Претседателот на државата, Стево Пендаровски напладне во Вилата Водно му го предаде мандатот за составување нова влада на лидерот на СДСМ, Зоран Заев.

Церемонијата се случи откако Заев, во име на коалицијата ‘Можеме’, која има освоено најголем број пратенички мандати во Собранието, го информирал вчера претседателот Пендаровски за преговорите со повеќе партии за обезбедување на неопходното мнозинство во Собранието за избор на влада.

„Чест и одговорност ми е што согласно Уставот како предводник на СДСМ и коалицијата „Можеме“ денеска од страна на претседателот Пендаровски го добивам мандатот за нова демократска, европска влада со институции коишто подобро ќе им служат на граѓаните“, рече Заев. Тој најави дека во рок од 20 дена ќе изготват програма и ќе направат обид за составување на стабилна влада.

Битолското јавно обвинителство поднесе обвинение против двајца браќа од Битола на возраст од 51 и 52 години, од кои едниот се товари за продолжено кривично дело – прикажување порнографски материјал на дете, додека двајцата како соизвршители сториле и кривично дело – производство и дистрибуција на детска порнографија.

Првиот обвинет, во периодот од јули до септември 2016 година злоупотребил девојче кое тогаш било на возраст од 13 години, за изработување на слики со порнографска содржина.

Преку фејсбук-профил со друго име во повеќе наврати комуницирал со девојчето, преку лажни онлајн адреси физички лоцирани во Нов Јужен Велс, Австралија, каде обвинетиот престојувал од 30 март 2016.

Притоа го убедил девојчето, за кое знаел дека е малолетно и нема навршено 14 години, да направи интимни видео клипови со порнографска содржина.

Откако девојчето му ги испратило снимките, во зимата 2017 година тој овие видеа со детска порнографија ги прикажал на друго девојче кое не наполнило 14 години, испраќајќи и ги од истиот фејсбук профил во порака.

Во периодот меѓу 9 септември 2010 година и 30 март 2016 година, во Битола, обвинетите браќа, како соизвршители, преку компјутерски систем набавиле и поседувале над 8.000 слики и видеа со содржина на детска порнографија, сочувани на хард диск и ДВД-а кои биле пронајдени и одземени при претрес на нивната куќа.

Фотографии со детска порнографија биле пронајдени и при проверка на нивните мобилни телефони.

Еден од обвинетите во текот на истражната постапка подолго време бил недостапен за органите на прогонот, па неговото присуство во текот на постапката било обезбедено во постапка за екстрадиција со помош на Интерпол и надлежните органи на Грција.

Дел од доказите во прилог на обвинителниот акт биле обезбедени преку инструментите на меѓународна правна помош од Австралија.

Надлежниот јавен обвинител до Основниот суд Битола доставил и предлог за продолжување на мерката притвор за првиот обвинет, кој се наоѓа во притвор откако бил уапсен во Грција и екстрадиран во земјава.

Како основ за продолжување на притворот се наведува опасност од бегство, можност за влијание врз сведоците, како и можност да го повтори делото кое му се става на товар.​

За време на викендот времето ќе биде нестабилно со пороен дожд и грмежи ќе биде на повеќе места, а локално процесите ќе бидат поинтензивни во форма на невреме со пообилен дожд (над 10 литри за 3 часа), засилен ветер и појава на град.

Локален пороен дожд и грмежи во попладневните часови ќе има и од понеделник, соопшти УХМР.