Македонија
Во аптека ќе се оди само со електронски рецепт, хартиените рецепти ќе бидат целосно исфрлени од употреба во јуни следната година

Место со непотребна документација, од јуни следната година матичните лекари ќе имаат повеќе време да се посветат на пациентите оти ќе бидат ослободени од административните работи што ги бара хартиеното работење. Директорот на Фондот за здравствено осигурување, Сашо Клековски, најави дека хартијата целосно ќе биде исфрлена од употреба и во ординациите, и во аптеките, и во Фондот за здравствено осигурување.
„Разбираме дека има сè помалку луѓе за работа и дека треба да ја намалиме здравствената администрација. Две работи веќе можеме да ги објавиме. Работиме на е-рецепти, кои до крајот на полугодието во 2025 година треба да бидат во полна употреба и во функција. Со нив комплетно ќе се елиминира од функција хартијата и кај матичните лекари, и кај аптеките, и во Фондот поврзани со рецепти. Ќе ги дигитализираме и сите анекси за 1.500 ПЗУ за тие да може да се потпишуваат дигитално, да нема потреба да се потпишуваат во хартиена форма. Понатаму, ќе разговараме како можеме да го намалуваме товарот за лекарите да имаат сè повеќе време за разговор со пациентите, а да не се занимаваат со непотребна администрација“, рече директорот Клековски.
Безхартиеното работење на матичните лекари е само една од работите што на состанок со Фондот ги договориле претставници на лекарите. Договорено е покачување на капитацискиот бод, укинување некои од казните и дестимулативните мерки, нова програма за превенција, која ќе вклучи превенција од најчестите форми рак во земјата, а договориле и матичните лекари во руралните средини да не мора да ги затворат ординациите доколку во рок од 60 дена не најдат медицинска сестра како што налага сега законот. Тие добија рок од 24 месеци за да се снајдат и да вработат медицинска сестра.
„Ќе им биде дозволено да немаат медицински сестри следните 24 месеци, период во кој мораме да дадеме системски поглед на прашањето законски како ќе функционираат понатаму тимовите. Исто така, зголемени се бодовите за руралните лекари. За 22.500 нето се зголемени фиксните примања на лекарите за да се објави дека имаат зголемени трошоци и поради нивното патување до местото на ординациите. Тоа е веќе решено со менување на правилникот. Значи, за руралните подрачја одлуките се веќе донесени, објавени и стапуваат во сила“, рече директорот Клековски.
За другите прашања формирани се заеднички тимови, кои имаат рок до 15 декември да најдат заеднички решенија. Лилија Чолакова-Дервишова, матична лекарка од Велес и претседателка на Здружението на приватните лекари на Македонија, рече дека веќе го поднела барањето за покачување на капитацискиот бод за матичните лекари.
„Ние дадовме аргументи колку пати се покачувани платите во јавното здравство, а колку кај нас. Сега барањето беше бодот да биде 100 денари. Нашето барање е од јануари. Се надеваме дека оваа Влада ќе излезе во пресрет на сето ова. Бараме сигурност за да можеме и ние на нашите вработени да им има дадеме плата, К15, да ги задржиме, да немаме прелевање на кадарот од кај нас во јавното здравство. Ако постојано се покачува платата во јавното здравство, тогаш нашите медицински сестри ќе се прелеат во јавното здравство, а не е суштината да го дестабилизираме примарното здравство, што основниот чувар на здравствениот денар“, рече Чолакова-Дервишова.
Таа нагласи дека состанок како денешниот со директорите на Фондот и голема група матични лекари,немало последните 7-8 години. Ја искористиле можноста да ги кажат сите проблеми со кои се соочуваат и очекуваат од следната година многу од нив да бидат решени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Образ ѓон, се уште седат и земаат илјадници евра плата: Мицкоски за членовите на Судскиот совет

