Во пресрет на Светскиот ден на свесност за аутизмот (2 Април), Град Скопје и ЈСП се вклучуваат во проектот „Сончогледи кон сонцето за видлива и невидлива попреченост“, во организација на здружението на граѓаните „Куќа на среќата“, кое има цел подигнување на свеста за лицата со попречености преку инклузивната лента што ја носат овие лица.

Во поголем дел од возилата од ЈСП „Скопје“ залепени се пораки „Разбери, прифати, сакај!“, кои укажуваат дека лицата што носат инклузивна лента се лица со попреченост и апелираат секој кон нив да биде трпелив, љубезен и подготвен да помогне.

Пораките се залепени на видно место во возилата во ЈСП, но и во сите културни институции во рамките на градот Скопје со цел сите посетители и корисници на јавниот превоз да ја прочитаат инклузивната порака за разбирање, прифаќање и сакање на лицата со различности, односно на лицата што се со видлива или невидлива попреченост.

„Доколку забележите лице што ја носи оваа лента на вратот, разберете дека ви испраќа порака, прифатете ги неговото однесување и потреба“, порачуваат од „Куќа на среќата“.

Град Скопје е отворен за соработка со сите организации и здруженија и е подготвен да даде помош и поддршка во согласност со расположливите можности и околности.

Во таа насока, во возилата на ЈСП „Скопје“ и на жичницата им е дозволен превоз на лица со попречености со куче придружник, а врши и организиран бесплатен превоз со специјални комбиња, лицата со попречености се ослободени од плаќање билет при користење јавен превоз.