Македонија
ВМРО-ДПМНЕ: СДСМ не се грижи за безбедноста на граѓаните во Гази Баба
Министерството за внатрешни работи со месеци нема назначено командир на полициската станица Гази Баба која покрива речиси половина од Скопје и која е одговорна за над 100 илјади граѓани, обвинува ВМРО-ДПМНЕ во сооптение до јавноста.
„Граѓаните на Гази Баба се сведоци на грабежи, насилства и закани по нивната лична безбедност, а Министерството сеуште не именува соодветна личност за вршење на оваа функција. Со други зборови оваа полициска станица е обезглавена.
Согласно законската процедура Министерството за внатрешни работи предводено од Оливер Спасовски треба до Советот на општина Гази Баба да поднесе предлози за именување на командир на полициска станица, но тоа како што рековме со месеци веќе не го прави“, велат од партијата.
Тие сметаат дека тоа е доказ дека на МВР не му е грижа за безбедноста и сигурноста на над 100 000 граѓани и нивните имоти.
„ Ваквиот индолентен однос остава простор криминалците слободно да хараат на просторот на нашата општина и пошироко во целата надлежност на полициската станица и на тој начин да го загрозуваат редот и безбедноста. Што треба да се случи за Оливер Спасовски и градоначалникот Георгиевски да ја сфатат сериозноста на ова прашање? Граѓаните заслужуваат да бидат сигурни дека органите задолжени за редот и мирот функционираат во полн капацитет и ваквата несериозност од страна на надлежните со право ги загрижува“, стои во соопштението,
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Нормализиран сообраќајот по одронот на патот Катланово – Велес
Од 10:30 часот одронот на патниот правец А1 Катланово – Велес е исчистен, сообраќајот е нормализиран и се одвива по две коловозни ленти, соопшти АМСМ.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Обвинителството за куќниот притвор на Груби: Се водиме исклучиво од законските основи
Јавното обвинителство како единствен и самостоен орган, при одлучувањето и предлагањето на мерките за обезбедување во сите случаи се води исклучиво од законските основи, велат од ЈОРМ.
„Во однос на реакциите на јавноста во врска определената мерка за обезбедување – куќен притвор за еден од осомничените во предметот „Државна лотарија“, обвинителството нагласува дека, согласно Законот за кривична постапка, мерката куќен притвор, особено кога се реализира со 24-часовен надзор, е исто така притворска мерка, која не се издржува во затворски услови само затоа што постојат специфични услови за тоа.
Таквите услови во конкретниот случај беа исполнети, бидејќи по проценка на надлежните органи – МВР и АНБ постојат сериозни информации дека во притворското одделение не може да се гарантира личната безбедност на овој осомничен. Деталите во однос на ваквите загрозувања беа презентирани пред судијата на претходна постапка.
За обвинителството од исклучителна важност е што овој осомничен е обезбеден и за него продолжува кривичниот прогон за сомненијата за сторено кривично дело – Проневера во службата од член 354 од Кривичниот законик. За него беше спроведена финансиска истрага и се обезбедени најголемиот дел од потребните докази, во кои одбраната веќе врши увид.
Надлежните јавни обвинители во предметот постапуваат одговорно и во согласност со законските надлежности. Јавното обвинителство го разбира интересот на јавноста за овој предмет, но апелира за воздржаност на коментарите во однос на легитимно донесените јавнообвинителски одлуки за да се овозможи ефикасна и правична постапка“, се наведува во соопштението на Јавното обвинителство.
Македонија
ВМРО-ДПМНЕ: Судскиот процес за Артан почнува, а допрва ќе почне и за сите негови ортаци, правда ќе има
Го разбираме револтот на граѓаните од одлуката на правосудните органи со 2 посто доверба од граѓаните за случајот со Артан Груби. Тоа незадоволство доаѓа по 7 годишна агонија на правосудните органи кои беа под политичка тортура и притисок на криминалната банда СДС-ДУИ и серија неказнивост за политичарите кои од просечно ситуирани граѓани станаа олигарси на грбот на граѓаните. Тоа време заврши, а криминогениот и до гуша во афери Артан Груби ќе одговара, велат од ВМРО-ДПМНЕ.
„Извршната власт во овој случај има обврска да го обезбеди бегалецот пред органите на правдата и тоа МВР го направи.
Што се однесува до лицемерието на СДС тоа се гледа и во фактот што до вчера велеа дека власта го пуштила да избега, а од денес велат дека е договорено неговото обезбедување пред органите на прогонот. Вистината е дека Артан е ортак во криминалите на Заев, Филипче, Спасовски и сите заедно ќе одговараат. Судскиот процес за Артан почнува, а допрва ќе почне и за сите негови ортаци. Правда ќе има“.

