Град Скопје и Општина Ѓорче Петров ги почнаа постапките за изградба на првиот од четирите мегапаркови што треба да се изградат во Скопје во текот на наредните години.

„Советот на Град Скопје, денеска, на иницијатива на градоначалничката Данела Арсовска ја донесе одлуката за воспоставување меѓуопштинска соработка помеѓу Град Скопје и Општина Ѓорче Петров за партерно уредување и озеленување на просторот меѓу реката Лепенец и пречистителна станица во Волково во општина Ѓорче Петров“, соопштија од Град Скопје.

Новиот парк ќе биде лоциран на опустошениот простор на исчистена депонија, што се наоѓа покрај коритото на реката Лепенец и пречистителна станица во Волково, во општина Ѓорче Петров. Ќе се простира на вкупна површина од 30.900 квадратни метри, од кои за зелени површини се планирани 17.534 квадратни метри, а за пешачки патеки 13.366 квадратни метри.

Со изградбата на новиот парк и уредувањето на просторот, каде што се планира и да се засадат 2.250 садници и грмушки, ќе се овозможи активно користење на зелените површини и движење на пешаците и велосипедистите.

Во реализацијата на овој проект Град Скопје ќе учествува со геодетски снимања, изработување на проектна документација, расчистување на теренот, изградба на пешачки површини, изградба на бунари за наводнување со подземни води, поставување урбана опрема, хортикултурно уредување на зелена површина и садење садници. Град Скопје за реализацијата обезбеди и финансиски средства од својот буџет.

Општина Ѓорче Петров во остварувањето на оваа соработката ќе учествува со изградба на урбана опрема – детски игралишта и реквизити, како и со проект за осветление. Вкупната вредост на проектот изнесува 68.500.000 денари, од кои Град Скопје ќе учествува со 67.000.000 милиони денари, а Општина Ѓорче Петров со 1.500.000 денари.