Најниска температура утрово е измерена со во Скопје – Петровец – 2 степени, во Штип, Струмица, Крушево, Маврови Анови – 1, додека во Скопје-Зајчев Рид, Крива Паланка, Велес, Демир Капија нула степени.

Во Виница, Берово се измерени еден степен, во Прилеп и Кавадарци два степени, во Тетово, Охрид, Претпор и Битола три степени и во Гевгелија пет степени.

Времето денеска ќе биде променливо облачно со сончеви периоди. Ќе дува слаб до умерен ветер од северозападен правец. Максималната температура ќе биде во интервал од 7 до 13 степени.

Во Скопје, времето ќе биде променливо облачно со сончеви периоди. Ќе дува слаб до умерен ветер од северен правец. Максималната температура ќе достигне до 9 степени.

ВМРО-ДПМНЕ реагира дека серијата случаи што се отвораат деновиве ги разобличуваат, како што велат, скандалите од времето кога СДСМ била на власт и претставуваат доказ за структурен хаос, распаднати институции и недостиг од одговорност.

Во соопштението партијата посочува дека случајот со стоковите резерви е уште едно потсетување дека институциите под контрола на СДСМ функционирале „како импровизирани конструкции без механизми за одговорност“.

Според ВМРО-ДПМНЕ, отпишувањето на 2.000 тони пченица и јачмен преку поранешниот заменик-министер за земјоделство Трајан Димковски, а потоа наводното појавување на истите количини на црниот пазар во соседна држава, укажува на „организирана злоупотреба од тогашната власт“.

Иако имало укажувања дека спорните количини постоеле и биле употребливи, според партијата, бил изготвен записник што тврдел спротивно – документ со контрадикторности кој сепак бил прифатен на владина седница.

Од ВМРО-ДПМНЕ посочуваат дека со тоа тогашните владини функционери, меѓу кои Зоран Заев, Љупчо Николовски и сегашниот лидер на СДСМ, Венко Филипче, формално легитимирале документ што, како што наведуваат, не кореспондирал со фактичката состојба на терен.

Партијата додава дека Филипче денес се обидува да се претстави како опозициски коректив, но оценува дека „не може некој кој лично учествувал во систем што дозволил вакви пропусти да биде коректив“.

Според ВМРО-ДПМНЕ, ако СДСМ има намера да се реформира и повторно да стане релевантен политички субјект, мора да се огради од функционерите на поранешната власт. Партијата бара дистанца од, како што ги наведуваат, Заев, Николовски и Филипче, кои, според нив, го блокираат секој обид за вистински реформи во СДСМ.

Од СДСМ денеска најавуваат дека во 11 часот ќе започнат со серијал од прес-конференции за наводните криминали на Владата на Христијан Мицкоски.

„Целосно ќе ја разобличиме системската корупција, институционализираниот криминал и безмилосната пљачка на граѓаните што го спроведува власта на ВМРО-ДПМНЕ. Крадењето мора да престане, веднаш. А криминалците од власта да одговараат! Ќе зборуваме со факти. Со документи. Со бројки. Со примери. За сите криминалци во власта. Затоа што ова што се случува во Македонија е организиран грабеж, модел на државно ограбување, кој навлегол во секоја пора на системот за испумпување на парите на граѓаните. Додека Владата тврди дека „нема пари“ за повисоки плати за работниците, нема пари за поголеми пензии, за исплата на породилно, поврат на ДДВ, преки криминални шеми и тендери ДПМНЕ испумпува милиони евра народни пари. Моделот е едноставен, проѕирен и бесрамно повторуван: Едни исти фирми, основани преку ноќ, со двајца или тројца вработени, добиваат милионски државни тендери. Истите фирми добиваат договори во владини институции и во општини каде што владее ДПМНЕ. На крај парите завршуваат во белата палата и во џебовите на врхушката на власт. Корупцијата и криминалот ја јадат државата одвнатре. Институциите се разградуваат. Младите се иселуваат. Затоа СДСМ упатува јасен, гласен и силен повик: Време е сите да се спротивставиме! Упатyваме повик до сите граѓани да не молчат, да бидат гласни и активно да се спротивставиме на овој грабеж. Невладините организации да го кренат гласот. Експертите, новинарите, академската заедница, сите да се вклучат во заедничката борба против ова зло кое ја гуши Македонија. А инситуциите да делуваат, дека одговорност ќе има, кога тогаш! За сите! Ова е надпартиска борба за државата, за системот, за иднината на секое семејство“, велат од СДСМ.