МНР информира дека деветтемина државјани на Македонија, кои беа затекнати во загрозеното подрачје (осум ученици и нивен ментор/наставник, кои преку програмата „Еразмус плус“ престојуваат во Република Турција) го напуштиле погоденото подрачје од земјотрес и се пат кон Анкара.

„Во организација на Амбасадата на Северна Македонија во Анкара, со две возила учениците во текот на денот ќе пристигнат во турскиот главен град. Оттука учениците ќе бидат упатени кон Истанбул, каде што е обезбедено привремено сместување сè до нивното заминување кон земјава, кое се планира да биде во текот на утрешниот ден. Меѓу нив се и двата ученика што беа повредени, а кои се во добра здравствена состојба и се чувствуваат добро“, соопштија од МНР.

Според последните информации (добиени денес во 8.30 часот), во разорниот земјотрес, кој ја погоди југоисточна Турција, загинати се над 3.300 турски државјани, над 20 илјади се повредени и над шест илјади згради се уништени. Засега нема нови информации пристигнати до Амбасадата во Анкара и до Генералниот конзулат во Истанбул за други наши државјани што се наоѓаат во евентуално загрозена состојба или на кои им е потребна асистенција. Нашите претставништва остануваат отворени за евентуална интервенција доколку се појави потреба.

„Ја користиме ситуацијата уште еднаш да посочиме дека нашите дипломатски претставништва во Турција се на 24-часовно располагање за сите евентуални прашања на телефонските броеви: +905394569710 во Анкара, +905456149777 во Истанбул и + СОС телефонот на МНР во Скопје 38975273732“, е потенцирано во официјалното соопштение.