ВМРО-ДПМНЕ ја напуштија средбата на работните групи за законот за Јавно обвинителство во Собранието, откако министерката за правда, Рената Десковска, го одбила нивното барање во следните половина час да го повика државниот јавен обвинител Љубомир Јовески да учествува во констриурањето на законот.

Идејата за присуство на Јовески, која ја предложи ВМРО-ДПМНЕ, доаѓа откако тие прочитале негово интервју каде вели дека приоритет е носење нов квалитетен закон за Јавно обвинителство.

„Јовески треба да присутен на дебатата бидејќи тој минатата година даде изјава, цитирам: ‘Она што е неопходно е носење на нов закон за ЈО, но квалитетен закон, а не некој со дневно политички влијанија’. Затоа сметавме, бидејќи е државен функционер, исто како Дескоска, мора да биде присутен на ваква средба која се однесува на предлог-законот за Обвинителството кое тој го раководи. Задоволни сме што Дескоска прифати да биде присутна стручната правна фела, но не сме задоволни бидејќи не прифати да го повика Јовески“, рече Антонијо Милошoски од ВМРО-ДПМНЕ.

Пратеникот Милошoски потенцираше дека според него и пратениците на ВМРО-ДПМНЕ, критиките од Јовески се премногу силни за да тој не учествува во работата на работните групи.

„Кога Дескоска ќе биде подготвена да го обезбеди присуството на Јовески, тогаш ќе преговараме. Острите критики на Јовески се премногу силни, за да го заобиколиме на вакви важни средби. Заев сака да создаде тврдина која ќе го заштити од кривичен прогон по изборите кои ќе ги изгуби“, додаде Милошоски.

Пациентите на кои им е потребно маслото од канабис се сосема заборавени во предлог-законот за опојни дроги и психотропни супстанции, што го предлага Министерството за здравство, тврди Филип Достовски од здружението „Зелена алтернатива“. Дали бизнис-интересот и долгорочниот економски бенефит од извозот на сув цвет од канабис се главниот мотив во моментот овој закон да помине пред Собранието, а регулативите за корисниците и за пациентите ќе почекаат подобри времиња, дебатираа министерот за здравство, Венко Филипче, Костадин Дуковски, претседател на здружението на производители на канабис за медицински цели „Мак канабис“, и Достовски.

„Црн хумор е да кажете дека ќе го истурите сувиот цвет од канабис ако законот не помине и не го извезете. Додека на илјадници пациенти им е неопходно маслото од канабис и се снаоѓаат на црниот пазар, вие правите закон кој единствено ќе го штити извозот“, вели Достовски.

Според Филипче, во иднина постои можност за надградба на законот со амандмани, во кои ќе се вклучи потребата на пациентите.

„Ние сме отворени за сите забелешки на овој закон, но во овој момент проценивме дека оние 700 вработувања и вложени 100 милиони евра во индустријата со извоз на сув цвет од канабис, ќе донесат економски бенефит од кој секако ќе имаат полза здравството и пациентите. Со регулативата што ќе се направи преку Агенцијата за канабис и соработката со слични институции во Европа, ќе можеме да преземеме искуства и да ја разгледаме натамошната еволуција на законот“, вели Филипче.

Дуковски, пак, се согласува дека сувиот цвет од канабис треба да биде достапен, како и правењето масло на домашниот пазар, но исто така смета дека државата во овој миг не е подготвена за системска заштита и правна регулација.

„Ние ќе извезуваме сув цвет за медицински цели. Јасно ни е дека и во Европа во многу земји функционира црниот пазар и дека има искуства на пациенти кај кои медицината кренала раце, маслото помогнало“, вели Дуковски.

Достовски вели дека е лицемерно тие да се повикуваат на европски искуства кога кај нас во секое маало и во секоја зграда има берем по еден случај каде што маслото е единствена надеж и лек, а луѓето мораат да ризикуваат и да се снаоѓаат на црниот пазар.

За регулативите, едукацијата на лекарите, истражувањата на Медицинскиот факултет и за другите контрадикторности што го следат овој закон, гледајте во целата дебата.

