Македонија
Дескоска: Проверката не може да заврши пред изборите

Во организација на Институтот за европски политики (ЕПИ) и Асоцијацијата за развојни иницијативи „Зенит“ се одржа дијалог за јавни политики на тема „Имплементација на стратегијата за реформа на правосудниот сектор 2017-2022 година“, на кој учествуваше и министерката Дескоска.
Во изјава за медиумите Дескоска истакна дека најголемиот дел од законите е донесени, но дека недостига нивна имплементација.
„Останува клучниот предизвик на Советот на јавните обвинители и Судскиот совет да почнат со спроведување на реформите со цел да добиеме независно професионално судство и особено Јавно обвинителство имајќи предвид дека клучните почетоци на сите постапки во борба против криминалот и корупцијата треба да почнат од Јавното обвинителство. Уште пострашно е ако какви било сомневања постојат дека во Јавното обвинителство се затајуваат одредени предмети, дека не се преземаат одредени активности, без оглед дали станува збор за активности на самите јавни обвинители или со други носители на функции“, истакна министерката за правда, Рената Дескоска.
За ветингот, односно проверката, министерката истакна дека процесот на ветинг бара двотретинско мнозинство, а дека тој процес не може да заврши пред изборите.
„Ниеден процес не треба да биде избрзан, но мене ми е драго дека веќе се јакне свеста и се отвора дебата и во рамките на самите правосудни институции дека потребни се одредени корекции во нивното работење“, потенцира Дескоска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Пожар меѓу селата Долно Соње и Добри Дол

Од Центарот за управување со кризи информираат дека преку Е-112 била добиена пријава за пожар помеѓу с.Долно Соње и с.Добри Дол во Општина Сопиште.
Од ЦУК појаснуваат дека гори смрека.
Веднаш била известена Бригадата за противпожарназаштита БППЗ на Скопје.
„Воздухопловна поддршка на пп силите на земја се трите пп авиони на ДЗС“, велат од ЦУК.
Македонија
Кај „Треска“, место 12.500, ќе има над 33.000 жители, Уставен одби да го преиспита планот

Згасна и последната надеж на жителите на Центар за спречување на бетонизацијата на местото на поранешната фабрика „Треска“ оти Уставниот суд ја отфрли иницијативата за оценување на уставноста на важечкиот урбанистички план, кој предвидува изградба на згради – наполитанки и има низа неусогласености со Генералниот урбанистички план за Скопје. Граѓаните и експертите имаа низа забелешки за планот, но без оглед на тоа, неговата реализација почна и веќе се изведуваат првите згради.
Од граѓанската иницијатива „Шанса за Центар“, кои заедно со адвокатката Сузана Јошевска ја поведоа иницијативата пред Уставен суд, сега велат дека случајот на „Треска“ покажа оти Устав се менува, но ДУП никако.
„’Треска’ тресна на Уставен! Уставниот суд, без расправа и повикување експерти, ја отфрли иницијативата за оценување на уставноста на планот за Буњаковец, во кој спаѓа и просторот на ‘Треска’. За жал, се потврди правилото ‘Устав може да се смени, ама ДУП никако’. На здравје нека се во Буњаковец:
⚫ над 1 милион квадратни метри изградена бруто-површина за домување наместо 400.000, што ги дозволува ГУП;
⚫️ над 60 % изграденост за домување наместо 22 % колку што дозволува ГУП;
⚫️ над 33.000 жители наместо 12.500 колку што дозволува ГУП;
⚫️ над 9.300 просечен број на семејства наместо 3.400 колку што дозволува ГУП;
⚫️ 0,36 квадратни метри зеленило на жител или ич;
⚫️ густина на изграденост со планираните висини со кои не се обезбедува минимален стандард за нормално хумано живеење или доволна аерација и минимални 2 часа осончаност;
⚫️ уште подолги листи за чекање за запишување во градинка, училишта…
На здравје нека се ‘наполитанките’“, реагираат од граѓанската иницијатива „Шанса за Центар“.
Иницијативата за преиспитување на планот беше поднесена во јули годинава кога веќе беше извесно дека некои од зградите ќе се изградат, а целта беше да се запрат оние објекти што сè уште немаат одобренија за градење, а се предвидени во планот.
Македонија
Фирма во Македонија рекламирала чаеви користејќи лажно имиња на тројца лекари

Скопското Обвинителство до надлежниот суд поднесе предлог за издавање казнен налог против едно физичко лице и фирма, кои се обвинети за злоупотреба на лични податоци, односно рекламирале чаеви притоа лажно користејќи имиња на лекари.
Обвинетиот 34-годишник, како одговорно лице во фирмата, во периодот од ноември 2022 до април 2023 година, спротивно на условите утврдени во член 10 и член 96 од Законот за заштита на личните податоци, без согласност на тројцата оштетени лекари, ги користел нивните лични податоци – фотографија, име и презиме за онлајн-продажба на два производа, објави Обвинителството.
Личните податоци на секој од оштетените лекари биле злоупотребени како тие со својот професионален авторитет да ги рекламираат и препорачуваат чаевите „паразол“ (Parazol) и „хипертеа“ (Hypertea), кои на територијата на државава ги увезувало и дистрибуирало обвинетото правно лице.
„Лажните интервјуа и објавите преземани и споделувани на повеќе веб-страници и социјални мрежи, со здравствени тврдења и лажни медицински препораки за овие производи што оштетените никогаш не ги дале, обвинетиот ги искористил за незаконита обработка на личните податоци и директен маркетинг“, наведоа од Обвинителството.
Надлежниот јавен обвинител му предложи на судот да ги огласи за виновни и одговорното лице да го казни со единствена парична казна од 70 дневни глоби со висина на дневната глоба од 30 евра во денарска противвредност, а правното лице да го казни со единствена казна од 300.000 денари. Во согласност со предлогот на Обвинителството, обвинетите по пресудата ќе треба да ги надоместат трошоците на постапката, а секој од оштетените лекари ќе има можност во граѓанска постапка да си го оствари своето имотно-правно побарување за нанесената штета со злоупотребата на личните податоци.