Откако пред неколку дена беше разрешен, поранешниот реис на ИВЗ Сулејман Реџепи преку соопштение пишува дека дава неотповиклива оставка од фунцијата, коментирајќи дека против него се води нецивилизирана кампања.

„Преку ова мое соопштение ја известувам јавноста дека поднесувам неотповиклива оставка од функцијата Реисул Улема на ИВЗ во РСМ, нагласувајќи при тоа дека за мојата досегашна работа одговарам пред Бога и спремен сум да одговарам пред Законот. На ИВЗ во РСМ за чие што единство сум работел сиот свој работен век и која што ја чувствувам како составен дел на мојот живот, и пожелувам успеси во работата во иднина, додека на исламските верници им пожелувам среќа а мирот, љубовта и милоста Божја да бдеат над нив било каде да се наоѓаат“, пишува Реџепи.

Тој вели дека кампањата што се водела против него била нецивилизирана и се однесувала на неговата личност при што биле нанесени сомнежи на неговата активност и ангажирање на чело на ИВЗ во РСМ.

„Како верски водач и човек, длабоко сум трогнат од оваа навредлива кампања, но во ниту еден момент не го оспорив правото на било кој да го изнесе своето мислење и став, свесен и уверен дека Единствениот и Конечен Судија за делата на секој човек е и ќе биде секогаш единствено Семоќниот Алах“, вели Реџепи во писмото.

Управниот Суд на седница одржана на 7 мај донесе пресуда со која тужбата на тужителот Министерство за внатрешни работи застапувано од Министерот за внатрешни работи Наќе Чулев, се усвојува, додека Одлуката на Влада со која се поништуваат решенија за распоредување на работно место се поништува.

Тужбата на Министерот Чулев се однесува на одлука на Владата донесена на почетокот на февруари, а со која беа поништени вкупно 88 решенија за распоредување донесени од страна на Министерот за внатрешни работи Наќе Чулев.

„Ваквата одлука на Управниот суд е уште една потврда за погрешните политики кои ги спроведува Владата, а кои се спротивни на законот, но и доказ дека зад сите одлуки на Владата поврзани со Министерството за внатрешни работи стојат исполнување исклучиво на политички цели. Претходната одлука донесена од страна на Државната комисија за спречување на корупција и оваа пресуда од Управниот суд се потврда на моите тврдења дека распоредувања во Министерството за внатрешни работи се во согласност со законот. Во таа насока ги охрабрувам вработените во Министерствот за внатрешни работи и во иднина да постапуваат соглсно со законот и да ги почитуваат актитe кои се донесени од моја страна, затоа што тие се во согласност со законот што во суштина и единствен концепт на кои се заснова моето работење и раководење со министерството, а што потврда се и одлуките на ДКСК и Управниот суд“, вели министерот Чулев.

Согласно препораките од Комисијата за заразни болести и насоките од Министерството за образование и наука, Општина Центар во соработка и по иницијатива на воспитно-образованиот кадар од ООУ „Коле Неделковски“ креираа протокол за безбеден прием на првачиња во учебната 2020/2021 година. Овие мерки се преземаат како дополнителна заштита од новонастаната ситуација со коронавирусот, а протоколот ќе се применува и почитува во сите основни училишта во Центар.

Во текот на месец мај, сите основни училишта во Општина Центар формираа електронски систем за аплицирање и упис на првачињата, додека од први јуни официјално ќе се отворат училишните порти за учениците кои ќе бидат тестирани за упис во прво одделение.

Пред влезот на училиштето, со специјална пумпа ќе се дезинфицираат чевлите,како мерка за заштита и зголемена безбедност при слободно движење во училиштето, потоа, со дигитален бесконтактен топломер, на брз и ефикасен начин ќе им биде измерена телесна температура на децата и родителите од страна на стручниот тим во училиштето. Секој ќе добие хигиенски „каљачи“ за еднократна употреба и ќе биде извршена хигиенска дезинфекција на рацете, а родителите дополнително ќе користат заштитни маски и стерилни ракавици.

„Со оглед на условите во кои се наоѓаме во време пандемијата, јас и мојот тим од ООУ „Коле Неделоковски“ креиравме протокол за безбеден прием на првачиња за учебната 2020/2021 година, согласно препораките од Комисијата за заразни болести и насоките од МОН. Во рамки на овој протокол се почитуваа сите безбедносни мерки и затоа би сакала да ги охрабрам сите родители со оглед на тоа дека првиот уписен ден започнува на први јуни, слободно да дојдат затоа што навистина сме подговтвени и со нетрпение ги очекуваме првачињата во нашето училиште. Се надевам дека овој протокол кој што го смисливме дека ќе го почитуваат и другите училишта, не само во Општина Центар, туку и на ниво на цела држава. Истиот протокол е поддржан од Општина Центар“ – изјави директорката Светлана Масларевска.

Учениците ќе се тестираат во неколку простории со еден тестатор, почитувајќи ги препораките за одржување дистанца на растојание од 2 метри. Преку дидактички материјали за бесконтактно тестирање и сопствени боички, првачињата ќе се подготвуваат за почетокот на новата учебна година, а родителите ќе бидат ангажирани во пополнување на потребните материјали за упис.

„Во учебната 2020/2021 година, очекуваме да бидат запишани 550 првачиња во осумте основните училишта на територијата на Општина Центар. Ја поздравувам иницијативата на креативниот тим од ООУ „Коле Нелковски“ за спроведување на овој протокол за безбеден прием на нашите првачиња. Би сакал да ги информирам родителите дека ние како општина, во соработка со училиштата во Центар, подготвени сме во однос на безбедноста за нивните деца и дека со нетрпение ги учекуваме учениците да им посакаме добредојде и да им го честитаме уписот во прво одделение“ – изјави градоначалникот Саша Богдановиќ.