„Вие пратениците изгласавте недоверба на членовите на Судскиот совет. Но, и покрај тоа што тие ја добија недовербата од страна на тие кои што ги гласале, и понатаму продолжуваат да бидат дел од Судскиот совет и да земаат илјадници евра месечен надомест, притоа уживајќи помалку од 2 проценти доверба кај граѓаните и никому ништо. И тоа доволно ви кажува за каков профил на личности станува збор и зарем вие очекувате нешто различно од нив да донесат како одлука, посебно за случајот за младата Теодора која е прегазен ана пешачки премин“, истакна премиерот Христијан Мицкоски на денешната собраниска седница за поставување пратенички прашања.
Мицкоски упати остри реакции и за Советот на јавни обвинители.
„Но, не е само тоа. Во случајот има и една друга институција Советот на јавни обвинители, таму има еден замислете еден виш јавен обвинител кој што бара да се намали првостепената пресуда. Затоа што овој случај има прв дел од пресуда од 3 и пол години, се жали обвинителот на ниска казна, неговиот надреден кој што е во Вишото, ја прифаќа одлуката односно прифаќа таа да биде помала од 2 години“, рече Мицкоски.
„Зарем вие очекувате од овие луѓе нешто повеќе. Јас не. Образ ѓон.“, изјави Мицкоски.
„Ако некој мисли дека ние имаме кратко помнење се лаже, нема така едноставно да поминуваат некои работи. Правдата мора да биде неприкосновена и да ја добијат сите,“, дециден е Мицкоски.
Во однос на реформите, истакна дека се во завршна фаза и очекува до крајот на јуни да бидат донесени, но како што рече лично има дилема дека нешто од тоа ќе функционира со вакви судии и обвинители.
„Тие се работат и се во завршна фаза. И се дел од реформската агенда и има јасен датум дека до 30.06 треба да се донесат. Но, искрен да бидам лично мислам и имам дилема дека нешто од тоа ќе функционира со овие вакви судии и обвинители кои се бирани на начин на кој што се бирани. Не сите, туку мала група, но таа мала група го контаминира она поголемо ткиво кое заслужува да биде и судија и обвинител“, појасни премиерот.
Македонија
Тренчевска до Дурмиши: Кој ќе одговара за доцнењето на платите и непочитувањето на законските обврски

Пратеничката на СДСМ Јована Тренчевска во рамките на собраниската седница посветенa на пратенички прашања упати прашање до министерот економија и труд Бесар Дурмиши, во врска со неисплатените плати на вработените министерство за економија и труд, државниот пазарен инспекторат и државниот трудов инспекторат.
„Министре дали сте свесни дека поради вашата неспособност и неспособноста на Владата на ДПМНЕ, всушност сé излезе на виделина. Илјадници вработени, меѓу кои и вработените во министерство за економија и труд, државниот пазарен инспекторат, државниот трудов инспекторат ги оставивте без плата.
Ова не е административен пропуст, министре, ова е неспособност, ваша неспособност и неспособност на владата, но ова е и кршење на законските права на работниците, понижување на нивното достоинство, за што треба да има одговорност.
Додека вие како функционери во владата уживате во луксузи со папаја и манго, работниците се оставени без плата и без основна егзистенција и тоа е тотална незаинтересираност на власта за граѓаните, за вработените, за македонскиот народ“.
Да оставите луѓе без здравствено осигурување и без плата по повеќе од два месеци, оценува Тренчевска, навистина е нешто за коешто треба да има одговорност.
„И затоа, министре, сакам да ги одговорите кога ќе биде исплатата на платата на овие три институции и дали конечно ќе се реши хаосот, којшто го предизвикавте со измените на ЗОРОДУ и со спојувањето на инспекторатите во министерството за економија и труд и дали вакви случаи ќе има понатаму и дали ќе има одговрност за доцнењето и непочитувањето на законските обврски за исплата на плата во 15-ти во месецот“.
Ја повика и трудовата инспекција да направи надзор во министертвото за економија и труд.
„Како што поднесуваат кривични пријави за други работодавачи за неисплатени плати да поднесат кривична пријава и за министерот за економија и труд, затоа што неисплатата сега на платата не ви е прв пат, имаше, како што спомнав, неисплатување на плата и во јануари, исплата на плата за декември тек во февруари, па така согласно член 166 од Кривичниот закон, како што трудовата испекција поднесува кривични пријави за други работодавачи коишто не го почитуваат ова основно право на работникот за исплата на плата да поднесе кривична пријава и до министерот за економија и труд“, кажа Тренчевска.
Македонија
Николоски-Нокс: Македонија ги исполнува реформските процеси и ја развива регионалната соработка

Македонија ги исполнува реформските процеси и дава сериозен придонес кон регионалниот развој, потенцираше вицепремиерот Александар Николоски на средбата со Медлин Нокс, директор за Западен Балкан во Министерството за надворешни работи на Обединетото Кралство.
Политичките и економските односи меѓу зeмјите од Западен Балкан се во постојан напредок, а Македонија има значајна улога за развојот на таквите односи, истакна Николоски. Мерките и политиките што ги реализира Владата се во насока на намалување на трговските бариери, зголемување на трговијата и конкурентноста на економиите во земјите од Западен Балкан, додаде тој.
Вицепремиерот Николоски уште еднаш го потенцира стратешкото пријателство меѓу Македонија и Обединетото Кралство и подршката што и се овозможува на земјата кон нејзиниот развој.
На средбата се разговараше и за зацврстување на економската соработка, можноста за нови инвестиции и соработка на двете земји во сектори од заеднички интерес.
Македонија и Обединетото Кралство негуваат добри пријателски односи, се согласија и двете страни, со заложба таквото партнерство да се зацврстува преку конкретни процеси и проекти.