Сојузот на здруженијата на дијабетичарите бара непречено функционирање на центрите за дијабетес во услови на Ковид-19.
Од таму укажуваат дека пациентите со дијабетес имаат потреба од редовни прегледи и контроли.

„Во согласност со моментната состојба предизвикана од Ковид-19, свесни сме дека одреден број пациенти не се во состојба за преглед со физичко присуство и за таа група пациенти ја поздравуваме можноста за издавање електронски рецепт, како што впрочем се одвива непречено процесот тековно. На ваков начин се обезбедува континуитет во достапноста на потребната терапија, што е мандаторно за нашата добра здравствена состојба. Но, да не заборавиме дека меѓу нас има и пациенти што се со влошени резултати и кои имаат потреба од редовни посети во центрите за дијабетес.

Знаејќи го ова, како национална пациентска организација укажуваме дека имаме потреба од непречено функционирање на сите центри за дијабетес. Она што е за нас прифатливо минимум, за квалитетна дијабетолошка грижа, во оние градови во кои имаме неповолна епидемиолошка слика на Ковид-19 е центрите за дијабетес да функционираат нормано (тим интернист/сестра) минимум три од пет работни дена со термини за редовни прегледи. Во сите други денови од работната недела имаме потреба дијабетолошките сестри да бидат на своето работно место во центрите за дијабетес.
Во оние градови каде што не постои влошување на ситуацијата од Ковид-19, очекуваме центрите за диајбетес да функционираат непречено во текот на целата работна недела“, се вели во соопштението.