„Договорот за добрососедство и пријателство од 2017 година е основа на нашите односи. Нашата цел е членство на Северна Македонија и Албанија во Европската унија“. Ова го изјави лидерот на ГЕРБ, Бојко Борисов, пред партиската младина и прецизираше дека разговарал со македонскиот премиер Зоран Заев, јави БГНЕС.

Борисов предупреди дека начинот на кој владејачката партија и претседателот Румен Радев сега преговараат со Северна Македонија може да доведе до лош исход за Бугарија или  ги натера народите да се мразат меѓусебно со децении.

„Нашата стратешка цел е Северна Македонија и Албанија да влезат во ЕУ. И вие, младите, овде мора да сторите сé што е можно за да не се мразат генерациите. Радев ја подели земјата. Сега ги подели луѓето и на темата Северна Македонија“, потенцираше Борисов.

Тој истакна дека во последните 4 години, додека ГЕРБ беше на власт, Бугарија била фаворит на Балканот.

„Ние бевме водечка сила на Балканот. Сега политиката што се води ќе направи да се мразиме едни со други. Тогаш, за што ќе бидат нашите европски проекти? Влегувате во земја што не ве сака. Затоа и јас и Зоран Заев се обидуваме работите да одат од дното нагоре “, рече поранешниот премиер.

Борисов истакна дека историјата е важна работа, но треба да им се допушти на историчарите да ја работат работата.

„Имаме договор за добрососедство. Тоа е најважната точка. Така се создаде ЕУ – од најзавојуваните земји – Франција, Германија, Велика Британија. Да не ве мами омразата на Радев, која тој ја внесе во народот“, повика Борисов.

Премиерот Зоран Заев, министерот заа надвореши работи Бујар Османи и министерот за економија Крешник Бектеши попладнево тргнаа за Букурешт каде од трибините ќе го следат првиот настап на македонската фудбалска репрезентација на Европското првенство.

„Доаѓаме за да ги поддржиме македонските репрезентативци. Заедно сме посилни, само сплотени можеме да успееме. Напред момци, цела држава навива за вас!“, напиша Заев на Фејсбук каде објави и фотографија од аеродромот пред тргнувањето.

Попладнево, со почеток во 18 часот, фудбалерите ќе играат со репрезентацијата на Австрија.

ВМРО-ДПМНЕ продолжува со протестите од утре пред МНР во 17 часот.

Одлуката за продолжување на протестите била донесена вчера на седницата на Извршниот комитет што се одржа во Битола.

„Иако Заев ја убедуваше македонската јавност дека со потпишувањето на спорниот договор повеќе немаме отворени прашања со соседите, очигледно е дека се отворија нови и досега неоспорувани теми. Република Македонија е блокирана. Протестите продолжуваат затоа што Заев и Бујар Османи кријат за што се преговара и што се’ се подготвени да прифатат од бугарската декларација“, изјави Стефан Андоновски, член на ИК на ВМРО-ДПМНЕ.

ВМРО-ДПМНЕ го повика министерот за надворешни работи Бујар Османи да го покаже на македонската јавност документот кој го преговараат со Зоран Заев.

Од опозициската партија велат дека ќе продолжат со протестите, се додека на тајни преговори се подриваат македонските национални интереси.