Градоначалникот на општина Вевчани, Спасе Кочовски, денес ги повика сите оние што сакаат забава и ја почитуваат традицијата, на 13 и 14 јануари да дојдат во Вевчани за Вевчанскиот карневал 2025 година. Најави дека карневалот како на филмска лента ќе ги покаже настаните од општествено-политичкиот живот изминатава година во земјата, кај соседите и во Европа.

„Пред сѐ, во овие два дена Вевчани ви нуди многу забава. Ќе бидете растоварени од сѐ она што се случувало и ќе влезете во новата година испразнети од онаа негативна енергија. Настаните што се случуваат во Вевчани ќе ги проследите како на филмска лента, сѐ она што се случило минатите 12 месеци, со желба дека ќе влеземе во една подобра и многу попросперитетна година. Ве поканувам сите да бидете присутни во овие два карневалски дена во Вевчани, на 13 и 14 јануари. Ви посакувам многу забава и чиста мисла. Вевчанскиот карневал или го сакате или го мразите, нема средина. Сите што дошле тука или се враќаат или не се враќаат, тоа е факт. Ако влезете со чиста мисла и за забава, јас мислам дека ќе поминете прекрасни два дена“, повика градоначалникот Кочовски.

Тој потсети дека маските со кои на сатиричен начин ќе бидат прикажани настаните од изминатата година се тајна и за него и оти изборот го прават самите учесници. Очекуваат многу гости од земјата, но и од странство.

Музичката програма ќе почне на 12 јануари вечерта со настап на охриѓанецот Пајак, по него – еден од најдобрите македонски бендови „Ареа“, а околу 23 часот, како специјален гостин од регионот, ќе настапи бендот „Забрането пушење“. На 13 јануари најавени се настапи на „Љубојна“, Наум Петрески, оркестарот со зурли и тапани од Вевчани, а околу полноќ Перо Бели и Коки.

Министерот за култура, Зоран Љутков, рече дека Вевчанскиот карневал, и покрај предизвиците што ги имаше и недостигот на континуирана поддршка во изминатите години, сепак опстојува како симбол на нашата култура и нашата традиција. Рече дека годинава Вевчанскиот карневал ќе добие пари од Министерството за култура, но не кажа колку оти комисијата сѐ уште работи и не ја донела конечната одлука, која се очекува во следните 15-20 дена.