Македонија
Гаревски: Изгорениот мост „Беласица“ најрано може да биде пуштен до 15 јули
10-15 јули е најоптимистичкиот рок за враќање во употреба на мостот „Беласица“, доколку анализите покажат дека нема оштетувања на конструктивнит елементи. Михаил Гаревски, поранешен директор на Институтот за сеизмички отпорни градби и климатски промени вели дека по првичната анализа утврдиле дека има оштетувања на горната коловозна плоча кои мора да бидат санирани без разлика на наодите од деталните анализи кои допрва ќе следат.
„Веќе е извесно дека горната плоча во должина од пет метри има оштетувања и мора да бидат санирани, можеби и целосно одново треба да биде излеана, а има и оштетувања на бетонот во делот каде што бил пожарот кои исто така мора да бидат поправени. Тоа, најоптимистички може да биде завршено до 10 – 15 јули, доколку се остане на вакви неконструктивни оштетувања. Дали ќе има потреба од посериозна санација, која не е возможно да се заврши за помалку од шест месеци, ќе покажат детаљните анализи“, вели експертот проф. Гаревски за „Макфакс“.
Тој најави дека во следните 20 до 25 дена ќе прават анализи и ќе подготват целосен извештај за состојбата на мостот. Вели дека ќе земат примероци од бетонот, но и од челичните кабли за пренапрегрегање кои се носители на конструкцијата за да утврдат колкаво е оштетувањето.
„За да ги утврдиме конструктивните оштетувања многу е битен типот на пожарот. Доколку бил хидрокарбонски, пожар кој се случува најчесто по излевање големи количини нафта, на пример и кога за 5-6 секунди се развива температура од 1000 степени, очекувани се големи конструктивни оштетувања. Според досегашните информации, пожарот не бил хидрокарбонски туку почнал од запалени алишта, но и тоа допрва ќе го утврдуваме во соработка со одговорните институции. Многу е битно да утврдиме дали се оштетени каблите за пренапрегање. Тие се изолирани, во бетонот се и не очекувам да имаат големи оштетувања, но тоа ќе го покажат анализите“, рече професорот Гаревски.
Голема грешка, според него е што нашата регулатива води сметка за заштита од земјотреси, а не се грижи за заштита од пожари оти трипати поголема е можноста мостот да падне по пожар отколку по земјотрес.
Гаревски вели дека голема олеснителна околност за мостот е тоа што конструкцијата не му е челична туку бетонкса, оти ако се работело за челична контрукција ќе било однапред јасно дека им оштетувања.
Институтот за сеизмички отпорни градби и климатски промени ја прави нанализата за издржливоста на мостот откако градоначалничката Данела Арсовска тоа го побарала од нив. Тие утрово на мостот направија заедничка прес-конференција за да известат дека скопјани треба да се воздржат уште 20-25 дена, кога ќе биде готов извештајот за мостот, за официјално да се соопшти колкави се оштетувањата и каква санација ќе биде потребна.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Поради утрешната посета на Руте посебен режим на сообраќај во Скопје
Утре во официјална посета на Република Северна Македонија ќе престојува генералниот секретар на НАТО, Марк Руте, соопшти МВР.
Поради посетата, Единицата за безбедност на патниот сообраќај ќе преземе мерки за воспоставување посебен режим на сообраќај во централното градско подрачје на Град Скопје.
СВР Скопје апелира до сите граѓани учесници во сообраќајот да ги почитуваат наредбите и насоките што ќе ги даваат полициските службеници, со цел безбедно и непречено одвивање на сообраќајот.
Македонија
Андоновски учесник на најголемиот светски конгрес за мобилни оператори – MWC26 во Барселона: во фокусот проектот „Роаминг како дома“
Министерот за дигитална трансформација, Стефан Андоновски денеска е во работна посета на Барселона, Шпанија каде учествува на MWC26 (Mobile World Congress) – најголемиот светски настан кој ги обединува креаторите на политики за дигитализација, претставници на телеком операторите и најголемите производители на мобилни уреди и дигитални решенија во светот.
Во рамки на својата посета, министерот се задржа на лобирање за принципот „роаминг како дома“, со цел понатамошно унапредување на условите за граѓаните и бизнисите преку намалување на трошоците за роаминг и приближување кон европските стандарди.
Министерот Андоновски беше дел од GSMA Ministerial Programme, каде се дискутираше за клучни политики и приоритети поврзани со поврзливоста, дигиталната инфраструктура, безбедноста и идните мрежни технологии.
„Ова е најголемиот светски настан кој ги обединува креаторите на политики за дигитализација, претставници на телеком операторите и најголемите производители на мобилни уреди во светот. Заедно со претставници на Влади и претставници на приватниот сектор, разговараме за прашањата кои најмногу ги засегаат нашите граѓани и корисниците, а тоа за нас секако е проектот „Роаминг како дома“ – што значи цени како дома за користење на мобилни услуги, СМС пораки и интернет било каде во Европската Унија. Можам да кажам дека од владите и од нашите меѓународни партнери добиваме голема поддршка за овој проект, но и разбирање од големите телеком оператори“, истакна Андоновски.
Министерот додаде: „Во текот на денот имав можност да се сретнам со мобилни оператори кои се присутни во Македонија, но и со бројни светски производители на опрема, даватели на облак (cloud) услуги, каде што разговаравме за најважните прашања кои во моментов го засегаат секторот на дигитализација: изградба на дата центри, вештачка интелигенција, сајбер безбедност и целосна дигитална трансформација на општеството.“
Македонија
Сиљановска-Давкова со претставници на Фондацијата Роми за Европа и Ромскиот образовен фонд: образованието е клучен фактор на социјалната мобилност
Претседателката Гордана Сиљановска-Давкова оствари средба со Лолита Хасани Грасман, советник за институционална соработка и комуникација во Фондацијата Роми за Европа со седиште во Брисел и Реџепали Чупи, директор на Ромскиот образовен фонд за нашата држава и Србија, со седиште во Букурешт.
На средбата, соговорниците ја информираа претседателката за тековните активности насочени кон развој на вештини, образовни програми, зголемување на можностите за вработување и одржливо економско учество на Ромите.
Гостите изразија желба и надеж за соработка со Владата заради унапредување на економската инклузија на ромската заедница како и нејзино економско зајакнување. Исто така, беше најавено дека Ромскиот образовен фонд планира да отвори ХАБ центар во Шуто Оризари којшто ќе работи со деца, родители и наставници на дигитализација, нови методологии на учење и развој на вештини за идно вработување и лидерство.
Претседателката нагласи дека образованието е клучен фактор на социјалната мобилност, оти помага во градењето самодоверба и лидерство. Според неа, младите образовани Роми стануваат инспиративни модели во заедницата и носители и двигатели на позитивни промени. За неа, инклузијата во предучилишното и основно образование директно влијае врз понатамошниот успех на ромските ученици, бидејќи без квалитетно образование, можностите за пристојно и достоинствено вработување се ограничени.
Таа смета дека пристапот до образованието на децата Роми е приоритет, оти само преку рана и континуирана образовна вклученост, можеме да обезбедиме социјална интеграција, заштита од ризици и еднакви можности за иднината. Според претседателката, економската и образовната интеграција на Ромите е важна за општествениот развој, оценувајќи дека партнерството со меѓународните организации може да придонесе за зајакнување на нивните можности и шанси за долгорочна интеграција. Заедничките иницијативи се клучни за унапредување на положбата на ромската заедница и напредок, смета таа.

