Македонија
Зајкова: ЛДП посветено работи на интересите на граѓаните, трошоците за роаминг меѓу ЕУ и Западен Балкан се намалија за 30 проценти

Барањата на Либерално-Демократската партија која посветено ги брани интересите на граѓаните на Западен Балкан се исполнија, така што од 1-ви октомври 2023 година трошоците за Роаминг меѓу ЕУ и Западен Балкан се намалија за 30 проценти, вели претседателката на ЛДП Моника Зајкова.
-На овој начин се воведува нова ера на подостапна, безгранична комуникација, со што се подобрува секојдневниот живот на жителите во Регионот и поттикнување на дигиталната трансформација и регионален развој кулминираше со ова историско достигнување. Либерално-Демократската партија на Советот на АЛДЕ во Братислава предложи декларација која едногласно беше усвоена од страна на Европските Либерали за воведување на концептот. Воведување на концептот „Roam like at home“ помеѓу ЕУ и Западен Балкан, со отстранување на сите тарифи за роаминг, вклучително и доплата на домашната малопродажна цена за повици, СМС и интернет додека сте во роаминг во предвидениот период, додава претседателката Зајкова.
Како што посочуваат од ЛДП, ваквата можност се отвори по потпишувањето на декларацијата на Самитот ЕУ – Западен Балкан во Тирана на 6-ти декември 2022 година и се отвораат нови перспективи за комуникација, соработка и економски раст меѓу земјите од Европската унија и Западен Балкан.
Исто така овој прогрес, кој ветува намалување од 30% на трошоците за роаминг, носи со себе многу предности за речиси 18 милиони граѓани и е „отскочна штица“ во дигиталната трансформација на регионот, а тоа ја отвора патеката за подобрена мобилност, подобра регионална соработка и поголема интеграција.
-Македонските оператори прават подготовки и анализи за новите цени за роаминг услугите кои се согласиле истите да ги намалат врз основа на соопштението кое го добиле од Владата на Република Северна Македонија. Исто така, дефинирани се и идни активности, односно предвидено е и намалување за 30% во 2026 година, а во 2028 година се очекува цените за роаминг да бидат исти како дома, така и надвор од државата. Со тоа граѓаните од Република Северна Македонија и Западен Балкан полесно ќе комуницираат и ќе бидат конкурентни на европскиот пазар, истакна Зајкова.
Слободната роаминг зона меѓу ЕУ и Западен Балкан ќе биде заемно корисна, ќе ја подобри мобилноста, соработката, развојот, интеграцијата и ќе ја забрза дигитална трансформација на регионот. Ова е значаен чекор на Западен Балкан за усогласување со принципите и практиките на единствениот дигитален пазар на ЕУ.
Либерално-Демократската партија ја изразува својата благодарност до сите лидери и функционери вклучени во остварувањето на овој историски договор. Тоа означува клучна пресвртница во патувањето на Западен Балкан кон просперитет, регионална интеграција и дигитални иновации.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мухамед Елмази до Арсовска: Ќе барате ли од вашите партнери да се откажат од бесправните објекти, ќе побарате ли и тука дигалка или ќе свртите глава

Мухамед Елмази од „Влен“ на прес-конференција денеска, упати неколку прашања до градоначалничката на Град Скопје, Данела Арсовска.
„Денес сме тука да поставуваме неколку прашања за госпоѓата Арсовска. Госпоѓа Арсовска дали знаете кој е сопственик на оваа зграда? Дали објектот е де факто на вашите коалициони партнери во Градот и во бизнисот?
На какво земјиште е изграден, на државно или приватно?
На чие земјиште е изграден – државно, општинско или приватно? Дали имало располагање со државно земјиште без валидна јавна постапка?
Кој е вистински сопственик на оваа зграда?
Дали во документацијата се води на друго име за да се сокрие вистинскиот сопственик?
Ако да, зошто инспекциските служби не отвориле постапка за лажно пријавување? Дали овој објект го има во урбанистичките планови?
Дали деталниот урбанистички план (ДУП) воопшто предвидува ваков објект на оваа парцела? Ако не, кој и кога дал согласност за отстапување од планот? Дали вие сте учесник во тоа?
Дали е спроведен инспекциски надзор од Општина Сарај? Дали Градежниот инспекторат има издадено решение за уривање или забрана? Ако не – зошто бројните пријави од локалното население останале без одговор“, праша Мухамед Елмази на денешната прес-конференција.
„Г-ѓо Арсовска, пред да продолжите да зборувате за „дивоградби“ и „заштита на јавниот интерес“, одговорете: ќе барате ли од вашите партнери да се откажат од бесправните објекти? Ќе побарате ли и тука дигалка или ќе свртите глава затоа што станува збор за ваш пријател и коалициски партнер? Попатно, прашајте го и Димитар Апасиев?
ВЛЕН ќе инсистира на: Итно постапување на сите градежни инспекциски служби; Итно постапување на финансиската полиција за откривање на скриениот имот за политичарите од ДУИ; Отпочнување кривична постапка за злоупотреба на службена должност и урбанистички криминал против Арсовска; Јавна објава на сите локации во Скопје каде фирми или лица поврзани со кланот на ДУИ градат или поседуваат диви објекти.
Доколку градоначалничката и надлежните служби продолжат да молчат, ќе ги искористиме сите правни и демократски механизми за да го заштитиме интересот на граѓаните. Ќе го спречиме ширењето на бизнис империјата на кланот на ДУИ, во која припаѓа веќе и Арсовска“, изјави Мухамед Елмази.
Македонија
Арсовска до Мухамед Елмази: Дали си ти криминалец од ДУИ или од ВЛЕН?

