На вакциналните пунктови во државата заклучно со вчера вакцинирани се вкупно 135.574 граѓани. Прва доза вакцина вчера примиле 13.976 граѓани, а вкупно се вакцинирале 14.976 граѓани. Во државата вкупно се аплицирани 160.425 дози вакцини, а втора доза кај 24.851 граѓанин. Со последните бројки 35 % од населението над 70 години имаат примено барем една доза вакцина, информираат од Министерството за здрaвство.

Според здравствените власти, вакцинацијата се одвива непречено на сите пунктови во државата. Интересот за вакцинација секојдневно се зголемува, а досега бројот на лица што изразиле желба за вакцинација преку веб-платформата vakcinacija.mk е 318.793 граѓани.

Вакцинацијата се спроведува во согласност со Националниот план за имунизација. Се вакцинираат возрасни лица, граѓани што искажале интерес за вакцинација на веб-страницата vakcinacija.mk, а се вакцинираат и лица вработени во критичната инфраструктура.

Масовната вакцинација се одвива во неколку градови во државата, и тоа во „А1 арената“ – СЦ „Борис Трајковски“ во Скопје, во спортските сали во Кавадарци, Куманово, Тетово, Штип, Битола и во Охрид.

Министерството за здравство апелира до граѓаните масовно да се пријавуваат на vakcinacija.mk бидејќи тоа е најлесниот и најбрз пат да се вакцинираат.

Рано утрово во земјата пристигна 55-годишниот македонски потполковник позитивен на коронавирусот и суспектен на јужноафриканскиот сој, објави на социјалните мрежи министерката за одбрана, Радмила Шекеринска.

„Рано утрово нашиот потполковник пристигна од Централноафриканската Република во Скопје. Добро го поднесе летот и сместен е на Инфективната клиника. Директорката на Клиниката, д-р Милена Стевановиќ, нѐ информира дека потполковникот е во добра општа состојба и стабилен. Му посакувам бргу да оздрави. Благодарни сме им на Инфективната клиника и на сите што учествуваа во медицинската евакуација“, напиша Шекеринска на „Фејсбук“.

Заразениот војник беше транспортиран под посебни услови и протоколи и ќе биде во изолација, а целиот персонал на Клиниката за инфективни болести добил препораки строго да внимава и да се придржуваат кон протоколите за работа.

Заразениот војник заедно со уште еден војник бил во Мисијата на Европската Унија за обучувачи во Централноафриканската Република.

Силен земјотрес со магнитуда од 5,2 степени според Рихтер вчера околу 23.31 часот ја стресе Грција.

Земјотресот, според сервисот ЕМСЦ, бил на 14 километри југозападно од Костур, Грција.

Според досегашните податоци на Сеизмолошката опсерваторија при Природно-математичкиот факултет во Скопје, потресот бил почувствуван и во Битола, Ресен, Охрид, Струга со интензитет од IV степени според Европската макросеизмичка скала, а во другите делови на територијата на Македонија со интензитет од III степени според Европската макросеизмичка скала.

Од опсерваторијата додаваат и дека епицентарот на земјотресот бил на 170 километри јужно од Скопје, a според нивните мерења истиот бил со Рихтерова магнитуда од 4,7 степени.