Македонија
Во Охрид се одржува голема НАТО-вежба „Северна Македонија 2021“

На церемонија во Охрид денеска беше најавен почетокот на првата голема меѓународна „НАТО-ЕАДРЦЦ“ вежба – „Северна Македонија 2021“, која од 20 до 24 септември ќе се реализира во Охрид и во Струга.
Македонија е домаќин на оваа меѓународна вежба на која ќе учествуваат 28 земји со околу 700 учесници и дваесетина меѓународни организации.
Вежбата се базира на урбани операции за пребарување и спасување, како последица од природна катастрофа (земјотрес), планинска потрага и спасување, одговор на поплави, одговор на хемиски, биолошки или радиолошки инциденти и кампањи за лажни вести кои ќе влијаат на цивилното население и критичната инфраструктура во областа околу градовите Охрид и Струга.
МВР на вежбата ќе учествува со над 200 припадници на дваесетина надлежни организациски единици, над 40 возила, пет пловни и два воздухополовни објекта, два тима за спасување од непристапни планински терени и вода, службени кучиња и др.
На отворањето се обрати министерот за внатрешни работи, Оливер Спасовски, кој изрази уверување дека вежбата ќе придонесе кон унапредување на ефикасноста и јакнење на меѓусебните врски во национални и меѓународни рамки, размена на искуства, интегрирање на ресурси и капацитети и придонес кон зголемување на превенцијата, раното предупредување, справувањето и санирањето на последиците од катастрофи.
Според министерот за внатрешни работи, сценариото на оваа голема вежба опфаќа повеќе елементи, и тоа: елементарна природна непогода, спасување и укажување помош на граѓаните, криминал, кибернапади, лажни вести и слично, кои претставуваат одлична основа за развивање на капацитети и способности за градење на регионален пристап и стратегии, со цел соодветно спротивставување, сузбивање на овие криминални дејствија и преземање конкретни мерки на дејствување, со што претставува адекватен одговор на предизвиците со кои во поново време се соочуваат државите.
„Меѓу потенцијалните ризици и закани по безбедноста на Република Северна Македонија како членка во НАТО, би ги издвоил организираниот криминал, нелегалната миграција, компјутерскиот криминал и кибернападите, лажните вести и, секако, пандемијата со Ковид-19, за кои во зависност од комплексноста за нивно откривање, спречување, степенот на опасност и интензитетот на последиците, е неопходен современ, регионален пристап и заедничка стратегија за делување“, рече Спасовски, додавајќи дека цивилната подготвеност при справување со кризни и сложени безбедносни состојби е од круцијално значење и основна обврска на членките на НАТО-алијансата.
„Тоа значи постигнување на интероперабилност и заштита на животот, имотот и личната сигурност на граѓаните. Бидејќи безбедносниот систем е основата на функционирањето на правната држава!“, порача Спасовски.
Спасовски посочи дека Министерството за внатрешни работи, како интегрален дел на Системот за управување со кризи е во постојана комуникација и соработка со останатите субјекти, а со цел унапредување на комуникацијата и координацијата помеѓу субјектите кои се дел од овој систем, е вклучено и во процесот на негова дигитализација, со примена на веб базираната алатка NICS (Next Generation Incident Command System).
Центарот за управување со кризи е домаќин, односно организатор на сите активности поврзани со вежбата, во која учествуваат сите надлежни институции кои се дел од Системот за управување со кризи, а вклученоста во овие НАТО вежбовни активности претставуваат одлична можност за поддршка на националните власти и градење на нашите капацитети, преку подобрување на готовноста при природни катастрофи и катастрофи предизивикани од човек, подобрување на планирањето, превенцијата и одговорот, со што би се зајакнале националните капацитети за одговор при итни ситуации, со што се исполнува и една од целите – национално сертифицирање и операционализација од Република Северна Македонија за алатката NICS, развиена од програмата на НАТО за „Наука за мир и безбедност“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Муцунски на настан на Атлантскиот совет: Потребна е забрзана интеграција

