Македонија
Германскиот амбасадор Томас Герберих во посета на Битола

Германскиот амбасадор Томас Герберих престојуваше во Битола, при што со градоначалничката Наташа Петровска ги посетија Германските гробишта, а потоа одржаа работна средба во нејзиниот кабинет.
Во фокусот на интерес на амбасадорот се најдоа многубројни теми од општествениот и економскиот живот во градот под Пелистер.
„За нас како општина е важно што ја имаме поддршката за заемна соработка со Германија, што ја искажа и амбасадорот на оваа земја, Томас Герберих. Инвестициите на германските компании во градот, соработката што се одвива на ниво на високообразовниот процес и сè поголемиот интерес за изучување на јазикот, но и за вложување на нови компании, беа дел од темите на разговор. Особен интерес амбасадорот покажа и за Германските гробишта, масовна гробница на загинатите војници од Првата светска војна, каде што е предвидено да се одржи манифестација по повод 11 ноември“, рече градоначалничката на општина Битола, Наташа Петровска.
Амбасадорот Томас Герберих потенцира дека од неговиот мандат во Македонија ова е трета работна посета на Битола, град често посетен од многубројни германски гости и уште еднаш потенцира колку се добри врските помеѓу Македонија и Германија.
„За нас е многу важно што во Битола ги имаме Германските гробишта. Секогаш кога го одбележуваме 11 ноември, денот на сеќавањето на загинатите од Првата светска војна, тогаш сакаме да испратиме и знак на помирување. Оваа година се одбележуваат 100 години од завршувањето на Првата светска војна и едноставно сакаме да покажеме со тој процес на помирување кој веќе се случи со Франција, како од смртни непријатели станавме пријатели. Ако тоа беше можно меѓу нас и Франција, тогаш тој процес е можен и овде, на Балканот“, рече германскиот амбасадор, Томас Герберих.
Амбасадорот упати пофални зборови и до работата на Германско-македонското друштво за соработка, кое повеќе од 25 години ги афирмира вредностите на оваа земја, предводено од Валентина Илиева.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЗНМ: Апелите од Министерството за здравство се на граница на цензура

Здружението на новинари на Македонија (ЗНМ) со загриженост ја следи јавната комуникација на Министерството за здравство, во која се упатуваат апели до медиумите кои се ограничувачки по својата содржина и претставуваат обид за воспоставување на лоша институционална пракса во односите со медиумите.
„Како ЗНМ, го осудуваме обидот на Министерството да наметнува практични правила за тоа како медиумите треба да известуваат, особено кога тоа се однесува на чувствителни настани од јавен интерес. Таквите инструкции, иако формално претставени како апели, во суштина се форма на институционален притисок и можна цензура, што е спротивно на основните демократски принципи и правото на слобода на изразување“, велат од ЗНМ.
Потсетуваат дека членот 16 од Уставот гарантира слобода на јавното информирање и забрана на цензурата, а прашањата поврзани со новинарската етика и професионализмот припаѓаат исклучиво на саморегулаторната сфера. За тие прашања постојат Советот за етика во медиумите и Судот на честа при ЗНМ, кои се единствено надлежни да оценуваат евентуални повреди на етичките норми.
„Ги повикуваме новинарите и медиумските работници да продолжат да известуваат со професионализам, етика и чувствителност, особено кога се работи за трагични настани и ранливи групи. Но истовремено, укажуваме дека секој обид за институционално ограничување на пристапот до информации и начинот на известување е неприфатлив и штетен по јавниот интерес“, велат од Здружнието.
ЗНМ останува отворено за дијалог со институциите со цел унапредување на транспарентноста и заемната соработка, но цврсто стои во одбрана на уредувачката независност, медиумската слобода и правото на јавноста да биде информирана – како темелни вредности на секое демократско општество.
Македонија
Евакуација во Психијатриската болница Бардовци, пожарот го зафати дворот

Попладнево избувна пожар во населбата Геге кој се прошири кон населбата Бардовци и зафати дел од површината на дворот на Психијатриската болница Бардовци, обраснат со висока сува трева и дрвја.
Од Центарот за управување со кризи (ЦУК) информираа дека пожарот претставувал опасност да се прошири во целиот комплекс на болницата. Пациентите и персоналот веднаш биле евакуирани, безбедно изнесени надвор од кругот на болницата.
ЦУК под водство на директорот Мухамед Али, побарал дополнителни сили од Бригадата за противпожарна заштита (БППЗ) и координирал со Хеликоптерската единица на Министерството за внатрешни работи (МВР). Првично се разгледувала можноста за пренасочување на воздушната поддршка, која дејствувала во општина Чучер Сандево – Блаце, за да помогне во гаснењето на пожарот во Бардовци.
Во моментот, пожарот е ставен под контрола и нема потреба од дополнителна воздушна поддршка. Хеликоптерот на МВР останува ангажиран кај Блаце, општина Чучер Сандево.
На лице место, заедно со директорот на ЦУК, Мухамед Али, беше и директорот на болницата, Иса Абдулаи, кои ја координираа целата акција.
Македонија
Хеликоптер го гасне пожарот кај Блаце

Хеликоптер на Министерството за внатрешни работи е веќе вклучен во акцијата за гаснење на пожарот кој избувна над магистралниот пат Скопје – Граничен премин Блаце.
Пожарот избил на потегот пред тунелот, од десната страна на коловозот. Зафатил тежок и непристапен терен, па по дојава на бројот за итни случаи 112, Центарот за управување со кризи (ЦУК) веднаш побарал воздухопловна поддршка. Хеликоптерската единица бргу се активирала, а акцијата на терен се координира заедно со припадници на противпожарните служби и други надлежни институции.