Игор Јанушев, носителот на листа на изборна единица 3 и Генерален секретар на ВМРО-ДПМНЕ денеска во посета на општина Делчево ја посети текстилната фабрика Витекс во Делчево.

Јанушев посочи дека идната влада на ВМРО-ДПМНЕ се обврзува на подобрување на животниот стандард на граѓаните, повисока стапка на економски раст, креирање на нови високо платени работни места, зголемување на платите и стандардот на работниците, пораст на домашните и странски инвестиции, но и зголемување на извозот.

Јанушев вели дека со проектот Обнова на Македонија се обврзуваат на системска, аналитичка, институционална, финансиска и логистичка и друг тип на државна поддршка за македонските извозни компании и нивна промоција за настап на странски пазари, како и формирање на таканаречени извозни промотори за поддршка на извозот на домашните компании и производи на нови пазара низ светот.

„ Ја посетивме текстилната фабрика „Витекс“ во Делчево. Текстилната индустрија е водечка во овој регион. Затоа во програмата се обврзавме на реализација на повеќе проекти кои се однесуваат на оваа гранка, кои ќе потпомогнат во модернизација и подобрување на извозните перформанси“ истакна Јанушев.

Граѓаните од Аеродром гласно ги искажаа своите проблеми со кои се соочуваат со години. Големи се незадоволството и разочараноста од политиките на сегашниот владин состав. Сакаат промени, и тоа промени што ќе донесат подобар, достоинствен живот за нив и нивните најблиски, истакна Петар Богојески, носител на листа во ИЕ 1.

„Денеска, заедно со мојот тим од Македонски концепт го посетивме Аеродром, каде што разговаравме со тамошните граѓани. Маката на граѓаните ја гледам во секоја нивна црта од изнемоштените лица. Нашиот народ веќе нема верба во државата. Доста ни е од импровизации со кои живееме веќе 30 години. Нашиот живот не е импровизација, да не дозволуваме други да ни го водат, затоа што граѓаните се тие што ги трпат последиците“, вели Петар Богојески од Македонски концепт.

Македонски концепт е тука да ги чуе проблемите на граѓаните и заедно со нивните сугестии да се реализираат политики, кои ќе значат живот за секој граѓанин одделно. Живот во фер општество и граѓанска држава, држава во која приоритетите на граѓаните ќе бидат пред личните приоритети на политичарите, држава без етнички партии, слободни граѓани, правда и сигурност за секого, ефикасно здравство, образование, држава на народот.

„Гласот за 10. е глас за промена, глас за одговарање за неисполнување политички ветувања, за следење на имотот на политичарите, за пратеници што ќе работат волонтерски, а не за плата, за проектот 1,5 милијарда евра за обесштетување на граѓаните од процесот на транзиција. Да почнеме да ги менуваме нештата на подобро и да ја вратиме државата во рацете на граѓаните. 10. е глас за искористување на нашата последна шанса за достоен живот“, порача Богојески.

Во изминатите три години покажавме што значи вистинска грижа за земјоделците и земјоделството. Решен е долгогодишниот проблем на лозарите што имаа побарувања од „Повардарие“ и „Стефани“. За 8.000 денари се зголеми субвенцијата за развојните производители на грозје со површина 1 до 10 хектари“, рече претседателот на СДСМ, Зоран Заев, на средба со лозарите во Неготино, придружен од кандидатките за пратенички – Лолита Ристова и Љупка Стојанова.

Претседателот Заев истакна дека земјоделството е важна гранка во економијата и дека ќе продолжат инвестициите за нови приходи од плодната македонска земја.

„Преку финансиска поддршка од 3,5 милиони евра ги стимулираме преработувачите на грозје и винарниците да произведуваат нови продукти – алкохолен дестилат. Овозможуваме јавни приватни партнерства во лозарството преку модернизирање и ставање во функција капацитети во производство на преработки од грозје со цел понатамошно уште посилно развивање на лозарството како земјоделска гранка, која сè повеќе и повеќе извозува“, рече претседателот Заев.

Осврнувајќи се на досегашните достигнувања, претседателот Заев рече дека се зголемија субвенциите, кои се исплаќаат редовно, навремено и неселективно, а трудот на земјоделците се цени и вреднува.

„За овие три години, овозможивме директна и индиректна поддршка во земјоделството во историски рекорден износ од над 430 милиони евра. Ја воведовме зелената нафта. 200 милиони денари завршија назад кај 55.000 земјоделци. Поддршката за млад земјоделец ја зголемивме од 10.000 евра на 20.000 евра. Се намали надоместокот за регистрација на винарска визба, и тоа за винарските визби со капацитет до 30.000 литри годишно намалувањето е од 10.000 денари на 1.500 денари, а за винарските визби со капацитет над 30.000 литри годишно намалувањето од 10.000 на 5.000 денари“, наведе Заев и додаде дека до 2024 година се обезбедува целосно бесплатна 100 отсто субвенционирана зелена нафта за сите земјоделци, двојно повеќе пари за поврат на персоналниот данок за земјоделците, инвестиции во откупно дистрибутивни центри и големи плантажи и системи за наводнување, како и бесплатна едукација за користење ИПАРД-средства и современи технологии во производство.

„За следниот мандат финансиката поддршка во земјоделството ја планираме на 200 милиони евра годишно, или 800 милиони евра за цел мандат. Е, тоа е вистинска грижа за земјоделците. Затоа, на 15 јули земјоделците ќе изберат повисоки субвенции, сигурен пласман и повеќе пари во своите буџети и нема да дозволат никој повторно да гази врз нивниот труд“, заклучи Заев.