На покана на Јерн Фленк, директор на Атлантскиот совет, министерот за надворешни работи и надворешна трговија, Тимчо Муцунски, денеска учествуваше на настан организиран од Советот, кој се одржа во просториите на Министерството за надворешни работи и надворешна трговија.
Покрај министерот Муцунски, на настанот се обратија и министерката за европски прашања на Црна Гора, Маида Горчевиќ, како и претставници Делегацијата на Европската Унија, невладиниот сектор и самиот Атлантски совет.
Во своето обраќање, министерот Муцунски ја нагласи потребата од одлучна и доследна поддршка за реформските процеси во регионот. Посебен акцент стави на Планот за раст како практичен инструмент кој го забрзува приближувањето кон единствениот европски пазар и носи реални економски придобивки за граѓаните – уште пред полноправното членство.
Министерот подвлече дека реформите мора да бидат препознаени и вреднувани од страна на Европската Унија преку конкретни и навремени чекори, со цел зачувување на кредибилноста на процесот на проширување и спречување на дополнително разочарување кај граѓаните. Тој истакна дека реформските процеси се потврда за јасната европска ориентација на Владата, и дека нивното спроведување не претставува само исполнување на агенда, туку реално подобрување на квалитетот на животот и на општеството во целина.
Во завршницата на обраќањето, министерот Муцунски, во контекст на денешниот Самит, ја повтори пораката дека Западниот Балкан е составен дел од Европската Унија и дека европската целина ќе биде комплетна само ако земјите од регионот станат нејзин дел. Тој упати повик за забрзана интеграција на регионот, што ќе значи и вистинска европеизација на овој дел од континентот.
Македонија
Сиљановска-Давкова се сретна со шпанскиот премиер Педро Санчез

Претседателката Гордана Сиљановска-Давкова, во рамки на учеството на 4. Меѓународна конференција за финансирање на развојот во Севиља оствари средба со премиерот на Кралството Шпанија, Педро Санчез.
Осврнувајќи се на нашите евроинтеграции, Сиљановска-Давкова посочи на тешките македонски компромиси коишто треба да бидат соодветно вреднувани од Европската Унија и истакна дека влезот во ЕУ ќе биде корисен и за самата Унија, и за земјите кандидати коишто дополнително ќе ја стабилизираат.
Таа оцени дека Шпанија е важен партнер на земјава во рамки на НАТО, ООН, ОБСЕ и изрази благодарност до владата на Санчез и Шпанија за доследната поддршка на македонските аспирации за членство во Европската Унија.
Реафирмирајќи ја посветеноста на државава кон евроинтегративниот пат, Сиљановска-Давкова ја повтори позицијата дека билатералните прашања не треба да бидат пречка во пристапниот процес. Имајќи ги предвид турбулентните геополитички процеси во светот, таа укажа на потребата од одржување на кредибилитетот на политиката на проширување и нагласи дека регионов кој историски, географски и културно припаѓа на ЕУ, треба што поскоро да се интегрира во европското семејство.
Претседателката со задоволство ја прими информацијата од премиерот Санчез дека Шпанија е заинтересирана за зголемена економска соработка во делот на туризмот, инфраструктурата, земјоделието, енергетиката, соларната енергија и управувањето со водните ресурси.
Двајцата соговорници разговараа за соодветно одбележување на учеството на македонски борци во Шпанската граѓанска војна.
Македонија
Муртезани-Старовиќ: изразена подготвеност за заедничко делување кон целосна европска интеграција на двете земји

Министерот за европски прашања, Орхан Муртезани, денеска на маргините на Самитот посветен на Планот за раст на ЕУ што се одржува во Скопје, оствари билатерална средба со министерот за европски интеграции на Република Србија, Немања Старовиќ. Во оваа прилика, Муртезани му честиташе на министерот Старовиќ за неодамнешното именување на функцијата и изрази уверување дека заедничките напори ќе продолжат со нова динамика и проактивност во насока на унапредување на европската агенда на регионот.
Муртезани и Старовиќ разговараа за продлабочување на билатералната соработка, особено во контекст на спроведувањето на Планот за раст, кој претставува заедничка можност за засилување на регионалната економска поврзаност и приближување кон европските политики. Посебен акцент беше ставен на досегашната соработка врз основа на Меморандумот за разбирање меѓу двете министерства, како и на новите можности за иницијативи од заемен интерес, вклучително и прекуграничните програми за развој и инфраструктурно поврзување.
Министрите го нагласија значењето на доследна и координирана примена на европските реформи во регионот, како предуслов за реализација на економските и институционалните придобивки предвидени со новиот пристап на ЕУ. Во таа насока, беше изразена заедничка подготвеност за продолжување на блиската комуникација и заедничко делување кон целосна европска интеграција на двете земји.