Жирафата Каспер пцовисала од инфекција со салмонела, дознава „Макфакс“. Според патохистолошката анализа до која дојдовме, Факултетот за ветеринарна медицина констатирал дека оваа инфекција била пронајдена во желудникот на жирафата, црниот дроб, слезината и во цревата. Притоа во цревата биле најдени и паразити.

„Врз основа на микробиолошкиот наод – Salmonella enterica subsp. enterica serovar enteritidis во желудникот (сириште), црниот дроб, слезината и цревата, како и од патохистолошкиот наод (…), можеме да заклучиме дека жирафата пцовисала како резултат на инфекција со бактеријата Salmonella enteritidis“, стои во наодот до кој дојде „Макфакс“.

Професорите, докторите Трпе Ристоски и Кирил Крстевски, во наодот дополнуваат и за најдените паразити.

„Воедно, врз основа на патоморфолошките промени и паразитолошкиот наод, како секундарен наод дијагностицирани се паразити во цревата (…)“, се додава во патохисолошката дијагноза до која дојде „Макфакс“.

Засега нема информации со каква храна била хранета жирафата во Зоолошката градина, а од која би можела да ја добие бактеријата салмонела. Директорот Зоран Попов претходно само истакна дека жирафата повеќе месеци не била во добра состојба.

Жирафата Каспер пцовиса пред еден месец. Имаше 12 години, а во Скопје ЗОО беше жител од 2012 година. Ова е втора жирафа што пцовисува, претходната почина во 2014 година на три и пол години. Животниот век им изнесува 25 години.