Синдикатот на Клиничкиот центар категорично се спротивставува на иницијативата за формирање синдикат на УКИМ затоа што потекнува од министерот за образование, а се спроведува преку другите работодавци, што претставува директно мешање на власта во синдикалното организирање, велат од Синдикатот.

Од таму го повикуваат членството да не пристапува кон овој синдикат, кој, како што се наведува во соопштението, се формира директно по налог од работодавецот.

„На оние што веќе потпишале им укажуваме дека постапката за основање и дејствување на овој синдикат е спротивна на законот. На оние што во име на единицата доставуваат пристапници за овој синдикат, кој се формира директно по налог од работодавецот, им укажуваме дека прават или направиле постапки спротивни на законот“, се наведува во соопштението.

„Во електронскиот допис со работен наслов ‘Основање синдикат на УКИМ’, генералниот секретар на УКИМ во прилог доставува документација поврзана со иницијативата, односно барањата на Министерството за образование и наука на РСМ во согласност со темата на дописот, при што одредува рокови и замолува за придржување до нив. Во воведот на документот во прилог на дописот со наслов ‘Основање синдикат на вработените во УКИМ’ се укажува дека на состанокот од страна на министерот за образование и наука со ректорите и генералните секретари на јавните универзитети во РСМ на присутните им било кажано дека поради планираното зголемување на платите на вработените на јавните универзитети во висина од 10 отсто, почнувајќи со платата за јануари 2020 година, потребно е да се склучи колективен договор и да се формира синдикат на вработените на УКИМ. Во понатамошниот дел на документот се укажува на единицата (факултет или научен институт) да ‘пушти пристапници за членство до сите вработени на единиците (наставен и ненаставен кадар)’, а ‘копии од пристапниците да се достават до генералниот секретар’“, појаснуваат од Синдикатот.

Во соопштението се наведува дека иницијативата, содржината и препораките изразени во дописот и документот се директно спротиставени на конвенцијата бр. 87 на Меѓународната организација на трудот за слобода на здружување и заштита на правото на организирање, 1948, која Република Македонија ја има ратификувано на 17.11.1991 година, на членот 37 од Уставот, а особено на
членот 195 од Законот за работните односи, во кој јасно се укажува дека работодавците и нивните здруженија не смеат да имаат надзор над основањето и дејствувањето на синдикатите.

„За неверување е препораката на генералниот секретар на УКИМ и од него утврдената членарина од 50 денари месечно да се уплаќа на приватна сметка на идниот претседател, со тоа што тој ќе потпише изјава дека ќе ги префрли на сметката на синдикатот кога таа ќе биде отворена. Истовремено, крајно понижувачка се намената и целта за формирање на овој синдикат, сведени само на покачување на платите на вработените од 10 отсто“, велат од Синдикатот.

Од таму велат дека постапувајќи по дописот на генералниот секретар на УКИМ и документот во прилог, во претходните денови била вршена агитација во одредени универзитетски клиники и институти, Стоматолошкиот клинички центар „Свети Пантелејмон“ – Скопје, а особено на Медицинскиот факултет, УКИМ Скопје, за зачленување членови на Синдикатот на Клиничкиот центар од наставно-научниот кадар во овој синдикат во формирање.

„Речиси сите вработени од наставно-научниот кадар и докторите специјалисти на Медицинскиот факултет, УКИМ Скопје, се членови на Синдикатот на Клиничкиот центар, а во сите универзитетски клиники и институти нашиот синдикат е репрезентативен на ниво на работодавец. Не сакаме да веруваме дека покачувањето од 20 отсто, а не 25 отсто во јавното здравство за наставно-научниот кадар, може да биде дел од некоја поголема игра. Синдикатот на Клиничкиот центар има искуство со синдикат формиран и организиран од работодавец или т.н. синдикат по нарачка, а во нашиот случај како контрасиндикат. Нејасно е како во изминатиот период владејачките партии не го разбраа за нив негативниот ефект од ваквите синдикати по нарачка“, велат од Синдикатот на Клиничкиот центар.