Поради прекршување на изборниот молк во првиот круг од Локалните избори 2025, а врз основа на извештаите од извршениот мониторинг над изборното медиумско претставување, Советот на Агенцијата на денешната 15 седница одлучил да поведе прекршочни постапки против ТВ 24 Вести и ТВ Вистел.

Двете телевизии на 19 октомври при известувањето за време на вториот ден од изборниот молк, емитувале изјави од министерот за внатрешни работи Панче Тошковски, носител на функција во орган на власта. ТВ Вистел во два наврати како што е наведно во информацијата од АВМУ, емитувале прес-конференција на министерот Тошковски, додека ТВ 24 Вести во Вестите во 10 часот емитувале изјава од истиот министер.

Портпаролот на Движењето ЗНАМ, Никола Мемов задоволен од резултатите на локалните избори.

„Дозволете ми да изразам големо задоволство од резултатите на локалните избори, кои ги освои Движењето ЗНАМ за Наша Македонија, со освоени речиси 40.000 гласови. Воедно сакаме да се заблагодариме на сите граѓани, членови, симпатизери и подржувачи на ЗНАМ, кои го искористија своето право на глас и ја потврдија довербата во нашето делување. Вашиот глас е нашата најголема поддршка и мотив да продолжиме понатаму“.

Овие избори, оценува тој, ја потврдиле стабилизацијата на нивното гласачко тело во однос на минатите парламентарни избори и покажале дека владините политики кои ги водат се во вистинска насока.

„Јасно е дека граѓаните го препознаваат нашето чесно и одговорно делување. Нашиот концепт на чесна, директна и народна политика наидува на сè поголема поддршка низ целата држава – и тоа е клучната порака од овие локални избори.

Истакнуваме дека за прв пат освоивме советнички места во повеќе од 50 општини низ Македонија, како и во Градот Скопје. Тоа е доказ дека ЗНАМ станува релевантна политичка сила која носи
вистински промени и влијание на локално ниво.

Во Куманово имаме убедливото водство во првиот круг, каде што нашиот кандидат за градоначалник Максим Димитриевски оствари предност од над 11.000 гласа. Кандидатот на СДСМ не успеа ниту да се пласира во вториот круг, што јасно ја покажува реалната поддршка на граѓаните за ЗНАМ и разликата меѓу политиките и празните ветувања на СДСМ“.

Според него агонијата на СДСМ се гледа и на државно ниво, со освоени само околу 120.000 гласови и тоа како што вели е јасен сигнал дека граѓаните ја изгубиле довербата во нивните политики.

„Во општина Центар влегуваме во вториот круг, ја продолжуваме борбата за промена и крај на владеењето на старите политички структури. Убедени сме дека Мирослав Лабудовиќ ќе победи во Центар, носејќи обнова, транспарентност и правда.

Овие избори покажаа дека значителен број гласови добија и независните кандидати, што е позитивен сигнал за демократијата и поголемо учество на граѓанските иницијативи во локалните самоуправи.

ЗНАМ продолжува понатаму – обединети, со нова енергија, јасна визија и конкретни решенија за промени“.

Амар Мециновиќ, кандидатот за градоначалник на Левица кој влезе во вториот круг на Локалните избори им се заблагодари на граѓаните кои му ја дале поддршката и посочи дека искреноста и креативноста и натаму допираат до луѓето.

„Скопјани мои најмили, ви благодарам од сѐ срце, за сите кои го дадоа својот глас, сите волонтери и активисти, сите кои агитираа, споделуваа и крајно веруваа дека Скопје заслужува повеќе. Она кое го изградивме во изминатите недели е показател дека искреноста и креативноста и понатаму допираат до луѓето.

Почнавме, додава тој, со замисла дека политиката може повторно да делува човечки.

„Сега кога веќе дојдовме до вториот круг, изборот е јасен: стариот систем кој го истроши градот и новиот кој заедно го градиме, кој ќе го стави колективниот интерес пред партискиот. Ова движење никогаш не се однесуваше на мене како кандидат, туку на сите скопјани кои одбраа да се надеваат наместо да се предадат.
Надежта ќе ја претвориме во реалност во овој круг – со храброст, достоинство и неизмерна љубов кон сопствениот град.
Скопје се разбуди. Сега сопствените соништа ќе ги види на јаве“.