ВМРО-ДПМНЕ: Со кого се консултирал Заев за отстапките кон Бугарија?

Со кое право Зоран Заев се договара да ги менува историските учебници, прашаа денес од ВМРО-ДПМНЕ, порачувајќи му на новиот премиер и лидер на СДСМ дека СДСМ не е опозиција и треба да даде одговори на дилемите околу неговата посета што, според нив, го вознемируваат македонскиот народ.

Дали СДСМ ги консултираше историчарите во однос на прашањето на заедничка историја? Дали СДСМ и Зоран Заев сметаат дека Македонија нема своја сопствена историја? Дали Зоран Заев се договорил високите бугарски претставници да дојдат на Илинден за да ни го честитаат празникот како гости или тие доаѓаат на заедничка прослава без признанието дека Илинденското востание е автохтоно и македонско, се прашањата што ги поставија од оваа партија.

„ВМРО-ДПМНЕ е крајно загрижена од нетранспарентноста и леснотијата со која Заев пристапи на едно исклучително сериозно прашање како што е склучувањето на договорот со Бугарија.ВМРО-ДПМНЕ бара увид во тоа што Заев договорил при посетата на Софија“, стои во реакцијата на партијата.