Властите имаа цели 5 месеца да ја превенираат ,најавуваната од Мицкоски дестабилизација, а тотално потфрлија, велат од политичката партија Левица.

Од тука ги оценија како скандалозни изјавите на премиерот Христијан Мицкоски и министерот за внатрешни работи, Панче Тошкоски, коишто при вчерашниот тотален хаос, беззаконие и безредие при прославата на албанското знаме, упатија честитки и задоволство од наводното професионално, соодветно, навремено и државничко постапување на полицијата.

„Денешните изјави на министерот Панче Тошковски и премиерот Христијан Мицкоски дека при синоќешните нереди полицијата постапила професионално, соодветно, навремено и државнички, се врв на цинизмот и навреда за македонскиот народ! Како може да се нарече професионално тоа што полицијата не презеде никаква акција додека вооружени лица во центарот на градот пукаа со огнени оружја?! Како може да биде државнички кога полицијата немо стоеше додека македонските национални симболи беа газени, палени, понижувани, демонстративно уништувани?! Омраза се ширеше неконтролирано, без никакви обиди за спречување на ескалацијата“, велат од Левица.

Од тука додаваат дека вчера низ улиците на македонските градови, македонските граѓани беа оставени сами на себе – загрозена им беше безбедноста, се блокираа улици, се промовираше насилство и омраза, а полицијата беше само декор и одби да постапи согласно своите должности и надлежности за превенција и зачувување на јавниот ред и мир.

„Оттука, им укажуваме на Мицкоски и Тошковски дека нивната сервилност кон коалициониот партнер ВРЕДИ, коишто беа организатори на повеќе провокаторни настани ширум државата, е она што ќе го прелее трпението на македонските граѓани. Според информациите, коишто ги изнесоа медиумите, биле пријавени повеќе од 750 инциденти, но приведени се само осум лица“, велат од Левица.

Додаваат дека македонскиот народ и Левица бараат неселективна правда, достоинство, безбедна држава, а не влада која толерира хаос и ја потценува интелегенцијата на граѓаните на сметка на коалициониот мир.

Амбасадата на Република Србија во Македонија најостро го осудува вандалскиот чин што се случил синоќа на Денот на албанското знаме, кога од фасадата на зградата на Конзулатот на Република Србија во Куманово, во доцните вечерни часови, младо машко лице, обвиено со албанско знаме, насилно ја отстранило таблата со грбот на Република Србија и натписот „Конзулат на Република Србија во Куманово – Почесен конзул“, напишан на српски и македонски јазик.

Притоа, Амбасадата на Република Србија во Скопје изразува длабока загриженост во врска со вчерашното сквернавење на државните симболи на Република Србија и загрозување на безбедноста на просториите на Конзулатот на Република Србија во Куманово, особено имајќи го предвид фактот дека просториите на дипломатско-конзуларните претставништва и резиденцијални објекти наменети за членовите на дипломатскиот персонал на Република Србија, не е првпат да бидат предмет на вандалски напади во земјава.

Во овој поглед, Амбасадата нагласува дека е целосно посветена на соработка со надлежните органи на Република Северна Македонија, со цел што поскоро откривање и процесуирање на сторителот на насилниот чин, чиј идентитет, како што велат, може недвосмислено да се утврди врз основа на достапните снимки од безбедносни камери.

Амбасадата на Република Србија нагласува дека останува посветена на негување пријателски односи со Република Северна Македонија и изразува уверување дека надлежните органи на земјата домаќин, во духот на развиените билатерални односи и добрососедството, ќе направат се за да се реши овој случај на адекватен начин.

Обвинителството поднесе предлог за притвор за три лица за уништувањето на македонското знаме синоќа во централното градско подрачје.

Од тука информираа дека поведена е постапка против три полнолетни лица за предизвикување омраза, раздор или нетрпеливост врз национална, расна, верска и друга дискриминаторска основа. Против уште едно малолетно лице ќе се води редовна постапка според Законот за правда за децата.

„Осомничените на 28.11.2024 година околу 20:00 до 23:00 часот на булевар „Крсте Мисирков“ во Скопје, по завршување манифестација на плоштадот Скендербег по повод прослава на денот на албанското знаме, со излагање на подбив на национални симболи, односно со палење, уништување и кинење на државното знаме, предизвикале омраза, раздор и нетрпеливост врз основа на етничка припадност“, велат од Обвинителството.

За полнолетните осомничени надлежниот јавен обвинител до судијата на претходна постапка од Основниот кривичен суд Скопје достави предлог за определување мерка притвор. Со оглед на тоа што е скратена постапката за ова кривично дело, притворот, доколку го определи судот, би бил осум дена, појаснуваат од Обвинителството.

Министерот за внатрешни работи, Панче Тошковски претходно соопшти дека за случајот синоќа биле уапсени осум лица, од кои четири за предизвикување верска и национална омраза.

„Четири од нив се уапсени поради тоа што сториле прекршок, учествувале во тепачка, а другите четири лица се уапсени поради тоа што за нив имаме основано сомнение дека сториле кривично дело 319 од Кривичниот законик, кое се однесува на предизвикување национална, расна и верска омраза, раздор и нетрпеливост, а за што е предвидено минимална казна од една година затвор. За тие четири лица ќе бидат поднесени соодветни кривични пријави за ова дело“, рече Тошковски.

Тој упати порака до сите што имаат на ум да предизвикаат какво било сценарио за дестабилизација на Македонија дека МВР ќе одговори жестоко.

Сквернавењето на државното знаме се случи во центарот на Скопје, придружено со пукање и ненајавено блокирање на скопските улици за време на прославата на Денот на албанското знаме. Дивеењето беше осудено од политичките чинители.