Активни се три пожари во државата, соопшти Надица Вчкова од Главниот штаб за управување со кризи.

Во моментот сѐ уште е активен пожарот во Велес кај селата Џидимирци – Крушје – Иванковци, каде што гори мешана шума.

Активен пожар има и во Македонски Брод, помеѓу с. Црешнево, с. Локвица, с. Крапа, таму гори деградирана дабова шума, грмушки и ниска вегетација.

И во општина Василево, кај селото Нивичино, има активен пожар, каде што гори нискостеблеста шума.

Пожарот кај селото Николиќ веќе е ставен под контрола, информираа надлежните, а пожарот кај Чучер-Сандево е целосно изгаснат.

„Во согласност со главниот штаб за ангажирање ресурси, денеска се вклучени две специјализирани возила со екипаж ‘Пинцгауер’ како и два ‘ер трактора’ на Дирекцијата за заштита и спасување на подрачјето кај селата Крушје и Иванковци. Во гаснењето на овој пожар ангажирани се и 30 припадници на АРМ. Хеликоптерот на МВР е во поддршка на копнените сили во гаснењето на пожарот над село Нивичино во општина Струмица“, извести Вчкова.

Додаде дека сите ангажирани ресурси остануваат максимално ангажирани на сите подрачја сѐ додека целосно не се изгаснат активните пожари.

Министерот за внатрешни работи, Панче Тошковски, и генералниот секретар на Црвениот крст на Македонија, Саит Саити, денеска потпишаа меморандум за соработка помеѓу МВР и Црвениот крст.

Меморандумот претставува основа за понатамошна институционална соработка во областа на хуманитарното дејствување, превенцијата и одговорот при кризни и вонредни состојби, заеднички активности во полето на безбедноста, едукацијата, обуките, како и унапредување на волонтерството и солидарноста во заедницата. Со потпишувањето ќе се овозможи поефикасна координација помеѓу двете институции во интерес на граѓаните и нивната благосостојба.

Министерот Тошковски изрази голема благодарност до Црвениот крст за целокупната досегашна помош што ја има дадено како на Министерството така и на државата и граѓаните и истакна дека унапредување на соработката е со цел зголемување на позитивниот ефект врз државата и граѓаните.

„Ваков тип институционална соработка треба да биде пример како треба да се одвива една успешна соработка во интерес на државата. Овој меморандум за соработка, кој денес го потпишуваме, само дополнително ќе ги зајакне основите за нејзино унапредување и во иднина. Сигурен сум дека резултатите што ќе ги дадеме во иднина ќе бидат уште подобри благодарение на ваквото унапредување“, истакна министерот Тошковски на потпишувањето на меморандумот.

Генералниот секретар на Црвениот крст, Саит Саити, истакна дека и досегашната соработка на двете институции е повеќе од задоволителна, но во насока на нејзино унапредување се потпишува овој меморандум, кој регулира нови области на заедничко дејствување, кои поефикасно ќе ги пресретнат новите предизвици што се наметнуваат.

„Спроведувајќи ги одредбите од меморандумот, ќе можеме да продуцираме и да произведеме нови форми на соработка, кои ќе овозможат да ги зголемиме хуманитарните ефекти од нашето работење во општеството“, потенцира Саити.

Новиот министер за здравство Азир Алиу денес најави системска трансформација на здравствениот систем од систем што досега реагира со доцнење кон систем што превенира, се подготвува и дејствува навремено.

„Министерството за здравство почна со националната програма за кризен менаџмент и отпорност на здравствениот систем – прва од ваков тип во нашата држава, која воспоставува нова логика на справување со ризици, дефинирање стандардизирани протоколи, дигитална платформа за координација во реално време, обуки, симулациски вежби и интероперабилна комуникација меѓу здравствените и безбедносните институции. Со оваа платформа ја јакнеме издржливоста на системот и правиме чекор напред кон интегрирана здравствена безбедност“, рече министерот Алиу.

Истовремено, почнато е темелно ажурирање на националниот акциски план за здравствена безбедност, со вклучување на лекциите од пандемијата, во согласност со стандардите на СЗО и ЕУ и зајакнување на законската рамка за меѓусекторска координација.

„Ова е јасна политичка порака – здравјето и безбедноста на граѓаните се неприкосновени, а нашата одговорност е да изградиме систем што реагира пред заканата, а не по трагедијата. Со овие координирани чекори нашата држава прави пресврт – од реактивен кон активен здравствен систем, подготвен да одговори на секоја закана“, вели министерот Алиу.

За системот навистина да биде отпорен, Алиу смета дека реформите мора да бидат надополнети со реални, капитални инвестиции.

„Затоа Министерството за здравство почнува со нова инвестициска фаза од 205 милиони евра за обнова и унапредување на здравствената инфраструктура во Штип, Тетово и во Кичево. Овие проекти се темел за подостоинствен третман на пациентите и подобри услови за медицинскиот персонал“, рече министерот Алиу.

Тој најави и менување 12 закони за подобрување на услугите кон граѓаните и потсети дека веќе е тргната административната бариера за создавање семејство и место три, поддржани се шест ин витро-обиди, дигитализирана е постапката за пријавување, а рокот за одговор е скратен на две недели.

„Нема веќе чекање со месеци, нема изгубени документи по пошта, ќе има само нова шанса, надеж и пристапност. Истовремено, го упростивме процесот за лекување во странство, воведовме појасна одговорност во управувањето со Фондот и почнавме усогласување на правата на странските државјани со оние на нашите граѓани“, рече министерот Алиу.

За менување на законите, тој рече дека во тек е сеопфатна анализа, која треба да им покаже каде реално треба да се прават измени. Очекува анализата да заврши до крајот на годината.