Македонија
Заев со италијанскиот амбасадор: Република Северна Македонија ѝ припаѓа на Европа
Претседателот на Владата, Зоран Заев, се сретна со Андреа Силвестри, новиот амбасадор на Република Италија, при што истакна дека местото на Северна Македонија е во Европа.
На состанокот е изразена поддршка од Италија за евро-атлантските интеграции на нашата држава. Констатирано е дека Република Северна Македонија историски, географски, културно и политички ѝ припаѓа на Европа и се изразени очекувања дека нашата држава ќе продолжи да се движи по европскиот пат.
Заев се заблагодари за искреното и традиционално пријателство со Република Италија и искажа определба за продлабочување на билатералната соработка, особено на економски план, за што е оценето дека постои заинтересираност од двете страни.
„Европските вредности им се потребни на нашите граѓани и ние продолжуваме да ја развиваме државата според овие принципи. Посветени сме на развојот на добрососедските односи преку договорите со Грција и со Бугарија, има имплементација на Охридскиот рамковен договор, градиме едно општество за сите граѓани и сега цениме дека е време за фокусирана посветеност кон економијата, здравството, образованието и во областите што директно се однесуваат на квалитетот на живот на граѓаните во земјата“, рече премиерот Заев.
На состанокот заеднички е оценето дека Италија може да помогне во реформите во правосудството и владеењето на правото, а е разговарано и за соработка во областа на здравството.
Премиерот Заев на средбата со амбасадорот Силвестри упати покана до италијанскиот премиер Џузепе Конте за официјална посета на нашата држава кога ќе биде проценето дека постојат услови за тоа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Бесплатни уролошки прегледи денес во амбулантата на Специјализираната болница за геријатриска и палијативна медицина
По повод Месецот на машкото здравје – Мовембер, во амбулантата на Специјализираната болница за геријатриска и палијативна медицина „13 Ноември” – Скопје денеска со почеток во 10 часот ќе се вршат бесплатни уролошки прегледи, како и ехо прегледи на бубрези и простата.
Целта е подигнување на свесноста за значењето на навремената грижа за машкото здравје. Ова е одлична можност за навремена проверка, превенција и грижа за здравјето, информира болницата „13 Ноември” – Скопје.
Уролошки прегледи ќе врши Дарко Марковски, уролог од ГОБ „8-ми Септември“, а ехо на бубрези и простата докторките Марика Филипова и Марија Сековска – специјалисти интернисти во Специјализирана болница за геријатриска и палијативна медицина „13 Ноември“ .
Македонија
Поради сообраќајка се пренасочува сообраќајот на магистралниот пат Куманово-Крива Паланка
Сообраќајот на магистралниот пат Куманово-Крива Паланка од 9:15 часот се одвива со наизменично пропуштање на возилата, информира АМСМ.
Петходно од АМСМ соопштија дека поради случена сообраќајна незгода од 8:30 часот во целосен прекин е сообраќајот на магистралниот пат Куманово-Крива Паланка.
Македонија
Студено утро, во Маврово снег и температури под нулата
Најмногу дожд 40 литри на квадратен метар во изминатите 24 часа наврна во Демир Капија, по што следат Радовиш и Пожар со 37, Гевгелија со 35 и Штип со 28. Деветнаесет литри на квадратен метар наврнаа во Струмица, 16 во Виница, 15 во Куманово, 13 во Кавадарци и Крива Паланка, 12 во Попова Шапка, 11 во Претор, 10 во Маврови Анови и Скопје-Петровец, 8 во Берово, 7 во Лазарополе, 6 во Велес, 5 во Пожаране, 4 во Битола, Тетово, Крушево и Прилеп и по еден во Скопје – Зајчев Рид и Тополчани.
Утринава најстудено беше во Маврови Анови, Лазарополе и Пожар каде е измерена температура од -1 степен Целзиусов, во Пожаране и Крушево, 1 во Крива Паланка, 2 во Претор, Охрид, Тополчани, Куманово и Виница, 3 во Тетово, Штип, Прилеп, Берово и Скопје – Зајчев Рид, 4 во Битола, Велес, Кавадарци, Струмица, Демир Капија и Скопје-Петровец, а најтопло беше во Гевгелија каде се измерени 5 степени Целзиусови.
Времето денеска ќе биде променливо облачно со сончеви периоди. На планините и на повисоките места ќе провејува слаб снег. Ќе дува слаб до умерен ветер од северозападен правец. Максималната температура ќе биде во интервал од 5 до 11 степени Целзиусови.
И во Скопје ќе биде променливо облачно со сончеви периоди. Ќе дува умерен северен ветер. Максималната температура ќе достигне до 8 степени Цезлиусови.

