Mинистерот за надворешни работи на Република Македонија, Никола Димитров, денеска оствари средба со министерот за Европа и Америка во британскиот Форин офис, сер Алан Данкан, кој престојуваше во работна посета на Република Македонија.

Посетата на министерот Данкан претставува израз на силната и континуирана поддршка на Велика Британија за напорите на Република Македонија да стане рамноправен член на европското и евро-атлантското семејство на слободни и просперитетни нации.

На средбата беа разменети мислења за актуелните случувања во нашата земја – реформските приоритети за нашата интеграција во ЕУ и НАТО, регионалната соработка, британскиот ангажман во рамките на Берлинскиот процес, преговорите со ЕУ за брегзит, како и за активностите поврзани со успешна реализација на референдумот на 30 септември.

Министерот Димитров изрази благодарност за јасната и континуирана помош од Велика Британија во однос на македонските европски и евро-атлантски аспирации, истакнувајќи ја важноста на Самитот за Западен Балкан, што се одржа во јули во Лондон. Зголемената динамика во билатералните односи меѓу двете земји во последниот период претставува дополнително охрабрување за нашата земја да продолжи по вистинскиот пат.

Бритински министер Данкан го поздрави постигнатиот напредок во реформите за приближување на Република Македонија кон ЕУ и НАТО, посебно акцентирајќи го примерот што го дава нашата земја во градењето пријателски односи во регионот на ЈИЕ, преку надминувањето на споровите со соседите, склучувајќи ги договорите со Бугарија и со Грција. Исто така, министерот Данкан го подвлече значењето  на резултатот од референдумот на 30 септември, како и важноста на постигнување уште повидливи резултати во домашните реформи во периодот што следи, во насока на што поскоро интегрирање на нашата земја во НАТО и во ЕУ.