресот е почувствуван во Тетово, Гостивар и блиската околина со интензитет од III степени според Европската макросеизмичка скала.
Македонија
МНР: Амбасадата во Прага е во координација со семејството на Чифлиганец за пренeсување на телото во Македонија

Министерството за надворешни работи и надворешна трговија информира дека на 2 август 2025 година, до македонската амбасада во Прага била доставена информација за тешка сообраќајна несреќа во која бил повреден македонскиот државјанин Душко Чифлиганец. Тој управувал мотор кога дошло до незгодата, по што со тешки повреди бил пренесен во болница.
На 3 август, семејството го известило дипломатско-конзуларното претставништво дека Чифлиганец им подлегнал на повредите.
Како што соопштија од МНР, Амбасадата во Прага е во континуирана комуникација со семејството со цел завршување на сите неопходни формалности и организација за пренос на телото во Македонија.
Македонија
Изгаснат пожарот кај Липково, гори на две локации

До 12 часот активни се два пожари на отворен простор, еден пожар е под контрола, а еден е изгаснат.
Активните пожари се наоѓаат во село Богомила во општина Чашка, каде гори мешана шума, како и во село Грешница во општина Македонски Брод, во деградирана нискостеблеста шума, соопшти ЦУК.
Пожарот кој е под контрола е во село Стровија во општина Долнени, зад местото викано Гајдарец-Клепало, во нискостеблеста шума.
Пожарот што е изгаснат се наоѓа во село Слупчане во општина Липково, каде горела ниска вегетација.