Премиерот Зоран Заев присуствуваше на настан организиран од Комисијата за односи со верските заедници и религиозни групи, по повод одбележувањето на Светскиот ден на културната разноличност за дијалог и развој, којшто од Обединетите нации и УНЕСКО е прогласен на 21 мај.

Пред присутните гости меѓу кои претставници на државните институции и граѓанскиот сектор, како и сите претставници на верските заедници во државата, Заев се обрати со порака дека културната разноличност е од корист за целото човештво.

„Денешниот ден е ден за пораката дека интеркултурниот дијалог е најдобрата гаранција за мирен, праведен и одржлив свет на културна разноличност. Свет во кој уникатноста на другиот е богатство на разноличноста на светот. Културната разноличност е инспирација и мотивација за креативноста како инвестиција за промени за подобри општествата. Општества со хуман, човечки лик“, нагласи премиерот.

Како што рече тој, должност на нашето општество е да ги развиваме образованието и меѓукултурните вештини кај младите луѓе за да ја одржиме разноличноста на нашата земја и да научиме да живееме заедно.

„Треба безрезервно да прифатиме дека секој од нас има шанса да направи нешто за разноличноста и инклузивноста да станат алатки за дијалог и разбирање, за мирот и безбедноста, како неопходни за одржливиот развој на нашата заедница. Прашање на нашата иднина е да ја интегрираме културата на сите наши заедници во сите наши развојни принципи. Особено оние поврзани со младинските прашања, како што се образованието, јавното здравје и животната средина, како наш придонес за развојот на хармонично општество со сите разлики“, кажа Заев.

На предлог на министерството за здравство, Владата на денешната седница ја прифати информацијата за приклучување на државата кон Иницијативата за перформанси на примарна здравствена заштита.

Како што информираат од владината прес-служба, вклучувањето во ова тело овозможува пристап до меѓународна експертиза, вмрежување и зајакнување на капацитетите, но исто така носи и обврски за посветеност кон комплетирање на профилот и заедничка проценка на функционалните капацитети на примарната здравствена заштита.

„Иницијативата е основана во 2015 година, од Фондацијата ‘Бил и Мелинда Гејтс’, Светската здравствена организација и Групацијата на Светска банка и работи на унапредување на примарна здравствена заштита. Нејзината цел е да ги поддржи земјите во нивните напори за постигнување универзална здравствена покриеност преку развој на алатки за мерење на перформансите и стратегии за подобрување на системот на примарна здравствена заштита“, се наведува во владиното соопштение.

На денешната владина седница беше прифатен предлог-законот за ратификација на Спогодбата меѓу Владата и Советот на министри на Албанија за основање  културно-информативни центри во двете земји.

Како што информираат од владината прес-служба, со спогодбата се воспоставува правна рамка за основање  културно-информативни центри, преку кои уште повеќе ќе се интензивираат релациите во сите дејности од областа на културата, презентација и афирмација на културите на двете земји, како и институционално поврзување на субјектите од Македонија и Албанија, што би резултирало со голем број заеднички проекти и иницијативи.

„Отворањето на културните центри ќе придонесе за популаризација и презентирање на традицијата, културата и уметноста на Република Северна Македонија, ќе овозможи навремено и изворно информирање на граѓаните за актуелните културни текови во двете држави и ќе претставува мост за зближување и заемно запознавање меѓу народите“, велат од Владата.