Мојот план за Скопје, мојата визија ги претставив со амбициозни, но возможни, реални проекти. Повеќето од нив може да се спроведат веќе во првите две години од мојот мандат, многу од нив уште во првите 82 дена, истакна Данела Арсовска, независната кандидатка за градоначалник на Скопје, поддржана од ВМРО-ДПМНЕ, на вечерашниот завршен митинг пред платото на Филхармонија.

„Време е да им покажеме на сите дека е возможно во 82 дена да се исчистат сите депонии, сите диви депонии во градот Скопје, да се отвори едношалтерскиот систем за јавни услуги достапен за сите граѓани 24 часа секој ден во неделата. Ќе ставиме крај на дивеењето и урбаниот хаос. Ќе го спроведуваме законот, ќе го развиеме модерно Скопје, со урбанистичко планирање заедно со локални и меѓународни експерти за да го подготвиме за иднината, со строга заштита на зелените зони и 5 нови мега паркови вонашето убаво Скопје“, порача таа.

Арсовска во своето обраќање пред скопјани се осврна и на потребата од дигитализација на градот, притоа посветувајќи се и на правилно менаџирање и мотивација на администрацијата која, како што рече, ќе стане транспарентна и ефикасна и во служба на граѓаните.

„Толку сме навикнати да трчаме од шалтер до шалтер, да чекаме редици со часови и на крајот да не го добиваме ни тоа што ни е потребно кога станува збор за јавната администрација, толку сме навикнати на корупција што веќе го прифаќаме ваквиот начин на функционирање како нормален, а не треба да е така. Сите знаеме дека тоа е погрешно, дека тоа е погрешно раководење кое не смее да се дозволи. Но, може да биде и ќе биде поинаку. Преку дигитализација и новиот едношалтерски систем, сите граѓани ќе уживаат во брзи, транспарентни и одговорни јавни услуги. Транспарентна и ефикасна администрација во служба на граѓаните и политика на нулта толеранција за корупција и непотизам“, најави Арсовска.

Таа додаде дека токму ова се столбовите на модерно и европско Скопје.

„Ќе почнеме да работиме на нив да ги развиваме уште првиот ден на стапување на градоначалничката функција. Со целосна посветеност, со напорна работа, со професионален менаџмент, Скопје ќе биде градот кој го заслужуваме и градот со кој повторно ќе се гордееме“, потенцираше таа.

Во своето вечерашно обраќање пред граѓаните во скопската општина Карпош, кандидатот за градоначалник на Скопје, Петре Шилегов, побара поддршката за вториот круг потсетувајќи на многуте реализирани проекти од градската зелена агенда.

„Се сеќавате ли дека во 2017 година главна тема на изборите беше аерозагадувањето. Сега бројките покажуваат далеку почист воздух. Почнавме војна со загадувањето со воведување нови 40 мерки. Со субвенциите за инвертер-уредите ги заменивме старите печки на дрва и само поради тоа во Скопје денес чадат 8.000 оџаци помалку во однос на претходно“, нагласи Шилегов.

Тој додаде дека со субвенциите за велосипеди и тротинети Скопје денес е побогато за 15.000 велосипеди и над 600 тротинети, а скопската мрежа на велосипедски патеки го надмина 115-тиот километар. Потсети и на поврзувањето со конектори на главните велосипедски рути и на новите апхил и даунхил-велосипедски патеки за љубителите на екстремните спортови на Водно.

„Подигнавме над 100.000 квадратни зеленило, а дивите депонии и дивите паркиралишта ги претвораме во паркови. Див паркинг во кал беше денешниот парк ‘Ибни Пајко’, видете го денес колку е убав. Паркот во Мичурин и паркот во Кисела Вода беа депонија. Покривот на ГТЦ беше детектиран како т.н. топлотен остров, сега е полн со луѓе и зеленило“, додаде Шилегов барајќи ја поддршката од граѓаните за втор градоначалнички мандат за да може, како што рече, Скопје да продолжи напред.

Осврнувајќи се на понудата за вториот изборен круг в недела, претседателот на СДСМ, Зоран Заев, пред граѓаните на Карпош посочи дека евидентна е разликата помеѓу Душко Вескоски и Петре Шилегов, кои нудат напред наспроти, како што рече, Стевче Јакимовски и Данела Арсовска, кои сакаат назад во режимот.

„Навистина е најподмолен и најнаместен чин, државјанин на странска земја, за време на спорот со Бугарија да биде кандидат за градоначалник на Скопје. Ние сме за едно општество за сите и немаме предрасуди за ниту една етничка припадност, во таа смисла сме авангарда. Но, да лажеш, да манипулираш, со скриени намери и да продолжиш да лажеш, тоа е бесрамно. Тоа е понижување на нашиот народ. Затоа од овде ја повикувам Даниела, не Данела, да си даде оставка и да се повлече од кампањата затоа што ова е понижување и врз Скопје и врз целиот наш народ“, нагласи Заев.

Тој во Карпош упати порака до сите генерации, младите, средните и постарите.

„Не може младите да му веруваат на 61-годишниот Стевчо Јакимовски со сите колекции на партиски книшки кај него наместо на 36-годишниот Душко, кој има и светско и европско искуство. Овде имаме одличен избор, затоа вреди да се бориме, за тоа ги имаме сите аргументи на светот. Да излеземе масовно в недела и да даде поддршка за бројот 12“, повика лидерот на СДСМ.