Македонија
Димитриевски избран за претседател на партијата Движење Знам: Македонија се буди, време е за промени

Градоначалникот на општина Куманово, Максим Димитриевски, на вчерашното основачко собрание на политичката партија Движење Знам – За наша Македонија беше избран за претседател на новиот политички субјект Знам ветувајќи дека заедно со сите членови, заедно со граѓаните, ќе ги направи суштинските промени на политичката сцена во Македонија, почнувајќи од воспоставување ред и поредок, казнивост, одговорност и транспарентност и отчетност, кои се суштината и сржта на еден правен поредок во секоја организирана држава.
„Ние во Македонија сите мора да имаме еднакви права и обврски бидејќи денеска живееме во длабоко поделено општество, во кое се делиме на наши и ваши, брат со брат, поради политика, во државата не се разговара. Нашата цел е да го обединиме граѓанинот, да ги обединиме сите, без разлика какво е нивното политичко убедување и да им кажеме НЕ на актуелните политички елити што се одделија од народот. Тој што со народот не се дружел, не е вистинска власт. Живееме во време и невреме во кое правда и мир има само за нив, еднаквост наводно за сите, а подобар живот само за нивните деца“, рече лидерот на новиот политички субјект Знам – За наша Македонија, Максим Димитриевски.
Политичкиот субјект Знам – За наша Македонија ќе има цел да работи на обединувачка агенда вложувајќи во најмладите, но и вреднувајќи го трудот и влогот што го дале највозрасните, без разлика на нивната политичка определеност, етничка или верска припадност.
„Ние денеска сме сведоци на тоа што тие што најмногу дадоа за оваа држава до 80-тите и 90-тите години ги мерат улиците и протестираат и крај со крај не може да сврзат. Тие што нè пораснаа и нè израснаа, тие што своите најубави години, наместо да ги живеат со внучињата дома, ги поминуваат на улица затоа што нема правда за нив. Затоа што гледаат дека тоа што го градеа своевремено во онаа СФРЈ со лопата, денешните генерации од аспект на политички елитизам го рушат со багер секојдневно и сè уште не може да го срушат. Затоа се охрабривме, и леви и десни, и неопределени, вечерва, овде симболично во оваа сала во Куманово, да дејствуваме заедно и да ја формираме новата и најголема политичка сила на македонската политичка сцена. Заради идните, младите генерации, тие што вчера завршија, тие што денеска студираат и тие што утре ќе учат и ќе се надградуваат“, потенцира тој.
Македонија мора да оди напред, да се менува, да носи промени, кои ќе креираат подобар живот за сите граѓани еднакво, а политичката партија Движење Знам – За наша Македонија е формирана од тим на луѓе од разни профили, кои ќе ги донесат тие промени.
„Јас како Максим Димитриевски знам дека не можам да сторам ништо и затоа ми е чест што во овој тим на луѓе, со кои заедно ќе ми биде чест да се борам, имаме и пензионирани генерали, пензионирани припадници на АРМ и пензионирани луѓе од делот на безбедноста, универзитетски професори, луѓе од научната фела, но најбитно е – го имам работничкото срце со нас, го имаме и пензионерот, и студентот, и лекарот, и земјоделецот и го имаме темпераментот на секој Балканец, на секој Македонец и секој друг што живее во оваа држава. Јас знам дека ние можеме да успееме заедно со тоа што ќе направиме суштинска промена и ќе кажеме КРАЈ на една лоша ера и да почнеме да ја пишуваме новата историја на Македонија за сите. Македонија се буди, време е за промени“, порача Димитриевски.
Иницијативата за формирање политички субјект Движење Знам – За наша Македонија беше потпишана на 9 октомври оваа година по иницијатива на 10 граѓански здруженија и граѓани од Македонија. На вчерашното основачко собрание на политичката партија Движење Знам – За наша Македонија за членови на извршниот одбор беа избрани генерал Павле Арсоски, Жанета Делова и Игор Филков, а за членови на надзорниот одбор се избрани Ристо Николовски, Марјан Петковски и Урош Милошевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мухамед Елмази до Арсовска: Ќе барате ли од вашите партнери да се откажат од бесправните објекти, ќе побарате ли и тука дигалка или ќе свртите глава

