Претседателот Стево Пендаровски денеска се обрати на регионалната Конференција за медиумска писменост ЕУ-Западен Балкан на тема Справување со дезинформации, во организација на Делегацијата на Европската Унија и Македонскиот институт за медиуми.

Во обраќањето, Пендаровски порача дека константно треба да се работи на подигнување на нивото на медиумска писменост кај јавноста, за граѓаните да можат полесно да ги разликуваат вистината и фактите од манипулациите.

„На тој начин, ќе помогнеме во развивањето на институционален и личен имунитет кон опасниот вирус на дезинформациите и пропагандите“, истакна претседателот.

Тој се повика на многу истражувања на оваа тема кои, како што рече, покажуваат дека дезинформациите најчесто не се спонтани.

„Тие, имено, се производ на планиран пристап кон одредена тема. Намерата е системски да се манипулира јавноста со пласирање на погрешни информации, а, со крајна цел, да послужи на интересите на одредени политички или бизнис центри на моќ. На тој начин, интернетот, како алатка која секојдневно ја употребуваат милијарди луѓе, многу лесно може од платформа за информирање да стане платформа за дезинформирање“, нагласи Пендаровски, додавајќи дека многу држави во светот ги препознаваат и ги третираат дезинформациите како една од приоритетните закани за нивната национална безбедност.

Според претседателот, потребно е да се обезбедат подобри услови за професионално и независно работење во медиумите и справување со дезинформациите.

„Тоа подразбира и доследна имлементација на постојната регулатива и нејзино подобрување на линија на европските стандарди во оваа сфера. Исто така, потребно е да ги поддржиме саморегулаторните механизми во медиумската сфера, како и платформите за проверка на фактите“, порача Пендаровски.

Претседателот Стево Пендаровски денеска се обрати на свечениот научен собир „Современата македонска држава – две етапи во процесот на нејзиното формирање и развој: 1941 – 1991/1991 – 2021 година“.

„Држава направивме и неа нема да ја изгубиме, но воопшто не е неважно во каква држава живееме, односно дали во таква држава ќе сакаат да живеат нашите деца и внуци. Ако сакаме и по 30 или 50 години да кажеме дека имаме држава со сите нишани, треба да најдеме решение за актуелните проблеми, а не за 1903, 1941 или 1991. Само на таков начин ќе опстанеме во новиот свет, кој се раѓа пред нашите очи“, истакна претседателот Пендаровски.

Според него, надворешната интегрираност е клучен предуслов за опстанокот на малите држави во глобалниот свет и во тој дел, како што рече, е забележан видлив напредок на договорот од Преспа, без да се загрозат виталните идентитетски маркери на македонската нација, кои се експлицитно наведени во текстот на документот.

За Пендаровски, Договорот со Бугарија од 2017 е пример за приближување постигнат без странска асистенција.

„Акт што не ги дискриминира ниту една од страните кои и во посткомунизмот, за жал, не ги надминаа заемните стереотипи една за друга. Не очекувам негативни ефекти ниту во фазата на негова целосна имплементација затоа што е познато дека во таа смисла за нас воопшто не постои маневарски простор: имено, ако ја изгубиме нацијата, не ни треба европската интеграција. Неодамна усвоената собраниска декларација го потврдува широкиот политички консензус за ова прашање“, нагласи претседателот на државата.

Пендаровски се осврна и на економскиот аспект, кој, според него, е една од главните причини за брановите на иселување, кои не стивнуваат 30 години.

„Во овој контекст многу е битно да се намали нивото на корупција, особено високата корупција, затоа што ги става во подредена ситуација граѓаните што плаќаат даноци и воопшто ги демотивира да ги почитуваат законите, го оштетува буџетот и економската основа на земјата и, не помалку важно, ја руши довербата на луѓето во институциите на сопствената држава“, рече тој.

Додаде дека заштитата на животната средина, што веќе стана најважното политичко и изборно прашање во најмалку половина од земјите членки на Европската Унија, но политиките и ресурсите за имплементација на зелените политики кај нас се нужни што побргу не затоа што се тие популарни кај богатите туку затоа што, според некои процени, како што нагласи, ни умираат по 3.000 луѓе годишно само од аерозагаденост, колку што приближно изнесува едногодишниот данок во смрт од Ковид-19.

„Реално, ништо од ова нема да биде можно ако не го намалиме нивото на политичка поларизација, каде што изборниот победник ги алиментира своите членови, а свесно се лишува од придонесот на оние што не гласале за него. Јасно е дека во оваа фаза од нашиот политички развој граѓанското помирување е невозможно, но сите ние, актуелните политички актери, сме должни со скромен личен пример да придонесеме за деескалација на тензиите, кои на моменти ја парализираат целата држава. Потребен ни е нов, широк национален и државен консензус за развој што ќе биде поддржуван од релевантните политички субјекти во континуитет, независно дали се на власт или во опозиција. Без тоа, секоја следна годишнина од независноста само ќе ја одбележуваме, без да имаме што да прославуваме“, потенцира Пендаровски.

Поранешниот претседател Ѓорге Иванов денеска се обрати на свечениот собир во МАНУ на тема: „Современата македонска држава – две етапи во процесот на нејзиното формирање и развој 1941 – 1991/1991 – 2021 година“.

Иванов во својот говор ја критикува актуелната власт велејќи дека постојано се повторува една мантра: дека друга алтернатива, освен членство во Европската Унија, немаме.

„Денес многу ретко или воопшто не се чита Мисирков и неговата книга ‘За македонцките работи’, особено не од страна на актуелната власт и нејзините советници. Стравот да се отвори и прочита оваа книга е од сопствената гризење на совеста затоа што е напакостено и испогането сè што било и ќе биде свето за Македонците и за Македонија“, нагласи тој.

Поранешниот претседател смета дека обезличувањето на Македонија не е дело само на, како што рече, грчкиот договор од Преспа и договорот со Бугарија, туку тој процес смислено почнал со Охридскиот договор.

„Со Охридскиот договор, покрај сите предупредувања, македонскиот народ од националитет се сведе на етницитет – етничка група. Од тогаш сè веќе беше подготвено за она што денес ни се случува… Со тоа Република Македонија и македонскиот народ се втурнати во правна, политичка, историска бездна. Пандорината кутија е отворена и сега речиси секој си зема право да го негира она што е наше стекнато право. И тоа на повеќе нивоа и во повеќе наврати“, посочи Иванов, кој порача дека денеска на Република Македонија повеќе од кога и да е ѝ се потребни луѓе, што, како што рече, со гордост ќе се изјаснуваат дека се Македонци и дека се припадници на македонскиот народ.

Тоа, како што објасни, се луѓе што нема да се автоцензурираат и кои со храброст ќе говорат која е Македонија.

„Македонија има потреба од луѓе што нема да се плашат да ги посочат виновниците. Виновниците што посегнаа да ги цензурират и нашите колективни сеќавања. Да ја цензурираат македонската историја, македонската култура, да ги менуваат фактите онака како што им треба на другите. Виновниците кои дури посегнаа да ја цензурирааат и конторолираат македонската свест“, истакна Иванов во своето обраќање.