„Таман мислиш не може да демонстрираат поголем очај за криминалот во кој се фатени, тие наоѓаат нов првенец од ДУИ! Мухамед Елмази беше член на Совет на град Скопје во овој мандат и истакнат член на ДУИ до септември 2024 година, кога претрпе магична трансформација и стана ВЛЕН за да го постават директор на државното НОМАГАС“, напиша градоначалничката на Град Скопје, Данела Арсовска на социјалните мрежи.
„Вчера барав на седница да се зборува за нелегални дивоградби во сите 10 скопски општини, ама Мухамед, иницијативата за дивоградбите од Сарај твоите коалициски партнери од ВМРО ја покренаа и сами си ја повлекоа.
Изгледа си пропуштил вчера на седница на совет кога побарав да се испитаат незаконските легализации на дивоградби во сите скопски општини вклучително Чаир и Сарај. Затоа што сакаш да глумиш политичар и на национална база да го сведеш ВАШИОТ криминал, читај тука: ЈАС ЗБОРУВАМ СО ФАКТИ И ЗА СЀ ИМАМ ДОКАЗИ.
Сега Мухамед да те прашам:
1. Дали си ти криминалец од ДУИ или од ВЛЕН?
2. Дали знаеш дека од 150 дивоградби од Чаир кои ги имаме фатено и сме известиле во изминативе 3 години, знаеме во која имаш ГРАТИС стан и живееш во истиот.
3. Дали знаеш дека следен тој предмет ќе го носам во јавното обвинителство бидејќи империјата на ТВОЈАТА УРБАНА МАФИЈА ќе ја срушам и воопшто не ми е гајле од која партија доаѓа!“, додаде Арсовска.
Македонија
Сиљановска-Давкова ги прими акредитивите на новоименуваниот амбасадор на Република Кореја, Ким Донгбае

Претседателката Гордана Сиљановска-Давкова ги прими акредитивните писма на новоименуваниот амбасадор на Република Кореја со седиште во Софија, Ким Донгбае.
Посакувајќи му добредојде на амбасадорот Донгбае, таа изрази задоволство од пријателските односи и од конструктивната соработка меѓу двете држави, по воспоставувањето на дипломатските односи во 2019 година. Оцени дека постои волја и посветеност за искористување на потенцијалите и интензивирање на соработката во сите сфери од заемен интерес.
Претседателката ја посочи важноста од развојот на соработката, потенцирајќи дека корејската економија нуди големи можности за партнерство во повеќе области, особено во информатичката технологија, дигитализацијата и обновливите извори на енергија, а од друга страна, нашата држава со стратегиската локација во срцето на Балканот, нуди поволни услови за корејските инвеститори и компании.
Таа изрази уверување и подготвеност за натамошен развој на соработката на мултилатерален план, особено во рамките на Обединетите нации. Малите и средни земји, според неа, треба да дејствуваат единствено, можат да понудат знаење и заслужуваат да имаат посилна улога во одлучувањето за глобалните прашања.
Обајцата ја истакнаа потребата заеднички да работат на отворање на резидентни амбасади во Скопје и во Сеул.
Сиљановска-Давкова, во духот на начелото на реципроцитет, побара да се укинат визите за македонските граѓани, со оглед на фактот на нивното непостоење за граѓаните на Република Кореја.
Амбасадорот Донгбае оцени дека по воспоставувањето на дипломатските односи пред шест години, двете држави станаа успешни партнери и изрази спремност за нивно продлабочување и проширување. Тој го посочи развојот на економската соработка како приоритет во неговата работа.
Претседателката Сиљановска-Давкова упати честитки по повод изборот на Ли Џе-Мјунг за нов претседател на Република Кореја на вчерашните вонредни претседателски избори.
На амбасадорот Ким Донгбае му посака успех во извршувањето на одговорната дипломатска мисија.