Мухамед Елмази од „Влен“ на прес-конференција денеска, упати неколку прашања до градоначалничката на Град Скопје, Данела Арсовска.
„Денес сме тука да поставуваме неколку прашања за госпоѓата Арсовска. Госпоѓа Арсовска дали знаете кој е сопственик на оваа зграда? Дали објектот е де факто на вашите коалициони партнери во Градот и во бизнисот?
На какво земјиште е изграден, на државно или приватно?
На чие земјиште е изграден – државно, општинско или приватно? Дали имало располагање со државно земјиште без валидна јавна постапка?
Кој е вистински сопственик на оваа зграда?
Дали во документацијата се води на друго име за да се сокрие вистинскиот сопственик?
Ако да, зошто инспекциските служби не отвориле постапка за лажно пријавување? Дали овој објект го има во урбанистичките планови?
Дали деталниот урбанистички план (ДУП) воопшто предвидува ваков објект на оваа парцела? Ако не, кој и кога дал согласност за отстапување од планот? Дали вие сте учесник во тоа?
Дали е спроведен инспекциски надзор од Општина Сарај? Дали Градежниот инспекторат има издадено решение за уривање или забрана? Ако не – зошто бројните пријави од локалното население останале без одговор“, праша Мухамед Елмази на денешната прес-конференција.
„Г-ѓо Арсовска, пред да продолжите да зборувате за „дивоградби“ и „заштита на јавниот интерес“, одговорете: ќе барате ли од вашите партнери да се откажат од бесправните објекти? Ќе побарате ли и тука дигалка или ќе свртите глава затоа што станува збор за ваш пријател и коалициски партнер? Попатно, прашајте го и Димитар Апасиев?
ВЛЕН ќе инсистира на: Итно постапување на сите градежни инспекциски служби; Итно постапување на финансиската полиција за откривање на скриениот имот за политичарите од ДУИ; Отпочнување кривична постапка за злоупотреба на службена должност и урбанистички криминал против Арсовска; Јавна објава на сите локации во Скопје каде фирми или лица поврзани со кланот на ДУИ градат или поседуваат диви објекти.
Доколку градоначалничката и надлежните служби продолжат да молчат, ќе ги искористиме сите правни и демократски механизми за да го заштитиме интересот на граѓаните. Ќе го спречиме ширењето на бизнис империјата на кланот на ДУИ, во која припаѓа веќе и Арсовска“, изјави Мухамед Елмази.
Македонија
Арсовска до Мухамед Елмази: Дали си ти криминалец од ДУИ или од ВЛЕН?

„Таман мислиш не може да демонстрираат поголем очај за криминалот во кој се фатени, тие наоѓаат нов првенец од ДУИ! Мухамед Елмази беше член на Совет на град Скопје во овој мандат и истакнат член на ДУИ до септември 2024 година, кога претрпе магична трансформација и стана ВЛЕН за да го постават директор на државното НОМАГАС“, напиша градоначалничката на Град Скопје, Данела Арсовска на социјалните мрежи.
„Вчера барав на седница да се зборува за нелегални дивоградби во сите 10 скопски општини, ама Мухамед, иницијативата за дивоградбите од Сарај твоите коалициски партнери од ВМРО ја покренаа и сами си ја повлекоа.
Изгледа си пропуштил вчера на седница на совет кога побарав да се испитаат незаконските легализации на дивоградби во сите скопски општини вклучително Чаир и Сарај. Затоа што сакаш да глумиш политичар и на национална база да го сведеш ВАШИОТ криминал, читај тука: ЈАС ЗБОРУВАМ СО ФАКТИ И ЗА СЀ ИМАМ ДОКАЗИ.
Сега Мухамед да те прашам:
1. Дали си ти криминалец од ДУИ или од ВЛЕН?
2. Дали знаеш дека од 150 дивоградби од Чаир кои ги имаме фатено и сме известиле во изминативе 3 години, знаеме во која имаш ГРАТИС стан и живееш во истиот.
3. Дали знаеш дека следен тој предмет ќе го носам во јавното обвинителство бидејќи империјата на ТВОЈАТА УРБАНА МАФИЈА ќе ја срушам и воопшто не ми е гајле од која партија доаѓа!“, додаде Арсовска.
Македонија
Сиљановска-Давкова ги прими акредитивите на новоименуваниот амбасадор на Република Кореја, Ким Донгбае

Претседателката Гордана Сиљановска-Давкова ги прими акредитивните писма на новоименуваниот амбасадор на Република Кореја со седиште во Софија, Ким Донгбае.
Посакувајќи му добредојде на амбасадорот Донгбае, таа изрази задоволство од пријателските односи и од конструктивната соработка меѓу двете држави, по воспоставувањето на дипломатските односи во 2019 година. Оцени дека постои волја и посветеност за искористување на потенцијалите и интензивирање на соработката во сите сфери од заемен интерес.
Претседателката ја посочи важноста од развојот на соработката, потенцирајќи дека корејската економија нуди големи можности за партнерство во повеќе области, особено во информатичката технологија, дигитализацијата и обновливите извори на енергија, а од друга страна, нашата држава со стратегиската локација во срцето на Балканот, нуди поволни услови за корејските инвеститори и компании.
Таа изрази уверување и подготвеност за натамошен развој на соработката на мултилатерален план, особено во рамките на Обединетите нации. Малите и средни земји, според неа, треба да дејствуваат единствено, можат да понудат знаење и заслужуваат да имаат посилна улога во одлучувањето за глобалните прашања.
Обајцата ја истакнаа потребата заеднички да работат на отворање на резидентни амбасади во Скопје и во Сеул.
Сиљановска-Давкова, во духот на начелото на реципроцитет, побара да се укинат визите за македонските граѓани, со оглед на фактот на нивното непостоење за граѓаните на Република Кореја.
Амбасадорот Донгбае оцени дека по воспоставувањето на дипломатските односи пред шест години, двете држави станаа успешни партнери и изрази спремност за нивно продлабочување и проширување. Тој го посочи развојот на економската соработка како приоритет во неговата работа.
Претседателката Сиљановска-Давкова упати честитки по повод изборот на Ли Џе-Мјунг за нов претседател на Република Кореја на вчерашните вонредни претседателски избори.
На амбасадорот Ким Донгбае му посака успех во извршувањето на одговорната дипломатска мисија.