За првпат после 70 години се реализираше комплетна обнова на внатрешните простории во Здравствен дом „д-р Хаим Абраванел“ во Битола, изјави министерот за здравство, Венко Филипче.

Тој најави и дополнително унапредување на услугите.

„Во овој Здравствен дом не е направена никаква инвестиција од 50тите години. Оваа установа опфаќа голем број на граѓани – пациенти на кои им пружа здравствена услуга. Целокупниот процес на реновирање ќе се финализира со замена на кровот во периодот којшто следува и помошта која се очекува да пристигне од делегацијата на ЕУ со што ќе се обезбеди ново амбулантно возило за потребите на жителите во Битолскиот регион. Честитки до директорката и целокупниот здравствен персонал кои покажаа дека може да се справат со менаџирањето на ковид кризата, но и целокупниот процес на вакцинирање во салата за масовна имунизација во Битола“, изјави министерот Филипче.

Пред две години, целосно беше реновирана службата на Итната медицинска помош, а финализирање на целокупниот процес на обнова ќе се заокружи со замена на кровот на установата.

Во последните 24 часа во Македонија се потврдени четири нови случаи на коронавирус, едно лице почина, а 68 оздравеа, соопшти Министерството за здравство.

Направени се 3.074 тестирања, а регистрирани се по еден нов случај од Скопје, Прилеп, Тетово и Кочани.

Регистрирани се 68 оздравени пациенти од: Скопје – 32, Куманово и Кичево – по 6, Тетово, Охрид и Струмица – по 4, Струга и Делчево – по 3, Кочани и Неготино – по 2, Прилеп и Македонска Каменица – по 1.

Пријавено е едно починато лице од Скопје (80г), починато во болнички услови.

Досега во земјата се направени вкупно 851.408 тестирања на Ковид-19.

Вкупната бројка на КОВИД-дијагностицирани лица во нашата земја од почетокот на епидемијата изнесува 155.616, бројката на оздравени пациенти е 149.790, на починати е 5.475, а бројот на активни случаи изнесува 351.

Процесот на вакцинација е забавен бидејќи нема доволно вакцини. Динаминката ќе се промени, кога ќе стигнат „Синовак“ од Кина и 100 илјади од „Фајзер“ преку ковакс-системот. Ова во тврди министерот за здравство, Венко Филипче, според кого, до крајот на јуни, 600 илјади вакцини треба да се пристигнати во Македонија.

„Процесот на вакцинација, споредено со она што беше претходните недели, кога стигна големата количина на вакцини од Кина е нешто успорен, поради малата количина на вакцини која што доаѓа секој понеделник. Нашата последна информација е дека 100 илјади вакцини на ‘Фајзер’ преку ковакс-системот ќе стигне на 28 јуни, а на 27 или 28 јуни, половина од кинеските вакицини ‘Синовак’ и останатата половина до вкупно 500 илјади, до 30 јуни“, вели Филипче.

Тој најавува дека наскоро, откако сите ќе добијат термини, граѓаните ќе можат и без термин да одат и да се вакцинираат на пунктови.

„До крајот на следната недела, се очекуваат овие вакцини, за да се забрза процесот на вакцинација, за да во периодот, не подолг од две недели, сите пријавени, односно 180 илјади граѓани да добијат вакцини и да се вакцинираат и потоа да ги отвориме пунктовите за сите кои сакаат да се вакцинираат на лице место“, вели Филипче.