Македонија
Естонија целосно ја подржува европската интеграција на Северна Македонија
Министерот за надворешни работи, Бујар Османи, имаше видеосредба со министерот за надворешни работи на Република Естонија, Урмас Реинсалу.
„Естонија е наш докажан пријател и ја цениме силната поддршка што ни ја испраќате за нашата посветеност во остварувањето на европските стандарди во сите области. Очекуваме во претстојниот период да се завршат сите подготовки и усогласувања за да се одржи првата меѓувладина конференција, која ќе го означи почетокот на затворањето на поглавјата за нашето членство во ЕУ, како прв чекор за градење на нашата заедничка иднина“, потенцира Османи.
Министерот Реинсалу ја реафирмира определбата за натамошно јакнење на пријателството меѓу двете земји, ја поздрави реформската определба на министерот Османи во напорите за зачленување во ЕУ и укажа дека овој курс треба да продолжи да се имплементира во нашата држава.
На разговорот воедно беа разгледани можностите за интензивирање на високиот политички дијалог, соработката во доменот на безбедноста во рамките на НАТО, но и преку учество на наши експерти во НАТО-центарот за сајбер-безбедност во Талин, како и потенцијалите во трговијата, енергетиката, ИТ и дигиталните технологии.
Оваа средба е дел од дипломатската активност на министерот Османи во пресрет на претстојните европски самити на Европската Унија кога се очекуваат клучните одлуки за финализација на преговарачката рамка и одржувањето на првата меѓувладина конференција до крајот на годината како официјален почеток на преговорите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Дел од Карпош и Кисела Вода без вода
Од ЈП Водовод и канализација – Скопје известуваат дека:
поради дефект на приклучна цевка ф 1“ на ул.Лондонска бр.9, прекинато водоснабдување ќе имаат корисниците на дел од ул.Лондонска од 09:00 часот до завршување.(општина Карпош)
поради дефект во шахта (промена на вентил ф3/4“) на ул.Божидар Аџија бр.12 во Студентскиот Дом Пелагонија, прекинато водоснабдување ќе имаат корисниците од ул:Божидар Аџија, Иван Козарев, дел од Георги Димитров, Киро Крстевски и дел од Вера Јоциќ од 09:00 часот до завршување.(општина Кисела Вода)
Македонија
Променливо облачно време со сончеви периоди и температура до 21 степен
Времето денес по одделни котлини ќе биде со услови за појава на слаба магла или ниска облачност.
Преку денот, времето ќе биде променливо облачно со сончеви периоди. Ќе дува слаб, a долж Повардарието умерен ветер од југоисточен правец. Минималната температура ќе биде во интервал од 4 до 14, а максималната ќе достигне од 15 до 21 степен.
Во Скопје наутро со услови за појава на слаба магла, а преку денот променливо облачно со сончеви периоди. Ќе дува слаб северен ветер. Минималната температура ќе се спушти до 8, а максималната ќе достигне до 21 степен.
До недела ќе преовладува променливо облачно и значително посвежо време. Утре ќе има услови за појава на магла по одделни котлини, а во петок и сабота слаб локален дожд претежно во западните делови. Во почетокот на следната седмица времето ќе биде стабилно и тивко со ниски утрински температури.
Македонија
Драган Ковачки на состаноци на Парламентарното собрание на НАТО кои се одржуваа во Грција
Драган Ковачки, пратеник од ВМРО-ДПМНЕ и шеф на Делегацијата на Собранието учествуваше на заеднички состаноци на Политичкиот комитет и Комитетот за демократија и безбедност на Парламентарното собрание на НАТО што се одржа од 14 до 16 октомври 2024 година во Атина и Хања, Крит, Република Грција.
Делегацијата предводена од Драган Ковачки, имаше можност од високите претставници од безбедносниот и одбранбениот сектор на Република Грција и од академската фела, да се запознае со грчката перспектива кон безбедноста и политичките случувања во јужното крило на НАТО, каде припаѓа и Република Македонија.
На теренската посета во Хања, Крит, парламентарците од ПС на НАТО беа запознаени со функционирањето на Оперативниот поморски тренинг центар на НАТО. Исто така беа посетени и НАТО центарот за извонредност и воздушна и ракетна одбрана и НАТО поморскиот центар за обука, како и поморската база Суда. На крајот од посетата се изврши и обиколка на воздушната и поморската инфраструктура на НАТО и САД во Грција.